استفسار عن هبوط الأرضية و ظهور صوت في البلاط

[معماري قطري]

دورت مقطع حق طريقة اصلاح نفس مشكلتك هبوط 2 سم أو 5 سم أو حولها مب شيء بسيط ومعناه التأسيس غلط ويحتاج حل .. كل المقاطع حق تركيب جديد أو اصلاح بسيط

[CiTy]

شكرا أخوي معماري قطري على اهتمامك ومتابعتك ،، بس الظاهر انا ماعرفت كيف اصول نوع وشكل المشكلة ،،
البلاط اللي عندي سليم ومافيه اي شلوخ او تكسير ، الهبوط او الصوت اتحس انه في الوسط بين التربة وبين اسمنك البلاط
بحاول اني ارسمها يمكن تكون اوضح بالرسم ،،
تقبل تحياتي ،،

[CiTy]

اتمنى ان تكون الرسمة تشرح الوضع

[معماري قطري]

اتمنى ان تكون الرسمة تشرح الوضع

فاهم اللي تقصده وفاهم أكثر إنك ما ركبت على صبية خرسانية .. سووا لك اسمنت بسيط وركبوا البلاط على رمل - دفان - اللي هو وقلت لك الحلول

الحل المضمون 100% تشيل البلاط وتسوي صبية خرسانية بسمك 10 سم بعد ما يدفن ويدك وفوقها تركب البلاط .. هذا باختصار وفيه تفاصيل هندسية كثيرة لازم تتبع

[معماري قطري]

الحقن مب مضمون وبيسوون لك فجوات قبيحة .. لو عندهم جهاز يقص البلاط وتقدر تعيد تركب الجزء المقطوع ممكن بس تحتاج خبرات خاصة .. شوف لو تحب المهندس فوزي اسماعيل هو مدير مكتب ام زد وشركاه ممكن يدلك على شركة تسوي الحقن

[معماري قطري]

وشوف شركة تدمر فرع العوازل مديرهم نبيل حلاوة خبرة وعندهم مكاين ضغط الخرسانة shootingcrete وإحتمال كبير عنده حلول ثانية بس بتكون مكلفة الطريقة التقليدية مضمونة وسهلة

[CiTy]

السلام عليكم ورحمة الله ،،
ان شاء الله انا راح اشوف الشركات اللي ذكرتها أخوي معماري فطري

انا سويت رسمة اكثر توضيح من السابقة الرسمة السابقة رسمتها وانا مستعجل وكثير من الملاحظات لم اذكرها
وان شاء الله بعد ما أكون نسيت شيء في هذه الرسمة الجديدة

نقاط مهمة لازم اذكرها اغلب الإمكان ما حصل فيها هبوط واضح حاليا فقط صوت فراغ وتطبيل
على شان كذي انا ابي الحق على هذه الإمكان قبل لا تهبط بسبب الوزن

وسلامتكم
انا رايح الفيلا الحين عندي جبل من المهام والمشاكل ،، محد يريحك ويعطيك شغل مضبوط
وفي الوقت المناسب ،، الله المستعان

[معماري قطري]

طول ما انت توك تبني ما زلت عند رأيي الحل الجذري أسلم إزالة ودفان زين ودك وعمل صبية جيدة وتركيب البلاط عليها .. ما فيه داعي لدفان بين البلاط والصبية ممكن نصب مرة ثانية فوق التمديدات بعد التأكد من قوتها وسلامتها

انا عارف شاللي صاير من أول ما شرحت وعلى رأيي من البداية .. العمال والمهندسين لازم بيعطونك حلول سهلة بس محد يضمن ما ترجع المشكلة

ولو كانت فيه تسريبات مياه جوفية وهذي نتأكد منها بحفرة استكشافية نصيحة سو نظام شفط .. كله بايب مخرم ملفوف بخيش حتى ما يدخل التراب أو بقماش صناعي خاص وتصريف على منهول ومضخة ترفع الماي لو انملى المنهول .. وانا أشك في وجود مياه جوفية مرتفعة ومتأَكد إنه سوء شغل ودك لك عليه وشبه متأكد إن الرسمة اللي رسمتها غير عن الواقع والواقع ما فيه صبية والموجود بلاستر خفيف تحت البلاط

صادفتني نفس المشكلة في بيت وكان رأيي الشغل غلط قبل لا يخفق البلاط لأنه كان مركب على بودرة وانتفخت البودرة وقام البلاط ارتفع بدال ما يهبط .. واضطر صاحب البيت يسوي اللي قلت له من البداية

[معماري قطري]

أَحد الأشخاص اشترى قصر في السابق ب 5 ملايين وفي الوقت الحالي يسوى فوق ال 25 مليون .. وصار شلخ عرضي كبير في الجدار وسده بشغل ترقيع وصبغ ورجعه جديد .. رجع الشلخ كبير ويبين الخارج من وراه .. جاب شركة صيانة مختصة مديرها كان زميل عمل سابق وهو اللي قال لي .. يقول قلنا له لازم نحفر لين الأساسات والتكلفة صعب نقول لك بدون ما نعرف شصاير

يقول وافق وحفرنا وجبنا جيكات ثبتنا عليها الأساس وحصلنا تواير سيارات قديمة مدفونة وهي تتسبب في هبوط الأرضية تحت الأساس شلناها وصبينا خرسانة تثبت .. السالفة لها مدة طويلة ولا كنت عطتك رقم المهندس وضيعته ولا باشوفه في تلفوني القديم .. ما حصلته بس هو اسمه محمد وصفي ما ادري اذا متابع في البزنس أو لا ومثل ما ذكر لي شركته تخصصية في الصيانة

[CiTy]

السلام عليك ورحمة الله أخوي معماري قطري ،،،

في الوقت الحالي خيار التكسير مستبعد بسبب اني في التشطيبات النهائية للفيلا انا صبغت الفيلا
واي تكسير للبلاط راح رجعني ورا وبدخل في دوامة ،، التكسير بخليه أخر خيار لما أكون مجبور عليه
حالياُ ما زال في امل للمعالجة . وبأذن الله راح يكون الحل هو المعالجة ..

أنا حبيت اطرح بعض النقاط على شان الكل يستفيد من الردود وليس بالأساس يكون حل حق مشكلتي
احب أورد بعض النقاط يمنك تساعد في تشكيل تخيل السبب .
1- عند حفار أساس الفيلا لم تظهر أي مياه جوفيه او حتى سطحية ، حتى البيارة تكرمون ما ظهر فيها ماي الا بشكل بسيط لا يذكر .
2- انا مصور مراحل الدفان والدك وصب الخرسانة ، يعني ان عدم وجود صبيه فوق الدفان خيار مستبعد .
3- جدار او حوض الدفان معزول بالغار الرول والبلاستك .
4- بتفحص البيارة ( البالوعة ) وهى طبعا اعمق لا يوجد فيها ماء لا مع المطر ولا بعد المطر . هذا يخلينا نستبعد المياه السطحية والجوفيه في تصوري .
5- اللي ركب البلاط يقول ان المطر جاء من تحت الفيلا وهو ماشي واثر على الدفان وتشرب لين قال بس ،، انا مش مقتنع من هذا مع انه شكله هو الواقع
وسبب عدم اقتناعي هو ان ليش الماي تمركز تحت الفيلا ليش ما راح في الأرض دام هو يتسرب للأرض لو كان تجمع كان بين في البيارة .
وفي سبب بعد وحتمال كبير يكون من الناس

والله العالم
^_*
عندي صور حق مراحل الدفان اذا تحب اني انزلها اخوي معماري