المشاركة الأصلية كتبت بواسطة غريب الدّار
السلام عليكم
صبحكم الله بالخير
(ملاحظة صغيرة قبل ماندخل في المضمون : العنوان مثل عناوين الكتب القديمة يبلفيت، فيه شوية سجع
)
موضوعي هذا عبارة عن بعض الأقاويل هنيه وهاك ، اللي يمكن مالها أي أساس اطلاقاً ، لكن الناس صاروا يرددونها كمسلمة من المسلمات ، سواء صح او غلط ، مع العلم ان بعضها غير صحيح ويصب في خانة الآراء التي تخطئ وتصيب، لكن البعض (سواء بقصد او غير قصد) يتكلم عنها وكانها من المسلمات ، مع ملاحظة ان اللي عنده علم أكيد عن أي من المعلومات الواردة أدناه اوالمواضيع ياليت يتحفنا بها بمصادر رسمية وموثوقة
وبسم الله نبدأ:
1- وزارة التربية والتعليم : البعض يقول ان والله اللي صاير الحين في الوزارة او في العملية التعليمية من أخطاء بشكل عام هو سببه فصل التربية عن التعليم !!
والكل صار يردد هالكلام
سؤالي علشان نحط النقاط على الحروف :
وش كان دور الوزارة لما كانت وزارة تربية وتعليم ؟ وش صار دورها بعد ماشالوا كلمة تربية من اسم الوزارة ؟
حد يقدر يتكرم ويقول لنا الاختصاصات ويقول لنا الفرق؟
علشان نطلع من سالفة كلام الميالس اللي معظمه مايودي ولا يجيب
اللي متحسف انهم شالوا كلمة تربية من اسم الوزارة : ياليت يقول لنا ليش
علمني يمكن أكون غلطان
لان على حسب علمي الوزرة الى اليوم ماتخلت عن دورها التربوي أصلا
يعني شنو اللي كانت الوزارة اتسويه على أيام المسمى القديم وماصارت تسويه بعد المسمى الجديد بحكم الاختصاص ؟فيما يتعلق بالتربية طبعا
2- تكلفة المطار الجديد : ندري ان صارت بعض الأخطاء وندري ان المطار طوّل ايد وتاجل افتتاحه اكثر من مرة
لكن كل مرة نسمع عن رقم جديد فيما يخص تكاليف انشاءه !! ارقام فلكية بصراحة
وعلشان نحط النقاط على الحروف : كم التكلفة الفعلية للمطار ؟ وياليت الإجابة تكون من مصدر رسمي موثوق
(طبعا ماراح أتكلم عن تكلفة الدب اللي (يقولون ) تكلفته كذا وكذا ة
الا صج :
كم تكلفة دب المطار ؟ هل من مصدر ؟
3- عدد القطريين : سنين وسنين واحنا نسمع ارقام على كيف كيفك
لكن الحقيقة ان عدد القطريين غير معلن بشكل رسمي واعتقد ان في دواعي امن قومي ورا الموضوع وهذا من حق الدولة في نظري
فاللي يقول عدد القطريين كذا وكذا اعتقد انه سامع في ميلس او يمكن شيشة
الا اذا كان في مكان يسمح له بمعرفة الرقم الدقيق ووقتها بيكون افشى سر من اسرار العمل وهاذي جريمة يحاسب عليها القانون
الخلاصة : عدد القطريين لا أحد (غير المختصين فقط) يعرفه على وجه الدقة
واذا كنت غلطان في هالنقطة فالله يرحم والدين من بيصلح لي غلطتي وبينورني بالصح
4- دور وزارة الأوقاف : في اكثر من فعالية (غنائية مثلا) نشوف البعض يتهم وزارة الأوقاف بعدم القيام بدورها
(طبعا الحفلات الغنائية خذتها كمثال فقط)
وعلشان نحط النقاط على الحروف : هل من ضمن اختصاصات وزارة الأوقاف منع الحفلات الغنائية مثلا؟
لان كل وزارة لها اختصاصات معينة ماتقدر تتعداها
5- كاس العالم : طبعا هذا موضوع متجدد دايما ، كل ماصار شي في قطر ولا سنوا قانون معين قالوا علشان كاس العالم !!
كل ماصار مثلا عجز (مثل ماهو حاصل حاليا) او مشكلة مالية قطوها على كاس العالم
وعلشان نحط النقاط على الحروف : شنو تأثير كاس العالم على الاقتصاد ؟قصدي بشكل سلبي
واللي يجاوب اعتقد انه راح يعبّر عن رأي شخصي الا اذا دععم اجابته باحصائيات رسمية موثّقة
الخلاصة : ليس كل مايقال في المجالس صحيح
والترديد الاعمى هو صفة الببغاوات التي لاتعي ماتقول
حتى اللي ينقل كلام غيره المفروض يعرف انه مجرد راي في الأخير الا اذا ثبت انها حقيقة مادية ، فلايتكلم وكن كلامه قرآن مُنزل ، فالله عطانا عقل نفكر فيه واهتدينا لوجود رب العالمين من خلال العقل
المجال مفتوح للجميع في حدود النقاط المطروحة ومايتصل بها
واللي يبي يضيف نقطة من عنده فياهلا ومرحبا
ملاحظة هامة : ماكُتب أعلاه يعبّر عن وجهة نظر شخصية ، والانسان يخطئ ويصيب، فياليت اهل الاختصاص او الأعضاء المحترمين اذا شافوا نقطة غلط يصلحون لي ، ورحم الله امرئ اهدى الي عيوبي
غريب الدّار