تعيين عبدالله بن حمد العطيه رئيس هيئة الاشغال العامة

[معماري قطري]

لا ننسى ان الوقت يمر ونحن نتفادى الاعتراف بان المقاولين المحليين لا يمتلكون الخبرات او القدرات الحقيقية لتنفيذ مشاريع مستدامة او عالية الجودة، ناهيك عن انعدام الحس المهني لدى موظفيها والتركيز على افتعال مشاكل تضمن ديمومة توظيفهم

المقاولين المحليين يشتغلون بالباطن تحت العالمي والعالمي كفيله ياخذ أكثر من نص الكعكة ويسوي أقل ما يمكن من الشغل .. من هشكل تشوف ميزانيات مهولة حق شغل ما يرتقي بالمطلوب وتشوف الكعكة كبيرة لأن المعزومين وايد

لو أشغال تغير سياستها وتتغير سياستها صح صدقني في سنتين بتنحل كل مشاكل الطرق وبرخيص وكل مشاكل الصرف الصحي وتصريف الأمطار حلول جيدة ومراعية للبيئة .. يبي لها تضحيات كبيرة وقوانين قوية والتزام بالعمل الصحيح مب لف ودوران عليه

[معماري قطري]

مشاكل المباني اللي تسرب مياه حلها سهل أيضاً ورخيص ولو ما تم بسرعة بنخسر مباني كاملة وتآكلها بيستمر مع كل مطر وكل شتاء

استلمنا مباني قديمة واستلمتها جهة هندسية من جهة حكومية وكتبت الجهة الهندسية تقرير إن المباني آيلة للسقوط بسبب قدمها ولعدم وجود أساسات مناسبة وموضوع إنشائي طويل .. والمباني من دور واحد ومهملة .. عاشت 25 سنة بعد التقرير الفذ وهي مهملة وطاحت طابوقة من سقف الهوردي فوق .. وأُرسلت للمعاينة وكتابة تقرير .. المباني من أفضل مايمكن وليست خطرة فقط سوء العازل المائي فوق واهمال صيانته السبب .. كتبت يحتاج لصيانة والصيانة ممكنة ورخيصة مقارنة بالهدم والبناء مرة ثانية .. زعل المسؤول وكان يبغي يهدم قلت له القرار في يدك تقدر تسوي اللي تبي بس مسؤوليتي اقول الحق وتمت الصيانة بترقيع بسيط .. وتم توسعة المباني بالبناء حولها بعد بطريقة ركيكة والحمد لله للحين عايشة بعد يمكن 15 سنة من زيارتي

[معماري قطري]

مرة مبنى كبير ومكلف وبارتفاع عالي .. نقدر نقول قاعة بحدود 30 متر في 15 متر .. بدأ السقف تطيح منه قطع خرسانية .. وكنت قليل خبرة وقتها وأُرسلت بعد للمعاينة .. بس بتوفيق من الله سلمت فايل صيانة المبنى واطلعت على أوامر الصيانة .. المبنى كان يسرب بسيط ومسؤول الصيانة أمر بإزالة العازل بالكامل وتغييره

بقى حول 3 سنين بدون تغيير عازل وبسطح ينقع عليه المطر ويتسرب براحته ويخرب الحديد .. لدرجة إنهم أخلوا المبنى وبدت تطيح منه قطع كبيرة وجابوا مختبر يفحص قوة الخرسانة .. في بعض المواقع ينزل تراب ولا قدروا يسوون الاختبار يعني النتيجة قريب من 0 وبعضها 5 كيلونيوتن في المتر المربع وبعضها حول هالرقم وما تزيد عن 15 .. وكانوا عمال يرقعون في الحديد وينضفونه والحديد منتهي

الحلول ممكن عمل دعامات ثانوية وبناء سقف حديدي تحته لكن هذا غير مقبول لأن القاعة استخدامها بدون أعمدة .. أو الهدم والبناء مرة ثانية .. بس الأسباب كتبتها واضحة بأنه سوء صيانة وإهمال من المسؤول لفترة طويلة .. سبب واقعي وواضح لكن مسؤولي حبيب مسؤول الصيانة ولا رضى بتقريري وكان يبيني اكتب حل هندسي ينقذ المبنى واكون مسؤول عنه ورفض يمشي التقرير وكنت طيب سكتت لو الحين كنت رحت للمسؤول الكبير

نفس الوضع عاينت مبنى من أيام الانجليز هم بانيينه .. صغير وبنوا عليه دور ثالث .. المبنى بالنظر تشوفه تقول من أقوى وأفضل المباني .. فيه شلخ كبير يتصلح وفي الطابوق مب مهم وخرساناته كلها جيدة .. فيه شوية كسور في بلاط الدرج ويقولون يخر .. مسؤول المبنى صار بيني وبينه نقاش ويحاول يقنعني بأمر الهدم وبتقرير مني .. قلت له لو تحب تهدم حق بناء ثاني قولها صريحة واطلب الهدم لكن انا اقول ما يصلح لا انا اعطيك بعد 30 سنة أقل شيء والصيانة ضرورية .. قال لي تشوف الشلخ ذيه .. فجأة استوى جدامنا واحنا قاعدين .. رحت لمسؤوله وقلت له شصار قلت له يا اخوي رفيجكم يصبغني وكلامه ما ينصدق .. راح واتصل به على الانتركم وقال له اسمع شيقولون عنك وناداه .. عاد خلاص شوي قوى الويه وقلت له مستحيل اصدق شلخ مستوي مع مرور الزمن وبالتدريج وصار له سنوات .. إستوى من يشوفني يتذكر السالفة .. وبعد حول 5 سنين طلبوا هدمه وبنيان مبنى غير مكانه وأكبر وصار

[معماري قطري]

إخوي بو فهد أشغال مدججة بالاستشاريين الأجانب والخبرة ومرصودة موازنات كبيرة للتصميم وللاشراف على التنفيذ

القصور مب بس في تجمعات المياه في أُمور كثيرة .. وصراحة انا ما الوم أشغال بنفسها .. ألوم جهات كثيرة وكررت هالكلام مرات ومرات .. دخلت المواقف اللي تحت الأرض صوب حديقة الشيراتون وفي البريد .. كتمة وريحة دخان السيارات وحر كان في مواقف الشيراتون دخولي في نهاية الصيف وليل .. الحديقة جميلة ومرتبة بس ممراتها ما تعطيك امتداد بصري وكأنك تمشي في دواعيس والهواء ما تحس بحركته

المشكلة مستمرين في هذا النمط من البناء ولا ادري شالحلول اللي بتنضاف هل هو تكييف فعال وسحب للهواء الملوث وعادم السيارات .. أم بيسوون مستشفيات خاصة للرئة للي مثلي .. حطيت قبل صور حق مواقف متعددة الأدوار وحتى فيها زراعة في الأطراف ومفتوحة للهواء من 3 جهات أقل شيء وهذا غير عن الدول اللي فيها هذي المواقف سياراتها وبترولها وديزلها أنظف من اللي عندنا وملوثاته أقل وفيه عادم يمنع ويمسك كثير من هذي الملوثات

نرجع حق طرقنا وواضح لي إن كثير من الجديد منها لن يصمد كثيراً وغالبيتها شفنا شلون تحتاج لتعديلات جذرية وهي توها مبنية .. المطر سبب واضح بس اتمنى تنعمل دراسة مستقلة من مختبر ومكتب هندسي يوضح حالة هذي الطرق والحلول المناسبة لتمديد عمرها وما هو عمرها الافتراضي

غلطت هنا قلت البريد والمقصود المرور

البريد مبناه من أرقى وأفضل المباني لكن أهملوا صيانته فترة طويلة وتسرب الماء للأعمدة الطويلة واضعفها وخطر الانهيار موجود خصوصاً للمواقف

صيانتها سهلة وغير مكلفة ( يفترض ) والمفروض الصيانة تتم أول بأول وبتغليف خاص وتقوية للأعمدة أو بتضخيمها والبناء حولها مع تدعيم إضافي للأرضيات للمواقف وعزل عن تأثيرات المطر .. يحتاج شغل سريع ومحسوب حتى يحافظ على عمره وعلى الجمهور

[بنت شرق]

المعماري ما شاء الله خبرة ، إذا ممكن استشارة لأول مرة يحدث عندنا أن توصيلات الكهرب جهة سويش الليت تخر اشلون بتكون الصيانة

[معماري قطري]

المعماري ما شاء الله خبرة ، إذا ممكن استشارة لأول مرة يحدث عندنا أن توصيلات الكهرب جهة سويش الليت تخر اشلون بتكون الصيانة

مشكورة إختي على الاطراء وعلى طلب النصيحة

العادة تمديد الليتات يكون في أسفل صبية الأسقف .. ولو وصل ماي معناها فيه فجوة في السقف تشبعت ماي وحصل له مجرى سهل مع الكهرب لين وصل السويج وهذي مشكلة خطرة لو حصل التماس .. الماء موصل للكهرباء

أحياناً يكون السقف ناقع ومسار الماي يدور أي ثغرة سهلة يمشي فيها وإحتمال البايبات اللي فوق مرتفعة ومنفكة ويدخلها الماي .. شوفوا فوق لو فيه بايب بارز ولو البيت قديم وله فوق 15 سنة لازم تعملون عازل جديد

للبيوت العازل الجديد سهل ينعمل فوق القديم .. شوفي المسند عندهم مهندسين عزل جيدين والا تدمر ولا تهملون أول بأول

[معماري قطري]

ما فيه انسان معصوم عن الخطأ بس كل انسان عنده القدرة على الدراسة وتمييز الأخطاء وتفاديها والاستفادة من تجارب الآخرين

أتمنى أشغال تقتنع بهذي النظرية وما تهمل اصلاح أخطاء الإدارة السابقة

[المزن الرياني]

الله يوفقه .. وراه تركه فساد واهمال وهدر للمال العام كبيره جداً

[معماري قطري]

اللي جرب مواقف مبنى البريد المفتوحة والمتعددة الأدوار بيعرف الفرق بينها وهي مهواة جيداً وبين المواقف الغالية تحت الأرض المحكورة واللي مؤكد بتشهد مشاكل كثيرة وعمرها الافتراضي أقل

[mubarak750]

لماذا فشل رؤساء هيئة أشغال السابقين ؟!
أظن السبب يكمن في :
() التراخي في مواجهة أخطاء الأعمال التنفيذية وعدم اتخاذ الإجراأت التصحيحية بشكل صارم .
() غياب الحزم والحسم بسبب ضعف الشخصية والتجاوز عن الأخطاء ..
وتلك الملاحظات تتبينها في المشروعات تحت التنفيذ التي يطول تنفيذها ، فقد تندهش عندما ترى عدد لايكاد يُذكر في أغلب المشاريع تحت التنفيذ من العمال والمشرفين ومن يريد التأكد من صحة الملاحظة فليشاهد تلك المشاريع التي تكاد تخلو منهم ..!
وربما هذا دليل على التراخي اللامسئول الذي تشهده البلاد وتسببت في إرباك حركة المرور التي لا نكاد أن ننتهي من غصة مرورية حتى تبتدء التي تليها ..
الشدة والحزم والصرامة كلها أدوية لمعالجة هذا الخلل الذي أدى الى الإزدحام الشديد ..! وتبقى مسئلة التخطيط الهندسي الجيد شأناً أخر يضاف سبباً أخر إلى تفاقم مشكلة الإزدحام .

أتفق معاك بس حاب أضيف شغله: