المشاركة الأصلية كتبت بواسطة ya3coub
موضوع شيق بس بما انه أخوانا الكبار الي قلبهم خضر خلصو مغامراتهم
انا طفولتي يمكن كانت شوي غير كون هلي من النوع الصارم و المتشدد جدا.
بس اتذكر اول ما سرقت السيارة سويت نسخه من مفتاح الوالدة الكامري 99 و اهم كانو رايحين الحج. خذيتها و سويت اشياء لليوم ما اتجرأ اسويها خلاص 3 ساعات بدلت التواير الــ4 و كسرت البريكات و كراسي المكينة و قيمة تصليحها كان بعد الخصم 18 ألف و شوي فالوكالة<<< و الوالد علباله من الوالد تسوق و تصب بترول بس.
طبعا تخرجت من الثنوية و دخلت الجامعه بدون تأسيسي و عمري 16 سنة
طلعت الكجة و نجحت بالأمتحان للمرور و قالو السستم ما يطبع الليسن لين ما اصير 17
يوم عيدميلادي الوالد عطاني قلم خذيته من عنده و انا زعلان و رجعت حجرتي كنت انطر الليسن بأحر من الجمر المهم فتحته بعد ساعتين تقريبا شفته و بطلته ولا الليسن موجود داخل من الفرحه طيران رحت للوالد ابوسه على راسه و سلمت على الوالدة و خذيت المفتاح, ثاني يوم من 5 طالع من البيت و كاشخ بالسيارة.
طبعا عدة حوادث و رادارات و محالات لإعادة المغامرات الي سويتها يوم بقت السيارة اثناء الثنوية بائت بالفشل و ما حبيت اني اتعور.
وقتها الوالد عقب الثنوية كان شاريلي تيوتا افالون عمري ما سقتها لا اني كنت اوديها المغسلة كل اسبوع مع الوالد و ارجها اصفها فالبيت ما كنت احب استخدمها احسها مو راكبة علي.
سافرنا فالصيف لأفاجئ بأن ابوي باع الكامري "حازه بخاطره شاريلي سيارة سنتين مصفوفة فالبيت ما وصلت حتى 2000 كيلو" و رجعنا و بديت استخدم الأفالون و بدايتي كانت فالتعديل عليها كلشي ادوره و اطلبه من امريكا و اعدل و اتفنن بأشياء محد سواها و اتحدى إلا اني اسويها و طحت بعشق هالسيارة لين تاريخ 20/3/2009 احب التعديل بس ما اسابق وحتى الي يبون يسابقون معاي كنت احقق معاهم انتو شرطة انتو تحريات اربطو الحزام حتى الي ورى لين يملون يخلوني و يروحون.
ببهالتاريخ المنحوس قلت بحتفل و بجهز حق عيد الأم و خذيت دبدووووب شكبره طبعا بعد ما طلعت سيارتي من سيرفس الوكالة ماشية 7000 كيلو شريت ذاك الدبدوب العود و الشوكليت الأحمر و لأني ما اعرف وقتها معطيني مال الفالنتاين اللهم مكتوب عليه Happy Mothers Day.
ولد عمتي اتصلت فيه علشان ياخذ شي لعمتي كونه من سنايني و ندرس فالكلية مع بعض "بعد سنة طلعت من الجامعه و التحقت بكلية شمال الأطلنطي" جان يقولي في سباق و انا عمري ما شهدت لسباق جدام عيوني قلت له بروح,
انا رحت كان وقتها العصبية بين اهل الكروزرات و النياسين تقريبا فوق الــ30 سيارة عند الصناعية الجديدة شارع يوديكم صوب سلوى, وقتها كانت دوريات الفزعة توها بادية شغل ما كملت اسبوع او اكثر ليلحين مو حتى رسميين الناس اتشوفهم ما تعرف شنو الفزعه.
صار السباق و انا ما اعرف المطلوب المهم اني كنت معاهم 3 سيارات تتسابق و يعقوب معاهم على نفس السرعه كون سيارتي بعد كانت معدله و اصلن تطوفهم. و صار شيل بنهاية السباق عالدوار الكبير و ولد عمتي يتصل فيني و انا ما ارد من يوم صغير ما شفت شيل جدامي وراهم اسوق و مخلي مسافة.
و إذا بي الكروزر الأبيض يساري الي انا ما طليت عليه طلع دورية الفزعة.خلاني و راح يلحقهم.
اغلبهم شباب الفريج كانو و ربع و معارف ولد عمتي<<< صادوهم و انا رجعت البيت و ثاني يوم عالصناعية اصلح حادث بسيط صارله فتره لأن الشباب الي انصادو طلبو منهم رقم راعي الأفالون المدعومة.
اتذكر 21/3/2009 كان يوم أحد و من الصبح انا فالصناعية صلحت الخفس بالحرارة ما اخذ مني ربع ساعه و انا طالع على سرعه 60 تقريبا صار لف علي واحد لزقني بالحديد و تكنسلت السيارة و سرعتي وقت الحادث اقل من 60 لأنه شارع السناعية مكسرة و كنت خايف عليها.
من يومها و حتى قبل و انا لي اهتمام بالسلامة المرورية.
بعدها قضيت فتره 6 اشهر بدون سيارة زعلان و سوري عالوصف "كأني بدون رجول" ما اقدر اروح و اجي مثل ما ابي.
شريت هوندا و انا مابيها بس لأن هلي يعرفون بعدل عالسيارة مهما تكون, هوندا سيفيك 2007 موديلها و ما كانت ماشية وايد.
هالسيارة غيرت قيرها 3 مرات من كثرة التعديلات و كلشي سويته فيها بيدي حتى الصبغ صبغتها فالبيت عدة مرات كل ما يسافر الوالد اشلحها و اقعد اعدل و اصلح و اتعلم و اكسر و اجيب قطع من برع و اركبهم بنفسي فالبيت.
إلى ان اشتغلت و اول قرار من الوالد و الوالدة "بيع الهوندا" قلت لهم لا مابي ابيعها صارف عليها بالهبل و عاجبتني و انتو تدرون بس باقيلي اجيب المكينة الي بخاطري و خلاص قالو مافي بيعها و المرسدس هدية عشانك اشلون تداوم انت مهندس الحين تشتغل بسيارة معدلة جنها مالت يهال
مو جنه اهم اغصبوني عليها و بفلوسي من قبل.
و حاليا إلى الآ، بالمرسدس و طبعا عدلت عليها بالقيمة الي ما تستاهلها بس اهي عشق بالنسبة لي تعديل اي سيارة لي او موب لي هواية مو حق شو ولا حق سباقات ولا اي شي انما شي بنفسي ما احب اخليه وكالة اتضايق احب السيارة اتكون مميزة بيني و بين نفسي.
و نفس الشي الدراجة.
طولت وايد عليكم بس الموضوع من بدايته و انا متابع و احس انه يجب ان يرجع للحياة و اي اخبار سيارات جديدة قديمة احب اتطلع عليها و اشارككم بمعرفتي البسيطة