السلام عليكم ورحمة الله وبركاته
كنت قاعدة مع اختي شوي الا يجيها بروكاست محتواه في حفلة بتكون في بيت فلان ابن فلان ..!
التفت علي تقول فيه اوبن بارتي يوم الجمعة يلا خلينا نروح ..!
رديت عليها استفسر من الحفلة وشنهي المناسبة .. قالت هذي حفلة البنات هابين فيها Just for Fun !!
طيب يمه تعرفين راعيه الحفلة ؟؟ .. ايه فلانه الفلاني .. قلت مامر علي الاسم ؟؟
قالت تصير بنت عم فلان ابن فلان (ذكرت صلة القرابه ) .. قلت طيب طيب عرفتها ونعم البنت ..!
المهم رحنا
الحفلة طبعاً في بيت .. مظاهر حفلة عادية .. بوفيه .. كراسي .. طاولات .. ستيج مضيء .. دي جي ..!
قعدنا وكنا تقريبا اول الواصلين .. الوضع كان طبيعي .. بعد فترة .. زاد عدد البنات .. كثير منهن بويات ..!
بنات شبه لابسين .. ( بعض التجاوزات الاخلاقية ) .. !
طيب وين الاشكالية ..
ثاني يوم فالدوام .. اقول لاحدى زميلاتي عن الحفلة وعن بعض الامور اللي ماجازت لي ..!
ملخص النقاش ..
الحفلة تصير كالتالي:
تتبرع وحدة من البنات وتسوي حفلة (في بيتها) .. تكتب برودكاست .. تطلب من القروبات يتداولونه ..!
يتحدد فيه لوكيشن البيت .. المعازيم بعضهم مجهول الهوية ( يعني مافي معرفه مسبقة بينهم وبين راعية البيت )..!
ضحك .. وناسة .. رقـ ... وبعضهن يجي عشان تطلع مع شاب .. تضبيط بويات ..
اغلب هالنوع من الحفلات يكون في مناطق او بين عوائل محافظة ومايسمحون لبناتهم مثلا يطلعون مجمعات ..!
فاللي يصير التالي ..
بنت اهلها مايسمحون لها تطلع مجمع فـ مجرد ما تبي تسوي حفلة في بيتها وبين بنات مايرفضون اهلها ويرحبون بالفكرة ..!
وغالبا الامهات مالهم بارض ينزلون يراقبون الوضع ..
تنزل تسلم على كم بنت اول الحفلة وعقب تغيب ولا تدري شيصير عقب ..!
وايضاً بنت اهلها مايرضون تطلع مجمعات
ف مجرد ما تقول حفلة في (( بيت )) يوصلونها وهم مأمنين عليها لانها في بيت ..!
وجهة نظر شخصية ..
طبعاً انا مب ضد حفلات البنات وايضاً ضد حرمانهم من الطلعات العادية مجمع .. مطعم (تحت رقابة الاهل)..!
لكن اذا حصل وصارت حفلة تحت اصرار البنت اتمنى تواجد امها او خالاتها او حدى الحريم الكبار ..
ويراقبون الوضوع بشكل مستمر مب بس تنزل اول الحفلة وتختفي ..
للامانة في امور اخرى تصير لكن ماقدر اذكرها ..
الموضوع تنبيهي لكن ما يعني نحرم بناتنا ولا نسكر عليهم ونمنعهم من الطلعة والدخلة ونضيق عليهم ..
(( حرصوا .. حرصوا .. حرصوا .. على بناتكم وراقبوهم ..))
وترى مثل هالحفلات انتشرت بشكل كبير الفترة الاخيرة لذالك وجب التنبيه ..
أعتذرت على الإطالة ..
والله يهدي بناتنا ويصحلهم ..
|
رد مع اقتباس
المشاركة الأصلية كتبت بواسطة شبح الصمت
