المراكز الصحية الاولية ... رسالة للقائمين عليها

[$الملياردير$]

السلام عليكم و رحمة الله وبركاته ... كثر تذمر المراجعين عامة و المواطنين خاصة من طريقة التسجيل الغبية في العلاج لدى المراكز الصحية و التي يتوجب على المريض أخذ موعد عن طريق الهاتف قبل الحضور وطبعا بعد الاتصال لأتجد موعد قريب ... طبعا اغلب الاجانب عندهم تأمين و العمال تنزلهم الباصات في الطوارئ يعني اكثر المراجعين هم مواطنين .... رسالتي هي ترى مب عيب تتراجعون و تقولون ان النظام اثبت فشله بعد تطبيقة ... و الا بيصير علينا فرض نفس تجربة المدارس المستقلة .... الوقت الذي يقضية المريض و الدكتور و الممرضات طويل جدا ... الكل يشتكي يوميا نرى نقاشات حادة بين المراجع و الكونترات الأمامية في الاستقبال مع عدم وجود مهنية ومبادئ خدمة العملاء من قبلهم ... و المضحك لما تقولك روح حاول تكلم الدكتور تقنعة يستقبلك ... على أساس ان العيادة خاصة .... عجبي

[$الملياردير$]

اعتقد انه من المفروض ان المراكز الصحية الاولية لديها الحرص على العمل بجودة مخرجات اعلى بكثير من الموجودة حاليا وذلك لانها تعمل بدون ظغط و بدون حالات مستعجلة ويجب ان تقدم الخدمة فيها للمواطن بطريقة اعلى جودة من الحالية .... كما يقدم مركز طوارئ السد للأطفال

[لبيبة]

وعليكم السلام ورحمة الله وبركاته،

الاتصال لأخذ موعد مب إلزامي، تقدر تروح تقابل الطبيب من غير موعد في المركز الصحي،

لما قرروا نظام الاتصال لأخذ موعد صار تذمر وايد وتراجعوا عن قرارهم وخلوه متوفر للي يبي يتصل.

[$الملياردير$]

من نصف ساعة مركز مدينة خليفة مرجعين زوجتي ... عشان ماعندهم موعد ... و الحريم يتهاوشون في جهة استقبال الحريم ... وكان الجواب انتي ماعندك موعد مسبق ... هذي الحادثة من شوي الساعة 11,30

[معماري قطري]

يا ليت الغباء يوقف هنيه

تعال شوف مواعيد حمد والأسنان

طلبت تحويل حق حمد عن طريق الطواريء وكنت اشكي من انتفاخ في تكرم القدم وعندي السكر قوي ووديت تقارير مفصلة وطلبت العناية بالقدم .. وطلبت فحص شبكية العين هذا من بداية 9 وقبل يمكن من شهر 8 طلبت موعد للأسنان لعلاج اللثة وزين حددوا لي موعد صح .. بس علاج لثة غير لازم تاخذ موعد وتنتظر .. عطوني لعلاج العصب ومع الانتظار خف الألم

زين عندهم فاتحين يمكن 5 أقسام للعلاج وكل قسم مختص في شيء .. التصوير في جهة وغير كل قسم في جهة والتصوير سريع وبتحويل مباشر بالكمبيوتر .. لكن مواعيدهم لو تحولت من قسم لقسم لازم تروح كاونتر القسم اللي تحولت له .. وبين كل كاونتر وكاونتر يمكن في بعض الأحيان ممر بسيط أو دور كامل .. بعض الكاونترات خالية يقولون لك انطر شوي بتجي الموظفة والموظفة تسولف مع زميلات الكاونتر الثاني

إستغربت من التعقيد .. الكمبيوتر يفترض يسهل الشغل ما يعقده .. لو عدد الموظفات للأقسام 10 حق كل كاونتر ثنتين يدمجونهم في كاونتر المدخل أفضل والمواعيد تكون أي وحدة تقدر تعطي حق كل الأقسام والجدول ينزل على السيستم وسهل كل شيء يبين ويكون واضح

نرجع لمستشفى حمد .. قالوا لي موعدك التاريخ الفلاني بعد شهر ونص تقريباً .. رحت عيادة السكر قالوا لي لا هذا تحت في العيادة العامة .. قلت كل هالانتظار علشان اشوف دكتور عام المهم رحت له وما قصر حولني وبعد الموعد بعد شهرين .. كلموني العيون وقالت لي موعدك الوقت الفلاني قلت فحص قاع العين .. قالت لا عيون عام .. قلت انا جايب تقاريري وطالب قاع العين .. وبعد صراع وأخذ ورد قالت زين بنقرب موعدك وهناك قول لهم وعطتني في 5 11 .. يعني المريض أوقات ما يقدر يصبر والمفروض يقللون اجراءاتهم ويسوون شغلهم كامل أو أكثر ما يمكن .. هذي الإجراءات العقيمة تاخذ وقت المراجع والطبيب وتسوي ضغط على كل شيء

الطبيب العام مال الطواريء هشكل استوى دوره دور ممرض أو حتى كاتب

[$الملياردير$]

اللي أقصده ان الخدمة لازم تكون اعلى جودة من اي مكان اخر في الصحة بحكم ان الرعاية المقدمة لحالات عادية ومحصورة بكل منطقة تابع لها المركز الصحي

[معماري قطري]

واحد من شيابنا عرف لهم لين بغى موعد أو شيء اتصل بالاسعاف يوديه وشغله يتم أول بأول وبسرعة

[$الملياردير$]

للأسف يا يرجعون التأمين بأسرع فرص عشان يقل الظغط ع المراكز و المستشفيات الحكومية ... يا تعمم تجربة فصل القطرين في المراكز الصحية و عيادات حمد ... كما هي التجربة في طوارئ السد للأطفال .... و لاحد يقول عنصرية تعبنا و الله .... روح الاهلي و عيادة الدوحة وشوف نوعية المراجعين التي كفلت لهم أعمالهم التمتع بخدمات طبية بغطاء تأميني ..... عجبتني اخر كلمة غطاء

[شيخ الديرة]

مؤسسة حمد حالها حال اي شركة احتكارية، اللي ما عاجبه خدماتنا ،لا يجي.

اما تتحول مستشفيات حمد الى شركات خاصة تتبع لمؤسسات صحية معروفة دولياً، ضمن شروط وضوابط تضمن خدمة على مستوى عالمي، وتكون هناك تنافسية بين الشركات

او استحداث جهة رقابية تتابع اداء هذه المؤسسة وتأخذ بنظر الاعتبار الميزانية المتاحة لها

[Riku3]

من كم شهر كنت ماخذ موعد كنت ابي استفسر عن دواء من الدكتور وما كنت مريض .. خذت موعد بعد صلاة الظهر .. رحت عندهم وبعد قياس الضغط (هذا وانا اقولهم مافيني شي) ..

تنقعت عند غرفة الدكتور وهو مب موجود قريب النص ساعة انتظره .. في النهاية رحت ادور عليه ولما حصلته قاعد يسولف مع دكتور ثاني الا يقولي انا طفيت الكمبيوتر !! .. حظه اني مب مريض وبس كان عندي استفسار وطبعاً ما قالي حياك المكتب ولا شي .. خذ استفساري وجاوب علي وهو ماشي يبي يطلع صوب سيارته ..

بس الشرهه علي انا الي اروحلهم .. في العادة اتصل لو الدكتور الي دايم اروحله موجود اروح واقط وجهي بدون موعد عنده .. بس هالمره قلت امشي على النظام وابتلشت بواحد "بلطقي" لابس بالطو دكتور حتى مايعرف يجاوب على سؤال بسيط .