اهمال طواريء السد للأطفال ,,@@
السلام عليكم ورحمة الله وبركاتة ..
صبحكم الله بالخيرر
امس في منتصف الليل ارتفعت حرارة بنتي الصغيره وهي عمرها 7 شهور ,,
وصلت حرارتها 40 ..
ومادري وين اوديها ولا اي مستشفى ولا عرفت اي عياده فاتحه 24 ساعه للأطفال
ف لجأت الى طوارئ السد وانا مب مرتاح في روحتي لهم ,, ولكن قلت عسى الأمور تكون طيبه ,,
سجلت البنت في الدخول ودخلنا على غرفه الفحص وبعد الفحص دخلنا على الدكتوره المناوبه ..
وشافت بنتي وقالت ضروري الحين تحليل دم وتحليل بول الله يعزكم بواسطه القسطره ,,
واضن ان القسطره مؤلمه وشي لايطاق ولا يستحمل الأنسان الكبير ,,
قلت ان شاءالله خير وبنسوي لها لتحليل البول اجلكم الله ,,
جات الممرضه للأسف من الجاليه الفلبينيه وقاعده تتعلج وتتلطخ بحلجها ,,
وبنتي صار لها نص ساعه تصيح وحالتها حاله وهذي الممرضه سادحه بنتي مع ممرضه اخرى وماخذين راحتهم في الكشف وفيهم برود غير طبيعي ,,
زوجتي تهاوشهم وانا اهدي ف ام عيالي واقولها اصبري خلينا نشوف شالموضوع ,,
صبرت وصبرت قلت يمكن تستحي على وجها الممرضه وتقط العلج ولكن لا تعرف العيب ولا حست على دمها ,,
من بعد ماخذو التحليل طلع ناقص ويبون يسوون لها مره ثانيه ورفضت لأن اي انسان جرب القسطره بيعرف بمعاناتها ,,
رفضت وطلبت الممرضه المسؤوله وعفستهم عند الأمن لين طلعو لي المسؤوله المناوبه على الممرضات
وطلعت وحده بنت حلال فيها الخير الله يجزاها خير
دخلتنا غرفه خاصه وقالت استريحو امرو شنو عندكم وتفضلو شلي صار معاكم .,.
اول شي تكلمت وقلت لها عن الممرضه الي تتعلج وهل هذا مسموح عندكم او لا ,.؟
قالت لا الواجب عليها ماتتعلج اثناء دوامها ويعتبر هالشي مخالفه عليها وانا بكلمها وبكتب الملاحظه عليها
سألتها سؤال ثاني ليش البرود في التعامل والكشف على البنت ومب مفتكره قاعده تسولف مع الممرضه الثانيه في امور ثانيه
رغم ان البنت تصيح وحرارتها عاليه والزكام لاعب فيها والبلغم مبهدلها .؟
قالت المفروض عليها ان تكون حركيه وتكشف على البنت بشكل سليم ولا تلتفت لأي امر اخر
قلت لها للأمانه مسكت نفسي لأن الي جدامي بنت وتسوي هذي السواة لو رجل مديت يدي عليه اذا هذي سوالفه ,,
لأن الي موجوده انسانه وتتألم وهذي قاعده تتعلج ولا تبالي ولا فيها احساس للحاله
وين علاج النفس قبل البدن ووين الأهتمام اذا هذي الأشكال موجوده في الطواري
مب المفروض يكون في ممرضات او موظفين يعرفون شغلهم في تهدأ النفس وتريح المريض بالتعامل قبل علاج البدن ,,
للأسف هذي سوالف طواري السد ولا اول شخص يشتكي انا
ولا شفنا اي تطور غير بس سوو مكان حق القطريين
شالفايده اذا المكان موجود وبعض الممرضين مايعرفون فالغنم تيس ,,
اتمنى من وزارة الصحه النظر الى هذي المهزله
متحسف اني رحت لهم وان شاءالله اخر مره اطب المكان هذا اذا ماصار فيه تربيه للممرضات في هذي المستشفى
|
رد مع اقتباس
المشاركة الأصلية كتبت بواسطة بانغ بانغ
