القطري وسياسه الاستغفال في التعامل معه

[جبر ال جبر]

اول شي مساءكم الله بالخير جميعا
ليش القطري دايمن مستهدف في بلاده والاغلب يمارس عليه عمليه النصب هل لكثره عدد الاجانب في الدوله ووصلت النسبه 9 اجانب مقابل قطري واحد ولا قله الوعي عند معظم القطريين اسعار الحلاقين وصلت 30و40 ريال وهو الا مقص ويطقطق فيه وارتفاع الايجارات مب عذر صارلنا 4 سنين ماسمعنا عن زيادات في الوحدات التجاريه الا بالعكس انخفاض المكيف يضرب عندي يجيني عامل اكاسره من 500 في تنظيف المكيف فقط لين 200 معاناها فيه خلل ،،، شاشه الايفون انكسرت عندي رحت محلات الغرافه عندهم شاشتين وكلهم تقليد كوبي 1 وكوبي عادي واقل سعر للشاشه 500 ريال وتقليد وتوني جاي من المانيا مصلح الشاشه عند ابل ستور الاصلي ب69€ يعني اقل من 300 ريال واصلي
واحد من الربع ماجر بيته على واحد من الجاليه العربيه طلع نصاب وقع له شيكات من غير*رصيد
وعقب اجر البيت من الباطن بنص سعره وقبض مقدم سنتين وشرد امر سوق العلي اشتري غتره او عقال او قحفيه في محل ب250 المحل الي جنبه نفس البضاعه ونفس الشركه ونفس المقاس البضاعه هي هي ب150 !!!!
القطريه سعر التذكره بزنس لندن 20 الف من الدوحه البحريني او السعودي او الكويتي ياخذها ب9000 لا ويطير من بلاده يجي قطر يعني زياده بترول وعقب يطير من قطر لين لندن ويرجع قطر
سيارتي تنبجر امر وقود اطلب تاير يديد ب1300 التاير يعني 4 ب5200 اروح ميزانيه دبي نفس التاير ونفس الماركه ونفس المقاس ب700 ريال يعني 4 ب2800 !!!!
حمايه المستهلك مب ملحقين ماقدر اقول انهم 100% قايمن بدورهم في قصور طبعا من صوبهم ومالومهم في اسباب اقوى منهم ولكن التوعيه بين افراد المجتمع القطري واجبه وضروريه انا لي ربع كويتين ماشاءالله عليهم حريصين وعارفين قيمه الفلوس ووين يوظوفونها ومايسمحون لحد باستغلالهم طبعا مو الكل منهم بس شريحه لاباس بها عندها ثقافه ووعي في عمليه صرف الاموال وكياسه وفطنه في التعامل وهذا الي عطاهم ثقه ودافع لاقتحام مجال التجاره باريحه بدون تردد،،،،
طبعا الامثله وايد ونعجز واحنا نحطها والسموحه الافكار مب مرتبه بس يليت يكون عندنا وعي ومانسمح لحد يستغلنا ترى النصب كاثر هالايام والاستغلال ولي عوده لاستكمال النقاش بهالموضوع المهم والضروري وايجاد حلول دائمه له

[سليمان احمد]

القطري لحمه طري جدا وغني بالدهون المشبعه

طبعا هذي رؤيه التاجر له والاجنبي وللاسف بعض القوانين

[بوخالد911]

الاستغلال لنا بكل مكان تقريبا.
بس لازم تسأل أكثر من جهة. لا تعتمد ع جهة وحدة.

قص الشعر ب 25 ريال. بالمعمورة والعزيزية والليحة ب15

والله يحفظنا من الجشع.

[cafe998]

ههههههه
واحنا بالسعودية نظن ان السعودي مستهدف في بلاده ونظن ان الأجانب يمارسون علينا عملية النصب ورفع الأسعار
و الأجنبي عذره سعودي تقدر تدفع
و مع الأسف ان حاولت تستأجر بيت مثلا يكون الاجار 40 الف واللي قبلك اجنبي مستأجره ب 30 الف
والسبب انك سعودي
غسيل مكيف يكلفنا بالسعودية 60-100 ريال و زعلانين
الحلاقين عندنا
كان الدقن ب 5 صار ب 10 و فيه محلات ب 15
الشعر من 10 صار الى 15-20
و فيه بلديات تفرض تسعيرة موحده بالذات في القرى والمدن الصغيرة


لكن بإختصار بالسعودية ممكن تتناول وجبة ب ريالين و نفس الوجبة ممكن تتناولها 50 ريال
حسب الموقع
الأسعار تحكمها اجارات المحلات و رواتب العمالة والاجارات تفرق اذا الاجار غالي اكيد البضاعه بتكون غالية

[وحيد-الشوق]

كلامك صحيح واتفق معاك لكن ما تلاحظ أيضاً ربعنا مستغفلينا عدل كمثال لما اروح سوق واقف الوكرة اغلب المطاعم اصحابها قطريين وبعضهم شباب ومشاريع جديده ومع ذلك اسعارهم مبالغ فيها جداً اروح اطلب 2 حلى مع كوبين قهوة ب130 ريال وفي الشيراتون 2 ام علي ومشروبين الحساب 155 ريال والله مطعم يقدم حلى عبارة عن قطعة بسكويت وفوقها ايس كريم ب45 ريال >> كم اكرهك ياسوق الوكرة

وغيره من الامثله همبرجر ب80 ريال في مطعم في سوق الوكرة حجتهم لحم طازج مب مجمد همبرجر الفندق ب90 ريال

مثال للنصب والاستغفال عندنا نظارة شمسية في محل في اللاجونا ب1300 بعد الخصم دخلت امازون نظارتين ارخص من وحده عندنا ونفس الموديل ههههههه

زهقنا من عذر الايجارات غالية وحماية المستهلك مايقدرون يتحكمون في الاسعار يقولون دام المطعم او المحل حاط سعر السلعة مانقدر نسوي شيء يعني انا عادي افتح مطعم واحط سندويتش الدجاج ب70 والبيض ب92 ريال والي يسويه لي هندي ولا يعرف شالطماط او محل واحط اسعار بكيفي هذا مب منطق ياجماعة

[khaldoon]

طبيعي يا اخوي.....استعينوا على قضاء حوائجكم بالكتمان......بس لما الاعلام يقول زيادات 10 و 20% و 120% على رواتب الموظفين القطريين فأكيد التاجر راح يفكر يرفع و هالشي ينعكس ايضا على غير المواطن و يصير تضخم و ندفع فلوس في اشياء لا تستحق السعر المعلنه به......

شوف كم محل في قطر ماشي على سياسة استغفال الزباين..... خاصة في المقام الاول و الاخير لما يكون زباينه من النساء......لما تشوف الفلوس اللي تندفع على سخافات و تفاهات بمئات و الالاف الريالات...... محلات الشوكولاته و الحلويات للهدايا في المستشفيات...... كل الكماليات اللي تهم المرأه من ميك- اب و لبس و زينه تفتح بيوت و دور تجميل عالميه و تصرف على الالاف ....

و ايضا علشان ما نقول انه النساء السبب ....شوف بعض الشباب وين يصرفون فلوسهم في سخافات و اشياء ما تسوى ...على سبيل المثال لا الحصر...كماليات و زينة السيارات .....و يحطون عشرات و مئات الالاف .....اخوي بكل امانه لا الوم البياع الحقير اللي يضحك على الناس لانه من يدهم هم اللي صنعوه و خلوه يستغفلهم

كيف تقنع البياع انه يبيعك شي بمية ريال اذا هو يعرف و متأكد انك تقبل تشتريه بألف

تخيل احنا نتكلم عن البياعين في قطر فما بالك لما نتكلم عن خارج قطر.......مثلا لما الخليحي يعطي سواق تكسي المطار مبلغ 500 ريال اجر التوصيل من غير نقاش ولا محاوله لاستكشاف السعر الحقيقي في زمن الموبايلات و الانترنت....كيف نقنع هالسواق انه ياخذ الاجر الحقيقي للتوصيل من الخليجي و هو بس 75 ريال طالما الزبون مستعد يدفع اضعاف هالمبلغ من غير نقاش

[ولي العهد]

ادور راحت البال ولا ابي اعور راسي في الاخير شبسوي بالفلوس اذا ماريحت على نفسي ناس كانت عندها ملايييييييييييييييييين واخرتها في قبر لا يبه اصرف ما بالجيب ياتيك من بالغيب وطبعا بالشي المعقول والي انا محتاجة

[A-Alansari]

والله ياخوك الاستغفال مو من الاجانب اغلب المحلات اصحابها قطريين

الاجنبي هو الاداه يسوي الي يطلبه منه كفيله

لكن الاساس في هالمشكله القطري صاحب الشغل

مو لازم كل شي نقطه على الاجانب الغلط علينا من الاساس لانه مافي بزنس يفتح في قطر الا وفي شريك قطري وله النسبه الاعلى من المشروع

يعني بالمختصر الغلط منا وفينا

[المحاميه]

موضوعك يزعل ..

بس توضيح ترا الكل ملاحظ ويدري وبالعكس احنا شعب نفهم .. لكن تقدر تقول نطوف عشان مالنا بارض ندخل في جدال او نقاش .. ف نشتري راحتنا ..

المشكله .. ان الاجانب يستغفلونك لان حسبالهم انك ماتفهم .. وان ماتفرق معاك وانك مب ملاحظ ..

والخوف .. ان الله يعاقبنا على هالتصرفات .. لما تقط مبلغ غير متناسب مع السلعه او الخدمه المقدمه وانت تدري


الله المستعان ..

[المحاميه]

ادور راحت البال ولا ابي اعور راسي في الاخير شبسوي بالفلوس اذا ماريحت على نفسي ناس كانت عندها ملايييييييييييييييييين واخرتها في قبر لا يبه اصرف ما بالجيب ياتيك من بالغيب وطبعا بالشي المعقول والي انا محتاجة

مثال على ردي السابق ..