المشاركة الأصلية كتبت بواسطة يمامـة
اشكرك يا يعقوب على المشاركة .. وعلى التأييد..
شوف يا يعقوب.. انا ما اعرف كم عمرك.. لكني بقول لك تجربتي مع ولدي البكر اللي له اليوم 28 سنة الله يحفظه و لاحظت انه ما يدري
ان الاكل والشرب في اواني من الذهب والفضة حرام وان كانت مطلية.. العام في مثل هالوقت كنا كلنا داشين مطعم " ام شريف" اللي صوب برج خليفة
من دخلنا المطعم لاحظت ان القفاش و السكاكين و الشوك فضة.. قبل ما نروح صوب الطاولة اللي حاجزينها لنا.. وقفت في النص وسألت البيج بوس
قلت له: ملاعقكم وشوككم وساكينكم من فضة؟ قال لي: نعم يا مدام.. قلت له ممكن اتبدلها لنا قبل ما نقعد. قال لي على راسي.. قلت في خاطري:
مابيها على راسك ابيها على الطاولة لأن بناكل فيها
..
قعدنا وبدلوا لنا كل شي فيه فضة.. لكن وين المشكلة صاروا يسرفسون لنا بالفضة.. او يحطون لنا طبق والقفشة من فضة او كماشة الاكل من فضة..
اهنيه طلبت التغيير.. فقال لي ان كل الملاعق الستان ستيل اللي عندهم هم اللي حطوها لنا وما عندهم غيرها( حسيتها قوية واايد)
رفضت هالشي.. اهنيه تدخل ولدي البكر اللي كان قاعد في ويهي وهو مب عاجبه رفضي..
وقال لي: يمة ترى عادي مافيها شي.. قلت له حرام ما يجوز شنهو عادي؟!!
قال لي: من قال انه حرام وليش؟ ومن متى؟ قلت له: راجع دينك وبتعرف انه حرام.. بينما هو يحاول يشبك في النت ويبحث عن شي
بدا له صدمة من اول مرة كان ما زال يحاول يثنيني عن رفضي للسرفيس بأي شي فيه فضة.. وما رضى يسكت لأنه مقتنع اني غلط..
فجاه صوت من اليسار وكان اخوه اللي اصغر منه بسنة وقال له: خلاص يا اخوي قالوا لك حرام يعني حرام " وهذا هو ولدي الثاني اللي في قطر طلب
يشلون الفضة من على الطاولة في الكافيه اللي عزمنا فيه "..( اثنينهم تلقوا نفس التعليم وبنفس المدارس ).. استمر ولدي البكر في البحث
ووجد صحة كلامي وبلع العافية وسكت.. اشوي جاه اتصال وطلع هو وخوانه الاثنين يسلمون على واحد اماراتي وهم رادين
سبقتهم عائلة كويتية مكونة من ام واربع بنات او 3 مب متذكرة.. وكانوا سفور الا الام مغطية راسها بكبوس بو حجاب من غير رقبة..
وقعدوا مقابلي على طول واي كلمة بيتكلمونها بنسمعها .. فاللي حصل ان في لحظات لقينا اعتراض من الام واحدى بناتها على وجود
الفضة على الطاولة.. وياهم البيج بوس وتم يقنعهم انه الموجود مب فضة 100% وبدى يفتي لهم انه عبارة عن قشرة خفيفة من الفضة وانه مب حرام
فتحول من مدير للجراسين الى مفتي في تحليل الاكل في اواني الفضة هذا اذا كان مسلم من الأساس .. واقتنعت الام وبنتها ..فقال لي ولدي سلك لها المسكينة..
قلت له في ذمتها وذممنا اللي ندخل مطاعم مشبوهة.. فرد علي مع ان اشكالهم ما توحي انهم يدققون على مثل هالامور... فقلت له مب شرط..
الانسان مربوط مع ربه بملايين الحبال في اذا اقطعوا حبل او حبلين او 10 فباقي الحبال اتم مربوطة ..
فبرجع لك و بقول لك طبيعي جدا اشوفك تقول ما اعرف ان حرام.. حالك من حال ولدي الكبير وحال الكثيريين اللي شفتهم في الكافيه
ما اعتقد انهم يدرون ان حرام او ما اعتقد أصلا منتبهين انه فضة..
ارجع واشكرك على ابداء رايك و توضيح موقفك تجاه أي امر يحتاج الى وقفة لتصحيح الخطأ..