شنطة او عدة الحلاقة وين الاقيها

[كلاسيك قطر]

قررت اشتري عدة حلاقة اخذها معي للحلاق اذا بحلق طبعا يكون فيها اكثر من مشط و اكثر من مقص

يالمهم وين الاقيها وكم اسعارها وشكرا ايه سؤال يجي معها مكينة ولا لا

[بعيد النظر]

كلم الحلاق يظبطلك الشنطة .. اخبر من كم من سنة خذتها ب 1500 ..
كاملة مكملة .. بس نصيحة .. اذا تبي تأخذ اخذ حلاقك وتشرى معاه الأغراض بتطلع ارخص بوايد !

[::محمد::]

عندك سوليز موجود بشارع النصر الدخله اللي مقابل مستشفى الدوحة واللي منها تقدر توصل لجرير .. وهذا رقم تلفونهم
44320929
وعندك النزيه في له كذا فرع في واحد جنب جرير السد وفي واحد بالوكرة بنهاية شارع عبدالرحمن بن جاسم

بخصوص العدة انا خذيت عدة ولقطتها بروحي وما تجاوزت ال 1000 ريال .. طبعاً الحلاق مب فاضي لي يطلع معاي وبنفس الوقت ما بي الحلاق يشتري لي ..

عدتي هي نفسها عدة الحلاق .. اشوف المقصات اللي عنده واشتري مثلهم .. حتى مرات الحلاق يستغرب يقولي شلون شريتهم ..

فاللي تقدر تسويه تشوف مقصات الحلاق اللي تتعامل معاه وتشتري نفسهم عشان لما تروح له ما يكون متضايق .. انا صراحه لي مراق بالحلاقة ومرات حتى احلق لحيتي بالبيت .. فعدتي اجزاء منها اشتريها من النت وبالكوالتي اللي يعجبني .. فانت ومراقك ووقتك .. لو تبي شي سريع تقدر تقول للحلاق يشتري لك مثل ما قال بعيد النظر .. لو رايق وتبي تفصفص ع الموضوع تقدر تشوف بنفسك وتبدى من سوليز والنزيه والنت ..

بشكل عام الامشاط النزيه عندهم امشاط زينه ماركة Jaguar ورخيصه بين الـ 10 والـ 20 ..

المكاين في عندك مكينتين اساسيات .. الكبيرة مالت الشعر .. انا استخدم Moser .. والصغيرة مالت التحديد .. هاي انت ومزاجك بس في منها Moser وفي منها Panasonic , Phillips وفي حتى انواع بو 30 ريال يشترونها الحلاليق وجودتها زينه ..

في بعد تقدر تاخذ مكينة تنعيم لو ما تحب تحلق عكسي (لفوق) .. وفي كذا نوع Panasonic, Phillips , Braun وغيرها ..

في عندك الامواس .. خذلك موس تركي وموس هندي .. تلاقيهم عند سوليز .. وتقدر بعد تاخذهم من حلاقك تقوله يعطيك العافيه امواس جديدة ..

بخصوص المقصات .. حاول تشتري نفس مقصات حلاقك .. انا عندي 3 مقصات .. واحد للشعر وثنين للشنب والسكسوكة (لو شفت لحيتي بتقول من زود الشعر ) .. غالباً يجي راسهم حاد ومدبب .. مقص الشعر شريته ب 180 من النزيه .. نوع ايطالي وزوين .. ومقص السكسوكة شريته من النت نوع الماني .. ليومك الحلاق يقولي من وين شريته وانا اقوله من سوليز

في عندك فرشاة الرغوة مدري شيسمونها ..

في عندك بعد الفرشاة اللي يستخدمها الحلاق عشان ينفض فيها الشعر من وجهك ..

عندك بعد الشنطة اللي تحط فيها الأغراض ..

في ناس شفتهم ياخذون الشرشف اللي يحطه الحلاق عليك يوم تروح تحلق .. وفي ناس يودون مناشفهم بعد .. عموماً تقدر تبدى بالأساسيات وكل مره تجيب لك شي جديد .. انا صار لي على العدة 3 سنوات .. وبين فترة وفترة اشوف شي جديد لها لو قاصر .. اللي ضايقني بس اني لما سافرت بريطانيا لمدة سنة اغلب الحلايق مو متعودين على موضوع العدة وبعضهم يعصب يقولك ليش اشفيها عدتي ما عليها قاصر D: اختلاف ثقافات ..

وبس السموحة طولت .. ونصيحة حاول تكاسر مع اللي يشتغلون بسوليز ..

[::محمد::]

نصيحة بس من بعيد لبعيد .. وأنا بريء وما أقصد فيها شي ..
حاول بشكل عام .. لا تترك عدتك مع الحلاق .. أخبر واحد كان يترك عدته مع الحلاق .. في يوم من الأيام دخل الحلاق .. ولقى الحلاق يحلق فيها لواحد

[بعيد النظر]

نصيحة بس من بعيد لبعيد .. وأنا بريء وما أقصد فيها شي ..
حاول بشكل عام .. لا تترك عدتك مع الحلاق .. أخبر واحد كان يترك عدته مع الحلاق .. في يوم من الأيام دخل الحلاق .. ولقى الحلاق يحلق فيها لواحد

مشكور على النصيحة .. واخذها معاي ودوم ف الموتر


واذكر محل النصر اتوقع مكانه عند اشارة عيادة الدوحة .. من داخل الفريج ..
خذت منه اغراض يوم كنت ادرس في بريطانيا .. وكان اللي يحلق لنا واحد من الربع

افضل من كل حلاقين قطر ..


حتى يوم عرسي هو اللي حلقلي من زود الثقة ههههههههه

[وليف الشوق]

عندك محل نزيه على مااعتقد

[كلاسيك قطر]

اله يعطيكم ربي الف عافيه

بس محل نزيه حق بنات اشوفها انا
وبخصوص السعر انا حصلت في سوق واقف كل شي وحنتى المكينه ومع الشنطه 450 ريال

[برشلوني قطر]

اله يعطيكم ربي الف عافيه

بس محل نزيه حق بنات اشوفها انا
وبخصوص السعر انا حصلت في سوق واقف كل شي وحنتى المكينه ومع الشنطه 450 ريال

اشلون حق بنات ؟؟ مكينة الحلاقة احسن وحده العنابيه بتلاقيها عنده..

وحتى المقصات نوعيتها زينه عنده..

بالتوفيق