المشاركة الأصلية كتبت بواسطة ya3coub
انا شربت لحد الحين 3 قلاصات تانج مع ثلج و ليلحين عطشان بقولك السبب من الي شفته اليوم بكل بساطة.
طلعت من الفريج و قلت بما اني عالدراجة بستخدم الهايواي و شفت زحمة السيارات من اشارات التضامن لين دوار العلي "الدوار الي بين اشارات التضامن و دوار خميس العبيدلي" مسكر من الزحمة عودت و قلت بروح من الكرنيش
طلعت على اشارات المول سيدا و اشوف زحمة غير طبيعية ايضا و الزحمة استمرت لين عرفت السبب اشارات المطار القديم موب شغالة و الناس و التريلات يمشون في 4 اتجاهات على كيفهم و هرانة و ازعاج, صورت فيديو بما اني عالدراجة و اتصلت فالشرطة و قلت لهم الحين بيصير حادث خشن اذا ما ارسلتو دورية لأن صج اكثر من حادث كان بيصير و سبحان الله بقدرة قادر و انا معاهم عالخط يقولي و الحين قلت له الحين اشتغلت
ولعت خضرا و لفيت يسار باتجاه اشارات عبد الغني الناس من الي صار قبل واقفه و معصبين مناحس غير طبيعي و النفسيات من اسوء ما يكون, لفيت يمين باتجاه اشارات المطار الأميري سابقا الي تكمل لراسبوعبود ثم الكرنيش
انصدم الاشارة تولع و تبند من الزحمة و انا عالدراجة موب قادر اوصل لها "اشارات المطار الأميري سابقا (دوار الساعه)"
طبعا تزرق بين السيارات يمين و يسار لين وصلت راس بو عبود و كملت على الي بعده و لين اشارات سوق واقف الشارع واقف بمعنى الكلمة بعد اشارات سوق واقف و الديوان فتح شوية و كان في شوية مسافه
لأنصدم الاشارة الي بعدها اشارات المسرح عليها زحمة غير طبيعية و دوريات و كرين شايلين الأشارة بكبرها و الشارع من مسار إلى مسارين و المشكلة الزحمة من بعد هالأشارة اكثر من الي قبل من السفارات إلى لوسيل ريس كامل و الحمد الله وصلت دوامي
كل هالأكشن خذ من وقتي الله يسلمك طلعت من البيت 8:00 بالظبط و وصلت دوامي 8:54