السلام عليكم
الرخمه هو طائر مذموم وتطلق العرب ( المجتمع الخليجي بالذات) هذه الصفة كناية عن الشخص البليد.
وخلال 10 سنوات , غيّرت الماديّات شكل حياتنا الاجتماعية ولاحظت القيادة السياسة الأمر وفرضت قانون (الخدمة الوطنية) واللي هو معايشة أوضاع صعبة لمدة (3 أو 4 شهور) وبعدين ترجع لحياتك الطبيعية !
القائمين ع القرار (حضرهم شئ وغابت عنهم أشياء )
جُزئيات وتفاصيل بسيطة في حياتنا تبني أفكارنا وترسم ملامح شخصياتنا وليست الشهور الاربع كفيلة بتغيير نمط حياة أو تفكير شخص.
مواقف
قدام بقالة الحي/الفريج , ولد صغير (ملمم) مع السايق وكل شوي يتمغط لـ الهرن عشان العامل يطلع له دون مبالاة للتلوث السمعي اللي أحدثه. الدُب عجزان ينزل بنفسه عشان يعبّي كيسته نوتيلا .وهذا مربع أول في تعليم الرخامة
الأم
في مول قطر تستمتع بالعروض الترويجية ووراها خدامات (كنهم تالتبيز) وحده ثوبها أصفر ووحده وردي ووحدة أخضر ! الأولى للبنوتة والثانية والثالثة بروتوكول فقط لا غير! ويش في ظنك تصنع هذي الشكليات في نفس الأطفال غير الرخامة والهياط
الأب
يقلط عليه الضيف بعد صلاة العصر للقهوة ولاهو بمكلّف نفسه ( يزهم البيت بقهوة ) الا بالجوال ولا يبي يشلها ولا يبي يصبها ولا يخلي الولد يصب وكل هذه المهام عند (عليم السايق) واخر شي يتحندى ويقول "الجيل هذا ما تعلّموا السنع".
والمواقف كثيرة ولكن كل شئ من حولنا مالنا فيه فضل والفضل فيه لـ الفلوس, أتمنى استدراك بعض التفاصيل والمبادرة بمكافحة بعض الشكليات لأنها مشكلة.