الجمعيات الخيريه ومشاريعها برا قطر

[مضارب دوسري]

اما الجمعيات الخيريه وعملها في داخل قطر
فهي مشكوره قطر الخيريه وراف على حسب ما ارى بنفسي واسمع

شخص ملتزم قطري وكان يشارك في الدعوه ونقل الصدقات
توفي وابناءه جميعهم قصر ولا يملك منزل
ف تكفلت قطر الخيريه بدفع 80% من اجار السكن الى ان يبلغ اكبر ابناءه سن ال18

فهم لهم مشاركات داخل قطر ولكن لا يفصحون عنها من باب ان كثير من الاسر متعففه
فعلى كل محتاج ومعه اثباتات واضحه تثبت حالته ووضعه سواء ايجار او ارامل او ذوي دخل محدود او غارمين وغيرهم يقدم عليهم وهم والله ما يقصرون
وشغل اللجنه وتمديد احيان في الموضوع يأتي من باب ابراء ذممهم فهم مسؤولون امام الله والناس في اعطاء الصدقات للمحتاجين ولذلك يطلبون اثباتات يراها البعض تدخل فالخصوصيه او تمنن او اذلال

فقد مرت عليهم اموور يقشعر منها البدن من ناس لا تخاف الله فلذلك يطلبون اثباتات تؤكد حاجة الشخص المتقدم

[رجل تعليم]

جزاكم الله خيرا وأكثروا من أعمال الخير ما استطعتم والله يكثر من أمثالكم ويرزقكم وبلدكم الشقيق نعمة الرخاء والأمان

[غايه الطواش]

تدرين ليش غايه
لان محد يدري عنهم اصلا
وما راحو للجمعيات الخيريه
مب مسألة ان الجمعيات ما تبي
ومع ذلك معاج حق فيه قصور من الجمعيات

الله يصلح الحال يا اختي

[غايه الطواش]

https://www.qcharity.org/ar/qa/donat...untTypeId=1234

حلو وصلنا خير ودفعنا فلوس الغارمين وعقب؟؟؟ راح يرجع غارم مادام الوضع ماتعدل انا اقصد ان الي عندهم ضروف نساهدهم يسوون لهم مشاريع صغيره تدر عليهم دخل كريم

اجار بيتهم عالي تتفق الحمعيه الخيريه مع ازدان او بروه انهم يستاجرون منهم مجموعه مساكن وتكون حق الناس الاحوج

ريال عاطل عن العمل او متقاعد يعيل اسره ناهله نعطيه محل سوف واقف الوكره الخور سوف واقف ماغيره

يعني نسوي لهم مشاريع مثل مانسوي برا

سداد الدين تفريج كربه بس اذا ماوقفنا على الاسباب وطرق علاجها راج يرجع الغارم غارم

[غايه الطواش]

اللــــه اعجبتني كلمة الجتي .. ادخلتي السرور الى قلبي الصغير..

فشكرا لج

وعودة الى موضوعج..

تساؤلاتج شرعية.. اومطالبات مشروعة ..
المفروض الجمعيات الخيرية تأخذ لها لفة على السجون
وتشوف قائمة الغارمين.. وتكون لها مشاريع داخل البلاد..
خاصة في نقطة الغارمين..

حياج الله اختي الكبيره اليمامه

نورتي

بالضبط ما ذكرتي سداد ومشاريع مش بس سداد

[غايه الطواش]

مرحبا اختي غايه

ادخلي الجمعيات الخيريه عندهم حالات محتاجه مثل ديون او ايجارات او مشاكل ماليه
انا كنت في احد الجمعيات عندي شغله وشفت نفس ها الحالات

وقال لي الموظف ان في شخص الله يجزاه الخير يجي عندهم بين فتره وفتره
وعنده شنطه فيها فلوس ويعطونه الحالات ويقراها ويسدد ويطلع

الله يبارك فيك ويبارك له في ماله

الريال دفع صح والله يزيده
بس هنيه دور الجمعيه انها ماتخلي الغارم او المحتاج محتاج على طول \يعلمونه صنعه يترزق من وراها

[غايه الطواش]

ما اعتقد أن الي يردون فاهمين قصد كاتبة الموضوع هي ماتقصد بس المساعدات المالية وبعد قصدها المشاريع التنموية للجمعيات الخيرية مافي
في الخارج المشاريع بزيادة ولها دراسات جدوى في الداخل ايش اهي مشاريعهم الوقف موجود والزكاة والصدقات متوفرة فوين المشاريع
لأنه المساعدات دون تنمية قدرة الناس على العمل بيخلي المحتاج بس يطلب مساعدة ويكرر طلبها
مثلا هل فكرت الجمعيات الخيرية بقطر توفير اكشاك للبيع تؤجر بسعر رمزي للقطري /ـة ( مشروع )
هل فكرت في وضع مباني مخصصة للدورات لتأهيل المتزوجين ، تعلم حرف يدوية للنساءوالرجال ( مافي )
هل تساعد او تساهم في عمل استبيان يساعد صندوق الزكاة أو الاوقاف في بيان نوع الاحتياجات للأسر القطرية المتعففة وحصرها ( مافي )
هل ساهمت ببناء مساكن للمحتاجين بقطر ( مشروع )

بالضبط مشاريع عشان ماتخليهم محتاجين مره ثانيه ,, مشاريع تحسين الدخل,, مشاريع لحياه كريمه

سداد الدين بس مش حل

لو نفرض مره عليها دسن
تم سداد

نعلمها على مشروع مثلا مشروع طبخ وبيع

نعلمها شلون تشتري الاغراض وفق الميزانيه شلون تبيع بربح , نخاطب الجهات المعنيه مثلا دار الانماء الاجتماعي اذا صارت مهرجانات يشاركونهم معاهم
اذا شي ايفينت فالدوله يخض مثلا ماكولات شعبيه نشركهم
في قسم في وزاره العمل مادري الاسكان ماعرف صراحه مسوولين عن الاسر المنتجه نسجلهم مع الاسر المنتجه

جذيه يعني

[غايه الطواش]

انه الحسد القطري حتى في التبرعات

سمعت عن شخص فاضل توفى العام قبل رمضان الله يغفر له .. كان يذهب يسال بنفسه عن الغارمين ويتبرع بمبلغ لإخراجهم من السجن

وباقي ميسورينا فيهم الخير الله يبارك في عمرهم ومالهم وعيالهم ويرزقهم الجنة بس يحتاجون توعية

فرحت لسماع خبر بناء وحدات سكنية من قبل المتبرع الشيخ ثاني بن عبدالله الله يحفظه في غزة ومؤكد يساعد أهل قطر .. والمحتاج يتواصل مع هذي الجمعيات والله يوفقه

حياك معماري والله هل قطر فيهم الخير والنعم فيهم بس توعيه بسيطه
والله لو يقولون لهم مشروع في قطر حق هل قطر وسكان قطر والمحتاجين في قطر كلن بيفزع وانا على ثقه من هالكلام

[غايه الطواش]

انا عن نفسي ما راح ادفع فلوس حق واحد مدخوله 30-40 ألف وموهق نفسه بديون وانسجن بسبتها

كل واحد يعرف مدخوله ومصروفه قبل لا يروح البنك ويفسفس فلوسه

ملايين المسلمين قاعدين بدون بيوت ولا أكل ولا صرف صحي أولى بالمساعدات

سجون قطر تطلع قصور بالنسبة لبعض الدول

يا اخوي الحسبه ماتكون جيه
مهب كل هل قطر معاشاتهم على 40 و50 ولا كل سكان قطر ولا مواليد قطر
الرافه شوي بارك الله فيك

في متقاعدين لاسباب صحيه مثلا يعول اسره عنده اطفال
الناس على وجه عيد وجه رمضان وجه مدارس والريال دخله 7000 او 6000
تحس تكفي في الوقت الراهن

بعدين اكيد في دراسه حاله يقوم فيها ناس مختصين لا انا ولا انت ندري بالاسباب والمسببات

ماعندي واحده راتيه عالي بيروح الجمعيه الخيريه تعالو سددو ديني

والله لا يحوج كل قطر ي وكل من على ارض قطر

ومافي داعي لمقارنه السجون السجن هو السجن

والحاجه هي الحاجه الله لايحوجناوانا اتكلم عن ناس محتاجه مهب ناس زبايه وراعيه مفوشر وتعنطز

[الزعفراني]

بصراحه ماعرف من وين ابتدي صارلي فتره افكر في الموضوع

كلنا في خير ونعمه والحمدالله ولكن مايخفى عليكم ان في ناس من هل قطر محتاجين وفي غارمين وفي ارامل ومطلقات وفي عندهم مشاكل ماليه

ليش اغلب الجمعيات الخيريه مشاريعها برا قطر , رحت اشهر جمعيتين في قطر مشروع في قطر مافيه , ومكن تشوفون مواقعم والمبالغ المصروفه

والبلادين حتي في كتيباتهم مافي مشاريع في قطر, ياما حريم قطريات وغير قطريات مسجون بسبب مبالغ ماليه بسبب ظروفهم ,
ليش حمله الغارمين ماشوفها الا عند اخونا عقيل الجناحي ,
ليش مافي مشاريع في قطر في بيوت كثيره ايله للسقوط وفيها ناس , طيب مب شرط يكونون قطريين حتى سكان ومواليد قطر لهم حق علينا
كنت اتابع نشاطات الجمعيات , ورحت فعاليه وحده وكانو يتفاخرون بالي انجزوه العام الماضي جزاهم الله خير ,وجزا هل قطر

بس وين الاقربون اولى بالمعروف ,نعم في اسر متعففه بس ترا سهل الوصول لهم , اقلها التنسيق مع اادراه السجون ويشوفون مشاكل الغارمين والمبالغ
الماليه الي عليهم ,التنسق مع المدارس والمشرفات الاجتماعيات ويشوفون حال بعض الاسر

مع احترامي شوفو الجمعيات اغلب موظفينا من وين وشوفو التبرعات ,

مابي امنع او احجب الخير على الاقل 30% من التبرعات لازم تكون مشاريع محليه


خلاص قررت ماتبرع برا قطر , ابي فلوسي داخل قطر ولهل قطر وسكان قطر لكن

شلون !!

السلام عليكم

في شي ناس كثير ما يعرفون عنه بهالخصوص .. الا وهو :

إن المتبرع هو اللي يحدد وين يبي يروح مبلغ تبرعه
إن المتبرع هو اللي يحدد وين يبي يروح مبلغ تبرعه
إن المتبرع هو اللي يحدد وين يبي يروح مبلغ تبرعه
إن المتبرع هو اللي يحدد وين يبي يروح مبلغ تبرعه

يعني انا مثلا عندي 100 ألف أبي اتبرع فيها ، يسألوني في اي مشروع تبي يروح هالمبلغ
اقولهم ابي ابني مسجد مثلا في كينيا .. لذلك انا حددت للجمعية وين ينصرف مبلغ التبرع ذي
وغير كذا الجمعيات ملزومه بتقديم تقرير لي عن هالمشروع سواء في بدايته او لين نهايته

شخص اخر عنده مبلغ 500 الف يبي يتبرع فيه .. يقدر يحدد والله ابي هالمبلغ ينصرف داخل قطر
على الاسر المتعففة ..

لذلك الموضوع كله بيد المتبرع يحدد وين ينصرف المبلغ اللي يتبرع فيه ..

واجب الجمعيات انه تحاول توجه الناس او تحث المتبرعين على التبرع للاسر المتعففة والمحتاجين داخل قطر
واعتقد كل الجمعيات عندها مشاريع للفئة ذي وان كان الضوء مش مسلط على هالمشاريع بسبب ان اغلب المتبرعين
يشترطون ان فلوسهم تروح للمشاريع اللي برا قطر .. لاعتبارات كثيرة ..وقناعات خاصة عند الشخص نفسه

لذلك الموضوع يحتاج وعي من المتبرعين بالفئة المحتاجة داخل قطر .. وكذلك يحتاج جهد تسويق أكثر ورعاية من الجمعيات الخيرية
لحث المتبرعين على الالتفات للفئات المحتاجة داخل قطر


وشكرا