شواطئنا في خطر .!!!!

[نجم سهيل]

السلام عليكم

اللوم على البلدية والبيئة اللي مقصرين في جهودهم من هالناحية .

إن كانوا مهتمين فعلا بنظافة المحميات والشواطئ وتم تطبيق القانون على المخربين وأصحاب العادات المتخلفة بفرض غرامات صارمة عليهم ماشفنا هذي المخلفات اللي راح تبين آثارها مستقبلاً وبتخلي العوي يمشي سيدة ، حالها من حال المخالفات المرورية بالرغم ان تطبيق المخالفات البيئية أسهل


لفة وحدة صوب سيلين والعديد بعد نهاية كل موسم أو حتى في الويكند بتبين لكم مدى إهمال الناس لهذي المحميات اللي قاعدة تندمر سنة بعد سنة

[بومحمد المطاوعه]

والله يالغالي ،،

المفروض يتم محاسبتهم لو صادوهم

عاد ربعنا متهاونين للأسف

[سالم الزهران]

للأسف هل البشر ما يدرون انه حرام ( لا ضرر ولا ضرار )

[كيلو حديد]

لا بد من مراقبة صارمة
يتم فيها تغريم المخالف وبنفس الوقت إجباره على تنظيف ما ترك من قذارة

[aloosh]

شوف طال عمرك احنا بعد علينا دور التواصل معا الجهات المختصه

والله بقول لك موقف صار معاي

كنت واقف عند مطعم في المحلات المقابله سباير المعيذر
وجاء واحد من الجنسيه العربيه وطلب وقف جنبي الاخ خذ الزباله اللي في سياره وحذفها من دريشه نزلت عليه قلت شيلها الحين او اتصل بشرطه واعطيهم رقم سيارتك والله انه نزل وشالها من شارع وهو يتأسف

[معماري قطري]

شواطيء فلوريدا يزورونها ملايين الأشخاص ورمالها بيضاء وصدقوني ولا فيها حتى عقب زقارة .. صدقوني المشي على الشاطيء حافي باطمئنان هناك متعة ومساج طبيعي لأقدام مرضى السكر .. أول شيء كل 10 أمتار حاوية قمامة كبيرة مرفوعة ومثبتة على قاعدة يراها كل شخص بسهولة .. ثاني شيء هناك شرطة مدنيين مخفيين يتصيدون لأي مخالفة وحتى الصغير يخالفون والديه .. ثالث شيء قانون الشاطيء مكتوب على لوحة كبيرة باللغة الانجليزية والأسبانية وهي المنتشرة هناك

شفت سيارات خاصة صغيرة تمر وتفضي حاويات القمامة بسرعة .. وكل مسافة معينة نحصل شاطيء عام للناس مع مواقف للسيارات وتسهيلات كثيرة شاورات ودورات مياه .. وبائعين متجولين ومؤجرين لمعدات التخييم .. وبعض الشواطيء على الجهة الثانية من الشارع اللي يمر قربها توجد عمارات تطل على البحر لكن على بعد مناسب وفيها مطاعم ومحلات .. هذي بنية سياحية جيدة .. عندنا خربوا سيلين بالشاليهات وكان المفروض يبعدونها عن البحر حتى يكون البحر عام ومن الشاليهات يمشون شوي ويوصلون للبحر

شاطيء ديتونا بيش المشهور .. البنايات على بعد متغير من 500 الى 300 متر وكلها فنادق وشاليهات والشاطيء عام وله مواقف عامة وفيه مكان واسع للتمشي بالسيارات بس يا ويل من يتعدى سرعة بطيئة معينة اعتقد 15 ميل في الساعة .. واللي يحفص بيحفص عليه عباس في السجن .. يجذب هذا الشاطيء ملايين الطلاب في عطلة الربيع

[qatarman8008]

عادك ماشفت اللي اخر الليل يقطون جميع النفايات والجمر وبقايا الطعام في البحر..
قدام الناس.. يدخل البحر وشايل الكجرة والفحم معاه ويقطهم في البحر..

[حبر وقرطاس]

نعم وانا ابصم و اؤؤكد ما ذكره الاخ صاحب الموضوع
الشواطئ اصبحت ذات رمال سوداء ..الشوي والفحم والمخلفات دمرت نقاء وجماليه هذه الاماكن ..والكثير من مرتاديها لا يهمهم نظافتها اطلاقا والسبب
لان الغالبيه العظمى ليس من المواطنين ..
كل انسان غيور على وطنه ..ويريد الافضل والاجمل ..والله ماتنلام كوريا الشماليه على قوانينها التي اعتقد البعض انها خانقه للزوار
بس والله كفو عليهم ..
واللي مايعرف عن كوريا الشماليه فليقرا ويعرف