السلام عليكم ورحمة الله وبركاته
موضوعي عن كارثه كانت بتصير في حديقة برزان لولا عناية الله سبحانه...
أكيد تعرفون اللعبة الي كأنها متاهه الي فيها زحليقه وكور وموجودة في كل مجمع، انا دايما أخذ عيالي يلعبون في الحديقه ومع الأسف هذي اللعبه مايكون عندها سكيورتي، علشان جذي ادخل معاهم داخلها واراقبهم بغظ النظر معاي خدامه لهم او لا لأن الواحد مايدري شنو يصير في هالدواعيس اللي في اللعبه ، لو ياهل يصير عليه شي فوق والله محد درا عنه، المهم انا كنت انتظر عيالي يتزحلقون وكان في حدا الزوايا الي وراي من فوق ثلاث اولاد تقريبا أعمارهم بين العشر و اثنعشر سنه، سبحان الله انا التفت وراي وشفتهم الا كانو يشبون فاين ب الولاعه وكبرت النار شوي وطفوها بسرعه وانتبهو أني شفتهم وشردو، وبسرعه طلعت عيالي والحمدلله في يهال انتبهو وقامو يصرخون في اولاد يشبون نار في اولاد يشبون نار والكل قام يطلع بسرعه من اللعبه. يوم تاكدت ان اليهال طلعو، قعدت أتلفت وشفت نفس الثلاثه قاعدين عند ثلاجة الماي مال الشرب ورا المصلى ونفس الشي يولعون في الماي ويوم شافوني جايه صوبهم خشوها.. ويوم سألتهم عن الي سووه انكرو، قلتلهم صبرو،و قعدت أدور سكيورتي حولي مالقيت، خليت حدا الخدامات الي واقفين مع عيال معازيبهم ينادون السكيورتي الي عند الباب ويوم وصل ماعرفت شلون صرخت عليه بدون احساس من الحره لان مافي مراقبه على هاللعبه، رد علي وقال احنا مانراقب اهنيه، المهم تجمعو اليهال والكل شهد ان هالثلاثه فعلا شبو النار في اللعبه وصرخ السكيورتي عليهم وقال لهم طلعو الولاعه بسرعه وطبعا قالو قطيناها ، قلتلهم عطوني رقم أمكم ولا أبوكم طبعا خافو الي قال ماعرفه والي قال ماعندي رقمهم ، المهم قلتلهم اذا ماطلعتو الولاعه الحين بتصل حق الشرطه وبيودونكم الأحداث ، واحد منهم خاف وراح جابها لأنهم قطوها في الشارع من ورا السور. وعقب السكيورتي خذ الأولاد ووداهم عند الباب وطلعهم من الحديقه.
الخلاصه.. من المسؤول لو ماطفت النار واحترقت اللعبه باللي فيها،، تعرفون هذا النوع من الالعاب مصنوع من البلاستك وفي دقيقه بيولع.
كيف مافي سكيورتي عند هاللعبه نفس الألعاب الي في المجمعات، ولو ان الي في المجمعات الله بالخير مايدرون وين الله حاطهم سوالف مع الخدامات ولا يدرون عن اليهال.
انتي يالام اذا في مجمع شلون تدخلين عيالج مع الخدامات في هاللعبه وتروحين تتسوقين ولا السينما ولا لأي سبب كان .. والله شوف عيني الخدامات معاهم يهال سنه وأقل بعد حاطينهم مايدرون عنهم والخدمات عالفيس بوك ولا تصور ولا مع تجمع الخدم كل وحده تعرض الي في تلفونها.
الحمدلله انا مع ان الواحد يودي عياله يلعبون ويستانسون بس بدون إهمال.. يعني مافيها شي اذا دخلت هاللعبه مع عيالي عالاقل بيكونون جدام عيني حتى لو معاي خدامه بالعكس اذا انا ماقدر اروح فوق بخليها هي تروح بدالي وانا انتظرهم تحت. خاصة لعبة المتاهه الي في قطر مول الله ياكبرها الله يستر على اليهال فيها ولو انها غاليه حرام 60 على كل ياهل.
ياليت كل واحد يقول رايه في هالموضوع هل اللي انا سويته يكفي ولا كان لازم اتصل الشرطه ياخذونهم ويبلغون اهاليهم ..والله يحفظ عيالنا وعيالكم.
|
رد مع اقتباس
المشاركة الأصلية كتبت بواسطة الشفق الحالم
