انتشرت في الفترة الاخيرة ظاهرة الفاشنيستات بشكل كبير جدا وواسع ، والفاشينستات للي مايعرفهم هم هم أبطال مواقع التواصل الاجتماعي الاشهر عالاطلاق السناب والانستغرام .وهذا المعنى من العم جوجل الفاشنيستا هي الفتاة المتذوقة لعالم الموضة بعيداً عن هموم وغموم السياسة والاقتصاد والحسرة على انخفاض أسعار النفط المتهاوية .للعلم هذا من احدهم الله يعطيه العافية .
نتصفح الانستغرام وغصب علينا نشوف في التايم لاين الفاشنيستا المشهورة فلانه تروج لقطرة عين تطول الرموش ، والفاشنيستا الثانية اللي تروج لفيتامينات لتطويل الشعر ، وفاشينيستا اخرى تروج لفيتامينات عناية بالوجه .
وحتى اكون صريحة معاكم عندي بنت مراهقة متابعة لهالفاشينيستات وتضغط علي بشكل كبير انها تشتري المنتجات اللي يروجون لها الفاشنيستات ، وطبعا الضغط ينتج عنه إني ارضخ في أحيان كثيرة في حدود طبعا ، باقولكم تجاربنا كنوع من التحذير والتنبيه :
من فترة بنتي تحن علي تبي تشتري فيتامينات خاصة بالشعر ، طبعا عرفتها عن طريق وطبعا عقب ماقصرت عمري بالحنة جبتها لها وبعد فترة الله الهمني اقرأ عنها ولقيت واحدة من الفاشنيستات حاطة تجربتها وانها اصيبت بالخبيث بعيد الشر عن قلب امة محمد من استخدام هالحبوب ، وتميت ابحث لين حصلت اكثر من واحدة نفس الاعراض ونفس المرض وطبعا وقفت لها الحبوب ، وبروحها فهمت وعرفت ، بعدها بفترة حنت على تبي فيتامينات للشعر وطبعا عن طريق احدى الفاشنيستات وهالحبوب لها صيت كبير ومشهورة وانا اعرفها بحكم شغلي ، وجبتها لها وحسيت انه في شي في بنتي تغير وطلبت لها تحليل وتبين انه رفع نسبة الزنك عندها وهالشي سلبي ويكون منذر بسوء وقفتها لها بعد وحرمت عليها اي فيتامينات لين اتفحصها عدل وتسوي التحاليل اللازمة ، هاي تجربة ثانية
التجربة الثالثة طلبت مني قطرة تستخدم لتطويل الرموش ، قلت ياللا استخدام سطحي وخارجي ماراح يتأثر الجسم ، وانا اللي جبتها لها وكانت كله اوت اوف ستوك وطبعا عن طريق الفاشنيستات وجبتها وقلت انا باستخدمها وفعلا استخدمتها على سطح الرمش ، يومين حسيت بحكة وتحول بياض عيوني لاحمر استغربت في البداية وعقب عرفت ىانه من القطرة وشفت نفس الاعراض مع بنتي مع ضبابية في الرؤية وقلت لها وقفيها فورا ، ويوم قرأت عنها عرفت انها تستخدم لعلاج المياه الزرقاء ومن اعراضها الجانبية انها تنبت الشعر في الرمش وتسبب الأعراض اللي قلتها وهي الاحمرار والحكة وضبابية الرؤية.
طبعا هذي تجارب كبيرة ومخاطر عظيمة غير الأشياء الخفيفة واللي تأثيرها قد يكون عالمدى القصير لكن عواقب تبين بعدين عالمدى الطويل
المراد لا تصدقون الفاشنيستات ابدا ابدا ابدا هم ياخذون فلوس على ترويجهم هذا ومهما كانوا واثقين من المنتج احذروا ترا الصحة ماتتعوض ، وبنتي حذرتها والحين لو شنو يصير ماتستخدم الا الماكياج وهالخرابيط العادية اللي ماتأثر عالصحة
وتنبيه ثاني دائما تأكدوا من جودة المنتج وانه أصلي ترى الفيتامين المشهور مال الشعر اللي يدش بكميات خيالية البلد اغلبه مضروب وينصاد وينعدم ، يعني خسارة فلوس بس ، تاجرات يهمهم الفلوس بس والا المصداقية صفر خذوا المنتجات من مواقعها الاصلية والموثوقة واللي اساسا مصرح عنها في هيئة الغذاء والدواء الامريكية fda
ولكم مني أجمل تحية
|
رد مع اقتباس
المشاركة الأصلية كتبت بواسطة شبح الصمت
