البنت تتواصل مع خطيبها بدون علم ابوها

[غير البشر]

السلام عليكم ورحمه الله وبركاته

الموضوع صادفني من فتره وحبيت اخذ رايكم فيه

وابغي اخذ رايكم بالتصرف الي صار


رجال من معارفنا تقدم لخطبه بنت

وتم الموافقه عليه

وتمت الملكه بكل خير

لكن المشكله !!

ان والد البنت يرفض تواصل بنته مع خطيبها سواء هاتفيا او زياره

والرجال يبغي يعرف البنت وطبايعها ويتفاهمون وياخذون على بعض قبل الزواج

والبنت كذلك لكن ابوها رافض

لكن ابو البنت يقول تكلمها وتقعد معاها بعد الزواج

تمت محاولات لكن لا جدوى

الى أن اتفقو اهل الرجال واهل البنت على ان يتم التواصل بينهم

وطبعا هالشي صار بدون علم ابوها

بغيت اعرف رايكم في موقف الاب

ورايكم في التصرف الي صار


نبغي رايكم بدون التعدي للأشخاص و اتمنى يكون النقد بناء
وعدم الخروج من محور الموضوع



والموضوع متروك لكم لحريه الرأي والتعبير


تحياتي ,,,,,

[غريب الدّار]

اتصدق اخوي غير البشر اني استغرب من وجود هالعقليات في المجتمع؟
في حد في الدنيا يمنع بنته تكلم زوجها ؟

مادري شاقول لك لكن راح افترض صحة الكلام بالكامل واعلق بالتالي :
اعتقادي ان في ناس ( سواء في مجتمعنا القطري او الخليجي او العربي ) عندهم فهم خاطئ تماما للعادات والتقاليد ومفهوم الرجولة والغيرة
هذا الفهم الخاطئ يقود دائما الى تطبيق خاطئ
لان خطأ التشخيص يقود دائما الى الخطأ في العلاج

وخلنا نتناول الموضوع من جانبين :
جانب العادات والتقاليد : واعتقد ان تم الاستناد له من ناحية الاب ، واعتقد هذا راجع للفهم الخاطئ للعادات.وقد يكون مرد ذلك الى الثقافة الذكورية في ابشع صورها . او سوء فهم وخلط رهيب لانه يعتقد ان البنت بما انها لازالت في بيته فيحق له ذلك. ونسي او جهل انها زوجته على سنة الله ورسوله بما ان العقد تم


جانب الدين : اعتقد انه خالف الدين اصلا لان لايجوز لاحد انه يمنع امرأة عن زوجها !


العلاج :
يجب افهام الاب (بغض النظر عن مايفكر فيه من العادات والتقاليد) ان الشرع اولى بالتطبيق وان النكاح تم بالعقد مستوفيا جميع شروطه واركانه وبالتالي فقد حلت له وحل لها مع مايترتب على ذلك من حقوق وواجبات عند الطرفين
ولا يجوز ان يمنعها عن زوجها


والله اعلم

[بانغ بانغ]

ايمسييك بالخير يا غير

بعد عقد المحكمة تصبح زوجته رسمي لكن للاسف بعض التصرفات لا تليق من بعض الشبااب اللي تدينهم وذمتهم بسيطة

يقعد معاها ويشبع وعقب ايقول ما بيها ... ما يصير هالكلام وياما صارت شباب يتطلقون بعد الملشة باسبوع والشيخ احمد البوعينين الله يجزيه خير اخونا ورفيجنا وايقولنا بلاوي لانه مأذون شرعي

كنت اعرف اخوان ربعي بعد الملشة يطلعون سينما ومطاعم بروحهم وعقب يتزوجون

مادري بس احس قوية في مجتمعنا صعبة

[بانغ بانغ]

وطبعا يعجبوني الشباب اللي بعد الملشة عشاء وايسافر وخلاص

[العقل المدمر]

احترت من موقف الابو بغض النظر انه يمانع شي حلال
لان ياما صار اهل امنعوا عيالهم من اشياء حلال خوف عليهم
مثل منع السهر ومنع الجوال وغيره

مرات تكثر المشاكل في فترة الخطوبة ويسهل حل الطلاق بالنسبة لهم
ومرات احس لازم يعرفون بعض ولو يبون يتراجعون يتراجعون قبل احسن من عقب

بالنسبة حق تصرفهم هو اللي اجبرهم عليه
وانا اشوف لو يكلمونه ويقنعونه وايد احسن

[Charisma]

مرحبا اخوي ،


قرار الأب في الحاله اللي ذكرتها لايمكن تصنيفه بقرار خاطىء او قرار صائب ، الأب يملك أسبابه الخاصه في مثل هالحالات بغض النظر ان تم عقد القران ، نعم هو زوجها شرعا ولكن مازالت البنت في بيت ابوها .

الخطأ في الموضوع كله ، هو تصرف الأهل دون علم الأب ، المفروض ان الزوج نفسه يعارض احتراما وتقديرا لرأي عمه في هالمسأله .


شخصيا أتفهم الدوافع وراء قرار الأب ، وحتى لو سمح بذلك لابد ان يكون التواصل في أدنى الحدود تحت الأشراف والتوجيه .


وجهة نظر قابلة للنقاش.

[غريب الدّار]

شباب نقطة نظام لو سمحتوا ويسمح راعي الموضوع :
الاب هذا ( حسب الرواية) مانعها تكلمه
ومانعه يزورها
وهذا حقه كزوج في كل الاحوال وحقها كزوجة يعني هو مانعهم من حقوقهم اللي الله قررها بهم

ومهما كان من تصرفات شاذة عند البعض
فلايقاس عليها

[بانغ بانغ]

شباب نقطة نظام لو سمحتوا ويسمح راعي الموضوع :
الاب هذا ( حسب الرواية) مانعها تكلمه
ومانعه يزورها
وهذا حقه في كل الاحوال
مهما كان من تصرفات شاذة عند البعض
فلايقاس عليها

اتوقع يعتمد يا شيخ غريب على تربية هالاسرة ونظامها ... بي عوايل صح ما تسمح والمفروض الشاب ايكون عارف ان لو في تواصل ايكون بوجود الاهل اما هاي الاب لو مانع نهائي .... يمكن حد من وجهاء العايلة ايكلمه وايوضح له

يمكن شيبة وقافلة معاه

[بصمة قطرية]

شلون بيعرفها إذا ما شافها و لا كلمها
و لا قعد معاها ..!!!
بعد الملجة زوجته يعني الدين ما يمنع تقعد معاه ..
على الأقل تلفون ..!!!
مب لهالدرجة حرص الأب
و إيش ما كانت أسبابه ما أعتقد إنها مقنعه ..!!!!
يمكن ما يتفقون وقت الملجة*..
منعهم يتواصلون و في الأخير بيصير هالشي من وراه ..!!!!
ايش راح يستفيد ..!!!

[Charisma]

ايمسييك بالخير يا غير

بعد عقد المحكمة تصبح زوجته رسمي لكن للاسف بعض التصرفات لا تليق من بعض الشبااب اللي تدينهم وذمتهم بسيطة

يقعد معاها ويشبع وعقب ايقول ما بيها ... ما يصير هالكلام وياما صارت شباب يتطلقون بعد الملشة باسبوع والشيخ احمد البوعينين الله يجزيه خير اخونا ورفيجنا وايقولنا بلاوي لانه مأذون شرعي

كنت اعرف اخوان ربعي بعد الملشة يطلعون سينما ومطاعم بروحهم وعقب يتزوجون

مادري بس احس قوية في مجتمعنا صعبة

ضبط النار على مستوى معتدل ، يضمن لك نجاح وسلامة الـ ( طبخه ) .


الفتره مابين الملكه والعرس ، من أخطر الفترات ، أندفاع وحماس ، مع فرص كبيره لحدوث مشاكل .