ليش يصورون لنا ان فرحة العيد قبل 20 سنة احسن من الحين؟

[بوخالد911]

Old is gold

[حليتان*]

تبي الصج قبل يوم صغار كنا نعيش العيد كله ونحس بكل ال 4 ايام
الحين العيد اول يوم الصبح لين الساعه 11 بس عيد عقبها مافي عيد ويمكن اوقات عقب صلاة المغرب لين اذان العشاء وبس اول يوم

كنا نحصل عمامنا وعمتنا خوالنا خالتنا نسلم عليهم الحين مسافرين ولا عيد الاضحى بزوده بعد من قبل العالم يسافرون ماكانو يسافرون عيد رمضان الحين حتى عيد رمضان يسافرون لان كل شي صار اسهل

[بعيد النظر]

اول اليهال يدرون على البيوت ويستانسون ويحصلون ناس قلوبها صافيه تستقبلهم بالابتسامه
والفواله الزينه والعيديه

الحين البعض اذا دقو يهال باب البيت البعض يعصب

قبل تحس بمتعه لما تطلع من صبح مال ترد الى الظهر لا وتحدي من جمع عيديه اكثر

أي والله صاج

الحين عيد = اول طيارة !


قبل ليلة العيد والله الواحد ما يرقد وده يكشخ بكل شي جديد !
الحين اليهال مواصلين ويالله يالله يصلون .. وياخذون العيادي بخياس !


وعقبها رقاااااااااااااااااااااااااد

[غريب الدّار]

السلام عليكم

بكل بساطة واختصار ليش دايم يصورون لنا في التلفزيون ان العيد وفرحت العيد كانت اجمل قبل 15 سنة او 20 سنة واكثر؟ ودايم يطلعون لنا فديوات قديمة وصور الفلوس القديمة وحتى لو كان تصوير جديد لازم الوضع يطلع احسن قبل 15 و20 سنة؟

وصل التاثير انة كل ما قرب العيد اسمع الناس والعالم يقللون من فرحة العيد ويقولون قبل 15 و20 سنة احلى

وتاثر بكلامهم الصغار وكانهم فاتهم شي ومالحقوا علية. واذا جا يوم العيد كثير من الي اسمعهم في هذا اليوم يتكلمون عن ان العيد قبل احلى.

وبرامج التواصل الاجتماعي اغلب الصور فيها عن مظاهر العيد في السابق.

ليش يعني يصورون ان العيد في وقتنا الحالي مالة فرحة ولا طعم الله يجزاهم خير. يعني مانفرح بالعيد واذا جا نهار العيد نقعد نظرب كرك ونتذكر ايام العيد يوم كنا صغار؟ وليش ما يطلعون لنا في التلفزيون والعالم الي في تويتر وانستقرام ويحطون لنا
(ذَظ°لِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ)

اذا كانوا الاشخاص الي في التلفزيون الي يسوون هذي البرامج قاعدين يتوجدون على ايامهم ذيك السنين ويطلعونها لنا على شكل برامج فالافظل انه يحتفظون بها لأنفسهم.


اختم كلامي واتمنى انكم تفرحون بالعيد ولا ياثر عليكم الي يقلل من قيمةالعيد. العيد شعيرة من شعائر الله واكبر من الفرح والوناسة والعيد مش عادة اجتماعية ولكن من الشرع والمناسك (وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ)

ملاحظة ممتازة اخوي متروس

هاذول حزب النكد طال عمرك
اللي يحاولون يخربون أي فرحة يشوفونها

هذا واحد

الصنف الثاني : الصنف اللي ملعوزنا جيل طيبين وجيل طيبين

يبي يثبت لك ان جيله احسن جيل في العالم

علشان جذيه يقول لك قبل احلى وقبل احلى
يعني بصريح العبارة : جيلنا احسن من جيلكم ------------------ > كلام يهال
وكل مرحلة لها إيجابيات وسلبيات
وكل مرحلة لها مايميزها

وشكرا على الموضوع

[كيلو حديد]

أخوي غريب
عني جيل الطيبين أعتبره جيل فاشل لأنه جيل وجد في مرحله انتقالية فلا هو إلى الأقدم ولا إلى الأحدث
بس ما يمنع أيامنا كانت أحلى والأسباب ذكروها الشباب و ما قصروا

الجيل الي قبلنا كان يشوف جيله أفضل وأيامه أحلى وكانوا يطنزون على الأتاري وصخر هههه
مثلنا نطنز على جيل الأيباد والأيفون هههههه

سنة الحياة

[ماجد البدر]

السلام عليكم

وعليكم السلام و رحمة الله و بركاته

بكل بساطة واختصار ليش دايم يصورون لنا في التلفزيون ان العيد وفرحت العيد كانت اجمل قبل 15 سنة او 20 سنة واكثر؟

موضوع كبير وذو شجون كما يقال
اعتقد فعلا تغييرت الثقافات و اول العيد له فرحه كبيره

ودايم يطلعون لنا فديوات قديمة وصور الفلوس القديمة وحتى لو كان تصوير جديد لازم الوضع يطلع احسن قبل 15 و20 سنة؟

وصل التاثير انة كل ما قرب العيد اسمع الناس والعالم يقللون من فرحة العيد ويقولون قبل 15 و20 سنة احلى

صحيح اجيال تتاثر واحنا مانشعر ولكن نقول لهم وهذي الحقيقه ان العيد اول افضل

العيد مشاعر جياشة يخلص صباح العيد وينتهي عند كثيرم ن الناس العيد
وبقية العيد فيه ناس تروح المجمعات و بعضها مجالس و الاغلبية مسافرين

وتاثر بكلامهم الصغار وكانهم فاتهم شي ومالحقوا علية. واذا جا يوم العيد كثير من الي اسمعهم في هذا اليوم يتكلمون عن ان العيد قبل احلى.

وبرامج التواصل الاجتماعي اغلب الصور فيها عن مظاهر العيد في السابق.

ليش يعني يصورون ان العيد في وقتنا الحالي مالة فرحة ولا طعم الله يجزاهم خير.

اعتقد نعم فيه فرحة مالحقوا عليها مثل الرزيف الي في الكورنيش ماله شخصية قبلية رزيف عام وفرحة للجميع الجميع يقدر يشارك فيه
حتى الجاليات الباكستانيه تلاقي لهم فرحة و رقصات في العيد في الكورنيش اذكرهم برقصاتهم وخناجرهم و عصيهم
الحين اغاني سوق واقف و لقاءات مالها طعم مع ممثلين لايمثلوننا في شي

يعني مانفرح بالعيد واذا جا نهار العيد نقعد نظرب كرك ونتذكر ايام العيد يوم كنا صغار؟ وليش ما يطلعون لنا في التلفزيون والعالم الي في تويتر وانستقرام ويحطون لنا
(ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ)

اذا كانوا الاشخاص الي في التلفزيون الي يسوون هذي البرامج قاعدين يتوجدون على ايامهم ذيك السنين ويطلعونها لنا على شكل برامج فالافظل انه يحتفظون بها لأنفسهم.


اختم كلامي واتمنى انكم تفرحون بالعيد ولا ياثر عليكم الي يقلل من قيمةالعيد. العيد شعيرة من شعائر الله واكبر من الفرح والوناسة والعيد مش عادة اجتماعية ولكن من الشرع والمناسك (وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ)

والله كلامك عين العقل ولازم نظهر الفرح ونخلي الابتسامه مرسومه على عيالنا ونظهر لهم ان عيدنا افضل ونوصل لهم رسالة ايجابيه بفرحة العيد

وهذا الشي مايي غير بتكاتف الجميع ببث الرسائل الايجيابيه عبر الوائل التواصل الاجتماعي
وكذلك على الدولة مسؤولية اظهار الفرح بهذا اليوم اليوم الوطني و غيره ليس اكبر من يوم العيد
نظهر فيه الفرحه وتكاتفنا و حبنا لدينا حتى تعلم اليهود ان في ديننا فسحه
اتمنى يكون مظاهر الفرح و الفرق الشعبيه تنزل تبتهج بكل حشمه وتجعل الجيل الجديد يفرح وغير من طبع السفر او النوم
الا ان يكون الجو حار متعب مابيدنا شي ينسويه
جزاك الله خير على الموضوع الجميل

[بنت شرق]

في زمن الطيبين كان وضع الفرجان قطري مئة بالمية ، وكانت مظاهر العيد الشعبية نابعة من تقاليد حلوه
الحين تغير نظام البيوت والطرق وتغيرت معها المظاهر الشعبية قلت الألفة وصارت الألفة عائلية مش على مستوى الجماعة

[العلياا]

فعلاً تستغرب من هالناس اللي يكرهونك بالشي
احنا على ايامنا كان هالشي احلى والحين مادري شلون صاير ماله حلاه ... بلا بلا بلا

شالفرق بين قبل الحين
قبل ناخذ عيادي والحين نعطي هي الفرحة نفسها ماتغيرت
وكثير من العادات هي نفسها نقوم مع الفجر نجهز الفالة مع الوالدة لمجلس الحريم والرياجيل
ونطلع نلبس بسرعة عشان اول مايرجعون من الصلاة نسلم عليهم ونعايدهم

اخواني اطلعوا بيوتهم وللحين العادة مانقطعت اول الصبح هم مع عيالهم عندنا لين العصاري
نشوف كشخة عيالنا وهذيك الفالة الزينة وسوالف وسعة صدر ولا شي تغير ولله الحمد

يمكن اللي زعلانه عليه دلاغ العيد بو دانتيل كشكش

[فيصل99]

طبعا ولا شك ايام العيد قبل احلى ولا في مجال للمناقشة ايام البساطة والفرحة والقلوب الصافيه
لكن هذا مايخليني انشر التشاؤم او تقليل الفرحة في الاعياد الحالية ابدا
مهما كان فهو يوم فرح للمسلمين

[يمامـة]

مجرد ما تقول عيد تحس بفرحة..

فشي طبيعي لما تتكلم عن أي فرحة بتتكلم عنها بصورة جميلة..

فجيل اليوم مثلا.. لو بيتكلمون عن فرحة العيد بالنسبة للأجيال القادمة اكيد بتكون افضل
اذا حال الناس صار اخس في علاقتهم ابعضهم ابعض..

فالمثل الشعبي اللي يقول جنة من غير ناس ما تنداس( طبعا تعبير عن وجودك مع الناس بحد ذاته متعة)
فتخيل تغيير حال العيد من قبل للحين..

قبل 20 سنة كانت للاشياء قيمتها.. لما كانوا الناس ما يتشرون الا للمناسبات
الحين الواحد يعطس ويروح يشتري له ملابس يديدة.. ولتقى الكباتة مدحوبة بملابس للحين التسعيرة عليها..

فكان ثوب العيد يعني ثوب جديد ما يتكرر الا في السنة مرتين.. ونعال العيد يعني نعال ريحتها ما تنشم الا من عيد لعيد..
وذبيحة العيد يعني الله عيد ذباح وعيش ولحم وجمعة وفالة..

وضعنا اليوم بفضل من الله وكرمه.. كل شي صار متوفر ومن غير.. والشي اللي يتوفر بكثر تعافه النفس..
وضف له التغيير الحاصل في عادات الناس اللي يستغلون إجازة العيد للسفر ومحد يقعد في البلاد..

لذلك أتمنى ان إجازة العيد ما اتطول اكثر من 4 أيام..
وان الدولة تخصص إجازة تسميها إجازة للسفر للي يبي يسافر.. واللي ما يبي يسافر يرحل اجازته
( علي أفكار عجيبة طاقة وطنية مهدرة)