بغشيش إلزامياً ..!

[العلياا]

السلام عليكم ورحمة الله وبركاته ..

بصراحة ماعرف من وين ابدأ وأعرف سبق وطرحت مواضيع مشابهة ، لكن حابه اطرح كذا موقف صار لي وأخذ رأيكم فيه ..!

أول موقف
في حياة بلازا ، خذت اغراضي والعامل اللي على الكاشير خذ القاري وعلى اساس بيوصلهم لي للسيارة
وصلت السيارة حط الاغراض فالمقعد الخلفي وتم واقف ويطالعني !!

قلت له ثانكيو وهو يطالعني وللحين فاتح الباب وكررتها وهو مازال واقف !!
انا خفت ولا اراديا حطيت يدي على الهرن ع اساس لو فكر يسوي شي

وعقب المرة الثالثه قلت له ثانيكو قام ورضخ الباب بقو وراح
تفاجأت بحركته يعني غصب عطيني بغشيش او اكراميه بس ماكان عندي كاش !!


ثاني موقف
ايضا في حياة بلازا ( بما اني اتردد علي الجمعية اللي هناك بشكل اسبوعي )
في حياة بلازا دائما لما اطلع من الجمعية أشوف في عامل نظافة مجرد ما يمر عليه حد يركض وراه
ويروح يسوي عمره ينظف قدام او ورا السيارة والمصيبة لو ورا السيارة وكذا مره بغيت ادعمه


وطبعا كثيرة مثل هالمواقف تصير ومنهم العمال اللي يغسلون سيارات فالمجمعات
حتى لو قلت لهم ماتبغي تغسلها يطالعونك باحتقار !!

عارفه سلفاً بعض التعليقات اللي تقول هم احق من الويترز اللي فالمطاعم وماشابه
لكن لما يتكرر عليك الشخص وبتصرفات فيها استهتار مثل هذي شلون تكون ردت فعلك ؟

وهل فعلاً أصبح البغشيش إلزامياً ..!
والسموحة على الاطاله

[بانغ بانغ]

انا اقيم الخدمة المقدمة سواء مطعم او اي مكان ... اعطي من عندي وامنع من عندي

اما في بعض الدول فيعتبرشبه الزامي او عرف

[النهار]

يالعليا اقولج شي تتعجبين
حسب ماسمعت ان العمال الي يدوزن القاري للسياره وينزلون الاغراض للزبون هم عمال شركات خاصه
الجمعيه مالها علاقه فيهم يسمونهم الاوت سورس ستاف
هذول مالهم رواتب مع العلم الشركه الي مشغلتهم تأخذ مبلغ وقدره من الجهه الي موردين لها هذه العماله
يعتمدون على مايدفعه لهم المتبظع الزبون كل حسب مقدرته
فقط الشركه توفر لهم اليوني فورم اللبس وباقي الاشياء عليهم
نفس الشي الي يغسلون السيارات مالهم رواتب بل يدفعون لصاحب الشركه مبلغ معين متفق عليه شهريا وماتبقى يتقاسمون بينهم
حتى مواد التنظيف يدفعون قيمتها

[سالم الزهران]

عطيه المقسوم طالما انه وصل لك الاغراض للسيارة لانها مب شغلته و هم يحسبونها من هالناحية و فرحانيين فيها و يدورون على العشرة و الخمسة ريال

[@north_star@]

بصراحة شغلة البقشيش ترجع للشخص نفسه اذا بيعطي أو لا ومب مفروض انه العامل يلزم الزبون او يطلب منه يعطيه بقشيش

طبعا انا اتكلم عن مغاسل السيارات وبعض المطاعم بس بالنسبة لعامل الجمعية اذا خليته يشيل الاغراض ويوصلها السيارة عطيه المقسوم لانه عمله داخل الجمعية

[طبيب قطري]

الموضوع مب سالفه الزام، بس لاحظ اخوي ان اللي يشيلك الاغراض لين السياره ويدز لك الجاري مب ملزوم ايضا بهالشي، هو مب حمالي وهذي مب شغلته اصلا يشيلك الاغراض اذا ماتبي كان قلتله بعد ماعبى الاكياس ان مايجي معاك السياره ولا ياخذ الجاري، بس دامك وافقت عيل هو اوتوماتيك عرف انك تبيه يدز الجاري وبتعطيه بقشيش .

[hamoor4ever]

اول موقف مفروض تعطونه شي لان مب شغلته يدز معروف هالشي . هو يدز على اساس انه يبغششونه

[العلياا]

انا اقيم الخدمة المقدمة سواء مطعم او اي مكان ... اعطي من عندي وامنع من عندي

اما في بعض الدول فيعتبرشبه الزامي او عرف

صحيح عند اغلب الاجانب اللي عندنا فالدوام اذا طلبوا شي لازم يعطونهم
لكن لما الموضوع يقلب على بزنسس او يتصرف العامل بطريقة وقحه

فهنا اقول انا مب ملزومه اعطيه التصرف بحد ذاته مستفز !!

[العلياا]

يالعليا اقولج شي تتعجبين
حسب ماسمعت ان العمال الي يدوزن القاري للسياره وينزلون الاغراض للزبون هم عمال شركات خاصه
الجمعيه مالها علاقه فيهم يسمونهم الاوت سورس ستاف
هذول مالهم رواتب مع العلم الشركه الي مشغلتهم تأخذ مبلغ وقدره من الجهه الي موردين لها هذه العماله
يعتمدون على مايدفعه لهم المتبظع الزبون كل حسب مقدرته
فقط الشركه توفر لهم اليوني فورم اللبس وباقي الاشياء عليهم
نفس الشي الي يغسلون السيارات مالهم رواتب بل يدفعون لصاحب الشركه مبلغ معين متفق عليه شهريا وماتبقى يتقاسمون بينهم
حتى مواد التنظيف يدفعون قيمتها

!!!!!
هذا موضوع آخر وما اتوقع كل الجمعيات تعرف ان الشركات تبوق منهم وماتعطي موظفينها رواتب!!
اصلا شلون هالعمال ساكتين

[العلياا]

عطيه المقسوم طالما انه وصل لك الاغراض للسيارة لانها مب شغلته و هم يحسبونها من هالناحية و فرحانيين فيها و يدورون على العشرة و الخمسة ريال

والله ياخوي مانقصر معاهم لكن لو الواحد احتد وماعنده كاش شيسوي !!