دعوة لمقاطعة المطاعم ذات الأسعار المرتفعة

[مخطط قطري]

ممكن اعرف اي مطاعم تقصدونها غاليه انا انا دايمن ف مطاعم الفنادق 5 نجوم ومطاعم الًؤلؤه عمره مامر على مطعم غالي الاسعار جدا مناسبه ومعقوله بعضها يستاهل والبعض الاخر مايسوى،،،،،
الي يستاهل انا دايمن فيه ولا اعتقد بقاطعه
يعني انا استوعبً مثلا مطعم مشهور واكلهً ناطع وفيه لذه اغلى من الفنادق ال5 نجوم لانه يستاهل
بس مطعم اكله الله يعز النعمه فاشل ومايبقى وجامع الطالح والصالح هذا يستاهل المقاطعه مب عشان سعره عشان جوده الطعم،،،
يليت الي يشوف مطعم غالي بنسبه له يقولنا اسمه لانه مثلا مطاعم كتارا كلها اسعار رمزيه اشوفها سكر باشا واللبناني مادري الفلسطيني الي هناك مايحضرني اسمه وزعفران ولوزار وغيرهم كلهم اسعار منخفضه جدا
اللؤلؤه اسعار عاديه الفنادق كلها بعد ووين المطاعم الغاليه علمونا!

[مخطط قطري]

ما له داعي نجرب كل مطعم جديد، خاصة المطاعم غير المعروفة اللي تضرب أسعار خيالية.
شخصيًا عندي قائمة مطاعم أكلها ممتاز وأسعارها مناسبة جدًا، فرايديز، آبل بيز، ناندوز، باندروزا، تشيليز، المجلس، فينيسيا، البيت الكويتي.
جربت غيرهم وصارت عندي قناعة أنهم الأفضل، والوجبات اللي يسويها غيرهم بـ 250 يسوونها أحسن منه وبأقل من 100 ريال، مثال بسيط للفرق، 2 ستيك في فرايديز، الفاتورة: 160 إلى 180 ريال، 2 ستيك في تشيز كيك فيكتوري، الفاتورة: 290 إلى 310 ريال! فرق معتبر بالنسبة لي، والفرقية أخليها لشي ينفعني ولا أدفعها عشان "شو".

اتفق معاك في موضوع تشيز فيكتوري طعمه دون المستوى بس سعره عادي مش غالي يعني مستحيل ارجع اكل فيه لانه طعمه اقل من عادي

[naklan]

كل واحد عقله في راْسه
وحلاله في جيبه وما حد وصي
على الناس*

[naklan]

اتفق معاك في موضوع تشيز فيكتوري طعمه دون المستوى بس سعره عادي مش غالي يعني مستحيل ارجع اكل فيه لانه طعمه اقل من عادي

مطعم جيز كيك تعبان وما يسوى
جربته في لوس انجلس اغتريت المطعم بالحجز وطابور طويل
وبعد ما جربته ما عجيني اكله وغالي على الفاضي

[معماري قطري]

مطعم جيز كيك تعبان وما يسوى
جربته في لوس انجلس اغتريت المطعم بالحجز وطابور طويل
وبعد ما جربته ما عجيني اكله وغالي على الفاضي

انا يدوخني الجيز كيك الدايت احس اني عنتر وانا اتقاتل معاه

[معماري قطري]

اخوي معماري انت كم عمرك؟....................> شيبت خلاص وشفت الدنيا..

عيالنا غير عني وعنك .. عيالنا من حقهم يطلعون ويجربون و يشوفون الحياة كما يتمنونها
لأنهم بيوصولون مرحلتنا وبيفكرون مثلنا اليوم لكن عيالهم ما بيفكرون مثلي ومثلك ومثلهم في مثل هالمرحلة..

لا مانع من التغيير .. يعني مب لازم كل وجبة برجر تكون من البيت..
مب لازم كل وجبة ستيك تكون من البيت..

مب لازم كل وجبة استاكوزا تكون من البيت..

بس ما يصير 8 اشخاص يدفعون 3600 ريال وجبة غدا..
او 4000 ريال على كم قطعة ريش يقطعها الشيف جدامك من الضلع بكبره ويرش عليه ملح!!

او تدفع 80 ريال على ميني برجر بعير!!

واخرتها متحسس منها وتتعالج من الحبوب اللي يطلع في جسمك والالتهاب اللي يصيدك منه!!

فمثل هالمطاعم اللي تبالغ في أسعارها.. وتبالغ في الجشع هي المطالبة في مقاطعتها..
حتى لو الواحد الله منعم عليه بفضله وكرمه..

وهذا اللي اسويه حتى من كنت صغير .. كان راتبي قوي والحمد لله وللمطاعم الغالية نسبياً بس الجيدة وقت .. كنت اطبخ بروحي في البيت وريوقي الا في وقت الاختبارات اتريق برا وفي مطعم عادي 5 دولار حده

يوم تزوجت أثناء الدراسة شوي قمت اروح مطاعم غالية .. وكنت من زوار مطعم لافراندا خارج الشيراتون الشبه دايمين ومطعم في ماريوت الخليج نسيت اسمه بس يوم شفت قراش الخمور محطوطة على الثلج في البوفيه طابت نفسي

ألحين اسمع عن أرقام فلكية ولا ابي عيالي ولا انا نبذر نعمة الله علينا فيها .. هذي مطاعم استغلال اللي بالآلاف .. ومثل ما قلت البدائل موجودة

[معماري قطري]

البلا من اصحاب السوشيال ميديا

كل اكله يصورةنها باحتراف ويعلنون والمشكله الصحن كبر قوطي الروب

وروح شوف في الكويت تطلب صحن يطلع لك يكفي اكثر من شخص
والسعر رخيص

فعلا صار همنا بطونا للاسف

وكلها اكلات سهله وبسيطه ويغيرون اساميها بأسامي اجنبيه وفرنسيه
عشان يجذبون الزباين

/

صدقتي والا كل أكله يسونها في البيت وبنظافة

الحمد لله الوعي جيد عند غالبية النساء ويجربون أكلات حتى ما كنا نعرفها قبل

[وحيد-الشوق]

ممكن اعرف اي مطاعم تقصدونها غاليه انا انا دايمن ف مطاعم الفنادق 5 نجوم ومطاعم الًؤلؤه عمره مامر على مطعم غالي الاسعار جدا مناسبه ومعقوله بعضها يستاهل والبعض الاخر مايسوى،،،،،
الي يستاهل انا دايمن فيه ولا اعتقد بقاطعه
يعني انا استوعبً مثلا مطعم مشهور واكلهً ناطع وفيه لذه اغلى من الفنادق ال5 نجوم لانه يستاهل
بس مطعم اكله الله يعز النعمه فاشل ومايبقى وجامع الطالح والصالح هذا يستاهل المقاطعه مب عشان سعره عشان جوده الطعم،،،
يليت الي يشوف مطعم غالي بنسبه له يقولنا اسمه لانه مثلا مطاعم كتارا كلها اسعار رمزيه اشوفها سكر باشا واللبناني مادري الفلسطيني الي هناك مايحضرني اسمه وزعفران ولوزار وغيرهم كلهم اسعار منخفضه جدا
اللؤلؤه اسعار عاديه الفنادق كلها بعد ووين المطاعم الغاليه علمونا!

انا اختلف معاك ولاتقارن وضعك بغيرك حتى لو احنا ناكل في مطعم ب1000 ريال او 600 ريال لشخصين ممكن نشوفها معقوله كمطعم في فندق 5 نجوم لكن مب عند الكل ترى في ناس ماتقدر تدفع 200 في مطعم لشخصين عنده عيال والتزامات ومصاريف انا مثلاً اشوف بعض الفنادق اسعارهم معقوله مثلاً كقهوة وحلويات وبعض الخفايف بس ستيك ب300 وجبة مشاوي ب150 لشخص واحد انا ما اشوفه رخيص صراحه

[aloosh]

محد مجبور على المطاعم اذا عزابي فهو في بيت الكبير واذا متزوج فهو في بيته
المطعم مشروع ربحي بيطلع منك كل فلس يصرقه في المطعم
و 99% من المطاعم اكل بايت او مبرد من لحم واسماك ودجاج والسلطه نفس الشي وينه الاكل الصحي والله يعلم مددى نظافه المطبخ وانا متاكد انه مو نظيف

لو حد بيقول اتاخر في دوام ترى فيه رؤساء تنفيذين يتغدون في العمل بس مو في قطر ذابحنا السحى علشان كذا ما فيه تقدم


المهم اكل في بيتك احسن من المطعم واوفر وانظف وما تشتهي نفسك دلع نفسك في بيتك

[يمامـة]

وهذا اللي اسويه حتى من كنت صغير .. كان راتبي قوي والحمد لله وللمطاعم الغالية نسبياً بس الجيدة وقت .. كنت اطبخ بروحي في البيت وريوقي الا في وقت الاختبارات اتريق برا وفي مطعم عادي 5 دولار حده

يوم تزوجت أثناء الدراسة شوي قمت اروح مطاعم غالية .. وكنت من زوار مطعم لافراندا خارج الشيراتون الشبه دايمين ومطعم في ماريوت الخليج نسيت اسمه بس يوم شفت قراش الخمور محطوطة على الثلج في البوفيه طابت نفسي

ألحين اسمع عن أرقام فلكية ولا ابي عيالي ولا انا نبذر نعمة الله علينا فيها .. هذي مطاعم استغلال اللي بالآلاف .. ومثل ما قلت البدائل موجودة

صحيح كلامك في عدم تبذير النعمة واتفق معاك في هذي.. بس هذا ما يعني ان نفرض على عيالنا الاكل في البيت لو حبوا يغيرون وياكلون من برع
وخاصة لو الأسعار معقولة..

وبمناسبة الحديث عن الأسعار ودورنا في توجيه عيالنا..

الفترة السابقة من كم شهر طايحين عيالنا في نوع من أنواع الكوكيز هابين فيه هبة.
و كنت ارافق ولدي علشان يشتري منه له او اذا بياخذ حق المدرسة في أيام البيع والتبرعات..
ما ادري شلي خلاني انتبه للسعر يومها.. لقيت علبة من 12 حبة على 85 ريال يمكن..
و حجم الحبات يادوب لقمة للي حلجه كبير.. وفوقه تقيمي للطعم و ريحة الكويكز 0 من 10..

بديت اظهر امتعاضي من ريحة الكويكيز أولا ومن الطعم ثانيا.. ولما لقيت بو العيال يوافقني الراي
ركزت على المبالغة في سعر المنتج نفسه!!
وقلت حرام تندفع فلوس على منتج بمثل هالتقييم بالنسبة لي كأقل تقدير.. فمب أي شي ينباع لازم تشترونه..

لين ياني ولدي وقال لي ماما ابي 100 ريال او 80 ابي اخذ كوكيز حقنا في ميلس بيت يدي..
قلت له نفس الكوكيز؟ قال لي ايه.. قلت له اسفة مب دافعة لك حق هالكوكيز.. أولا طعمه وريحته الله يزيد النعمة..
ثانيا وهو الأهم عندي سعره ما يسوى وابيك تتعلم انك ما تسمح لهم يستغلونك علشان بطنك

وعلشان افهمه ان الموضوع عندي مب موضوع بخل او تقصير للفلوس تجاهه.. كانت عندي 50 ريال كاش..
وطلبت من اخته تعطيه 100 ريال.. وقلت له هذيه لك بس من غير ما تأخذ هالكوكيز مرة ثانية..
لأني اتفق معاك في أهمية توضيح دورنا في توجيه عيالنا لما المبالغ تزيد على لقمة تسد البطن وكان الله غفورا رحيما..