فضفضة اهل قطر ...!!!

[العقل المدمر]

حتى لما تمر سنين من عمرج .. بتضحكين يا العقل المدمر على هالايام اللي كنت تقرين فيها هالمشاكل
وبتقولين اشلون ضيعت وقتي مع هالسوالف..

فاحنا لما نرفض هالمواقع نرفضها مب من باب ان الله بالينا بعيال ناشرين فضايحنا في هالمواقع او هالحسابات...
نرفض من باب حرصنا على المحافظة الى البيوت واسرارها وان كانوا اهل هالبيوت ساهيين تايهين عن عيالهم..

الولد اللي انفعت فيه التربية او البنت اللي انفعت فيها التربية سواء كانوا عيالي او عيال غيري.. مستحيل
يرضون يقطون نفوسهم الى هالمستوى من نشر فاضيحهم( اقلها يسترون على نفوسهم)..
لكن لو ولدي لا سمح الله الشر برا وبعيد ما انفعت فيه التربية ويدخل ويفضفض عن مشاكله مع ابوه او فضيحة اخته لا سمح الله
او علاقات ابوه الغرامية( طيب فضفض ونشر غسيله وانسب ابوه وانهانت اخته وانسب هو)
فهل لقى حل ؟

وفوق هذا يا العقل المدمر
حسب ما تبين لي ان هالحساب مجرد حساب للفضفضة حسب اراء من وصلني رايهم.. وان الواحد عادي يتكلم
ويفضفض ومب شرط ناخذ الموضوع بجد.. واذا انكشفنا ننكر..

طيب في الأساس الفضفضة مب مكانها الصحيح.. ثاني شي.. انا ممكن اعرفج من فضفضتج ونوع مشكلتج
واستغل هالشي ضدج!!
وخاصة لما البنات يحاولون يوسعون نشاطهم وافكارهم عند المشاركة في مثل هالحسابات..


صدقيني المنع احد أساليب حل المشاكل.. هذا بالنسبة لي.. فما أطالب منع تام لمثل هالحسابات
لكن لو بتنوجد خلها تنوجد تحت مظلة تربوية او مختصة في الشؤون الاسرية او متخصصة في حل المشاكل..
ويمنع كل من هب ودب يبدي رايه في حل المشاكل هذي..

يعني الغلط الاكبر من الناس نفسهم اللي يفضفضون
هم اللي فاضحين اهلهم وعارضين مشاكلهم حق الخلق ويقدرون يعرضونها فحساباتهم الخاصة والا بكومنتات والا فاي مكان
والردود الغبية اللي نقراها ممكن تجينا من اي شخص حولنا لو اخترنا الشخص الغلط
واتوقع لو فيه بديل حساب يديرونه مختصين متوفرين بهالسهولة بتخف مشاكل هالحساب لان فيه فئة صج تبي حلول
بس ينشرون فيه مستسهلين موضوع ان يكتبون وينشرون فثواني ويقرون 100 رد ممكن شي منهم يفيدهم
اما الفئة الثانية واللي شكلها اكبر ما يبون حلول عقلانية من الاساس ولا يبون ناس مختصة
يعني مثلا بنت تشتكي من ابوها ماتبي واحد عاقل يقول لها ابوج ولازم تطيعينه تبي ميانين يحسسونها انها صح وهو غلط عشان تصدق عمرها
وهالبنت لو مالقت مثل هالحساب ما بتختار امها مثلا كونها اعقل وافهم عشان تاخذ منها نصيحة عدلة الا بتتعرف ع ناس او بتفضفض حق ربعها اللي على مزاجها وبتسمع نفس الكلام

[العقل المدمر]

صغار اللي يكتبون مشاكلهم
حد يشره على بزر مهمل من هله !
بالنسبه لي والله يكسروون الخاطر حتى وانا ما اعرفهم
فالنهايه هم عيال وبنات قطر ( بغض النظر اذا فيه جنسيات ثانيه ) وحراام اللي قاعد يصير فيهم من ضحك عليهم واستغفالهم
واتمنى فعلا يتسكر وتمسك هالموضوع جهة مختصه

وين صغار وبزر .. شكبرهم واغلبهم متزوجين هذول المفروض يربون مب يتربون
انا مايكسرون خاطري بصراحة مشاكلهم تافهة وعقولهم صغيرة وعارفين الردود اللي بتجيهم وبعد يشتكون

[بانغ بانغ]

اتوقع في مواقع واناس اشرار بهويات طيبة يسعون لنشر الفساد واصطياد الابرياء

[aloosh]

انا عرفت الحساب
حساب في قمه التفأهه
وكلام قاضي المفروض يغلق ها الحساب
لانه يعلم على الرذيه والفواحش ويفتح طرق الانحراف والخروج عن الاهل
والمشكله مسميه بسم قطر

[يمامـة]

وين صغار وبزر .. شكبرهم واغلبهم متزوجين هذول المفروض يربون مب يتربون
انا مايكسرون خاطري بصراحة مشاكلهم تافهة وعقولهم صغيرة وعارفين الردود اللي بتجيهم وبعد يشتكون

متأكدة اني قريت مشاركات أصحابها يقولون

انا عمري 17 سنة
انا عمري 16
انا عمري 19

وفوق هذا امس وصلني اعلان حق سفينة تايتنك ما اعرف شسمها اعذروني
في عرض لرحلة لمن هم ما بين 10 الى 16 سنة على متنها.. الإعلان قديم
بس شوفي لأي فئة الرحلة!!

واللي وصلتني علومهم انهم يتابعون هالحساب ومأيدين له والمعارضين له
بعد أعمارهم 15 و 16 و 17 و 18 و 19 و 20.. ويعرفون ربعهم مشاركين في الحساب
و مفضفضين ويدافعون عن فضفتهم..

فالموضوع لو كان محصور في متزوجين معليه

لكن بنت تشتكي من أمها تدخل زينة الحلا تقول لها: تمردي عليها واشتكي عليها

هذا يغذي مخها بالسلبيات اكثر من انه يغذي مخها ومخ من معاها واللي في عمرها بالايجابيات..

[يمامـة]

يعني الغلط الاكبر من الناس نفسهم اللي يفضفضون
هم اللي فاضحين اهلهم وعارضين مشاكلهم حق الخلق ويقدرون يعرضونها فحساباتهم الخاصة والا بكومنتات والا فاي مكان
والردود الغبية اللي نقراها ممكن تجينا من اي شخص حولنا لو اخترنا الشخص الغلط
واتوقع لو فيه بديل حساب يديرونه مختصين متوفرين بهالسهولة بتخف مشاكل هالحساب لان فيه فئة صج تبي حلول
بس ينشرون فيه مستسهلين موضوع ان يكتبون وينشرون فثواني ويقرون 100 رد ممكن شي منهم يفيدهم
اما الفئة الثانية واللي شكلها اكبر ما يبون حلول عقلانية من الاساس ولا يبون ناس مختصة
يعني مثلا بنت تشتكي من ابوها ماتبي واحد عاقل يقول لها ابوج ولازم تطيعينه تبي ميانين يحسسونها انها صح وهو غلط عشان تصدق عمرها
وهالبنت لو مالقت مثل هالحساب ما بتختار امها مثلا كونها اعقل وافهم عشان تاخذ منها نصيحة عدلة الا بتتعرف ع ناس او بتفضفض حق ربعها اللي على مزاجها وبتسمع نفس الكلام

كلامج بمجله واقعي وما اقدر أقول عن شي..

لكن خلينا ننظر للموضوع من زاوية ثانية..

اللحين لما نقول مثل هالحسابات ما تكون مفتوحة ومطروحة للجميع وانها لابد ان
تكون تحت وصاية او اشراف جهات مختصة.. فهل هناك حد من المشاركين راح يتضرر ماديا
او معنويا او نفسيا؟

اكيد بتقولين لا..

لكن في حالتنا هذه.. رغم واقعية مشاركتج.. الا ان الاضرار ممكن تشمل عدد اكبر من صغار العقول
فبدل ما اتأثر صديقة على صديقتها اللي تشتكي لها بينها وبين نفسها.. الرأي السلبي ممكن ايأثر على عشرة
متابعين او مشاركين او مراقبين للمشاركات
توجد فيهم ثمرة تمرد كامنة ناطرين من يسقيها..

فمن جذيه.. نرجع ونقول:
الأمور هذه والتسلية بمشاكل الناس والفضفضة الفاضية لمجرد الفضفضة امر مرفوض
فمن عنده مشكلة لابد انه يتجه للجهات المختصة والاستشارية اللي ممكن تفيد..

فالقضية قضية مبدأ وتربية.. فاللي ما نرضاه على عيالنا المفروض ما نرضاه على عيال الناس..
فغلط الشاب او الشابة الاعزب او المتزوج ينشر غسيله بين خلق الله وينتظر كل يدلي بدلوه في مشكلته..

فمن جذيه أطالب باغلاق الحساب بشكله الحالي..

[يمامـة]

اتوقع في مواقع واناس اشرار بهويات طيبة يسعون لنشر الفساد واصطياد الابرياء

للأمانة ما اقدر اتهم صاحبة الحساب او من يقوم على المشاركة بأنهم يرتدون رداء جدة ليلى وينامون في سريرها..

لكن من االمؤكد ان هناك ناس بالفعل تنطبق عليه ما ذكرته انت في مشاركتك..

فمن الأفضل مثل ما كررنا من امس هالمواضيع ما تكون عرضة للكل يدلي دلوه فيها..
فهناك جهات معينة ممكن محاسبتها عند وقع الاضرار على المشتكي..

اما في مثل هالحالات.. قد تكون المشكلة سبب في مشاكل ثانية لامثال هالمتهورين بحسب
سنهم المندفع والمتقبل لكل شي..

[العقل المدمر]

في ناس صغار يشاركون بس اغلب المشاكل متزوجين وخيانات ولوعة جبد
وانا اشوف ان تسكير الحساب مب حل لانه اصلا مب حساب واحد
في اكثر من حساب ولو تسكروا ترى في حسابات خليجية لها نفس الهدف
ومواقع التواصل الاجتماعي بشكل عام فيها ناس من كل الاعمار والاديان والافكار
فصعب ان يسيطرون ويسكرون شنو ويخلون شنو وشنهي المعايير اللي يمشون عليها
لان حتى هني فالمنتدى مثلا الناس تفضفض بس موضوع عن موضوع يعني الخلل مب فالفضفضة نفسها
وبعدين وينهم هالمختصين ليش مانشوف لهم حسابات توعية وحل مشاكل وليش ما يساعدون الخلق ويوجهونهم
مافيه الا عقول مقفلة مجتمعة مع بعضها هذول يبيلهم من يصحيهم ويقول لهم اللي تسوونه غلط وعندكم البديل كذا وكذا والا الموضوع مابينتهي لو انتهى هالحساب لان فيه الف غيره

[ضوى]

بنت شرق بشكل عام تراني ضد المواقع هذه بكل ما تحتويها من إيجابيات وسلبيات..

وبفضل من الله ورحمته.. ما اشجع على التواجد فيها ولا لي أي حساب في أي موقع تواصل اجتماعي..

وفي الوقت نفسه

لي فكري الخاص فيني اللي ما افرضه على احد.. وفي الوقت نفسه لي الحق في اني أطالب بأمور اشوف انها
ممكن تكون كارثة على المجتمع..

فموضوع المسجد مفتوح والبار مفتوح هذا امر مرفوض عندي..

فلما أقول نهدم البار فهذا ما يعني ان المسجد رواده بيزيدون ..

لكن ما نترك البار مفتوح بحجة كل يدخل المكان اللي يناسبه..

ومثل هالمواقع اشوفها خطرة على المجتمع كله حالها حال البارات.. وأسلوب المهادنة واللين مع الجيل الحالي
ما احب اتبعه حتى مع عيالي..

المواقع و الحسابات هذه غلط.. أقول رايي واحط اقتراحاتي واطالب بتنفذيها..

تنفذت خير وبركة.. ما تنفذت اللهم اني بلغت اللهم فاشهد.. وكل بيدخل قبره شال اعماله
واللهم اني ابرئ نفسي من السكوت او مجاملة او مهادنة او ملاينة من يقوم على هالامور
او يزينها او يجد مبرر لها..

بس بعد ما جاوبتي على اسئلتي

مانقدر نمنع عيالنا من مواقع التواصل لكن نقدر ندش ونسوي لنا حسابات ونتابع عيالنا شنو يعرفون وشنو يتابعون وشنو يحطون ، مايصير انا مادش واخلي عيالي يدشون واسمع من برع عن بلاوي هالمواقع !

[يمامـة]

في ناس صغار يشاركون بس اغلب المشاكل متزوجين وخيانات ولوعة جبد
وانا اشوف ان تسكير الحساب مب حل لانه اصلا مب حساب واحد
في اكثر من حساب ولو تسكروا ترى في حسابات خليجية لها نفس الهدف
ومواقع التواصل الاجتماعي بشكل عام فيها ناس من كل الاعمار والاديان والافكار
فصعب ان يسيطرون ويسكرون شنو ويخلون شنو وشنهي المعايير اللي يمشون عليها
لان حتى هني فالمنتدى مثلا الناس تفضفض بس موضوع عن موضوع يعني الخلل مب فالفضفضة نفسها
وبعدين وينهم هالمختصين ليش مانشوف لهم حسابات توعية وحل مشاكل وليش ما يساعدون الخلق ويوجهونهم
مافيه الا عقول مقفلة مجتمعة مع بعضها هذول يبيلهم من يصحيهم ويقول لهم اللي تسوونه غلط وعندكم البديل كذا وكذا والا الموضوع مابينتهي لو انتهى هالحساب لان فيه الف غيره

محنا ذكرنا يا العقل المدمر في الموضوع هذا .. عيب على الاستشارات الاسرية او أي مركز مختص
ان مثل هالحسابات تسحب الناس منهم!!

فلو لاحظتي ما عندنا مشاكل اللي عنده مشكلة يرجع لأهل الاختصاص و المشورة..
لكن الحساب يكون مفتوح للكل يدلي رايه فيه.. ويقول اللي يبيه.. هذا في ذمة صاحب الحساب
ومن يسكت على الحساب..

نعم هناك حسابات ثانية تنفتح.. فاحنا اللي علينا ان نحذر ونطالب بمنع فتح حسابات مثيلة..
فمطالبنا واضحة..
1- اغلاق هالنوعية من الحسابات دام انها مفتوحة من قطر
2- منه فتح أي حساب مماثل..
3- المطالبة بالجهات المختصة والمعنية فتح ابوابهم بالطرق الحديثة لاستقطاب
هالنوع من البشر اللي حابة تنشر غسيلها على الملأ..

رقم 3 وضعته احترام لرغبة من يطالب بوجود حسابات متخصصة لمتابعة و معالجة المشاكل..

اما لو الامر يخصني.. فأقول يا زين الستر.. الواحد يلجأ سكيتي لاصحاب المشورة والاختصاص
ويطلب منهم الرأي او النصيحة..