نصيحه ياأخواني
اللي بيركب بورسلان على شكل باركبه بأحجام مختلفة ينتبه
يتأكد من الكميات كافيه وطريقة التركيب بالطريقة الصحيحة
اللي صار معاي علمت المبلط على طريقة التركيب
ونفذنا تطبيق عملي في الدور الأرضي
ركبنا البلاط بدون غراء تجربة واتفقنا بين المسافات عشان ماتصير كمية هدر كبيرة
والاتفاق ان يتركب بمقاس 65 سنتيميتر
يعني تتركب الاحجام 15 بعدها 20 وبعدها 30
وبعدين يبتدي 20 / 15 / 30
المهم ان يستخدم 3 مقاسات كل مره
اللي صار عندي ان استخدم 20 / 30 / 15 بعدين 30 / 20 / 15
وصار عندي نقص شديد في مقاس 30 للغرف الثانية
وزاد عندي مقاس 20 / 15
التركيب طلع حلو في التشكيلة مافي كلام
بس نقص على للغرف الثانية مقاس 30
الحين يا أني اركب مقاس 15 / 20 للغرف الباقية
أو
أني اطلب طلبية ويبي لها مب اقل من شهرين الى ثلاث شهور لين توصل
لان حتى المقاسات الباقيه ممكن ماتكفي لازم تنحسب الكمية قبل التركيب
اللي يخرب على الواحد غرفة الدرسنغ تكون متصلة مع الغرفة ومفتوحة والبلاط لازم يكون متصل نفس المقاس مع الغرفة
انصح كل واحد يركب بلاط الباركيه مايخلط مقاسات يعني يشيل من راْسه ان يركب ثلاث مقاسات ويوهق روحه حتى لو البلاط متوفر في الدوحه
وخاصه ان الشركات اللي توفر ثلاث مقاسات تكون غاليه في السعر
الله يعينك اخوي ( بو سعود )
ومشكور على التوجيه
انا حاليا مطلع الدفان للفيلا وقريب ببلط شكلة بيصير عندي
( بلاليط )
[/B]
عليك بطريق الحق ولا تستوحش لقلة السالكين، وإياك وطريق الباطل ولا تغتر بكثرة الهالكين ..”
عملية حسابها سهلة بوسعود
اللي يحتفظ بفايل الاوتوكاد يقدر يسويها بنفسه لو عنده خبرة بسيطة .. عندك مقاس غرفة معينة ومقاس أي غرفة جنبها والمقاسات المختلفة للبلاط أو الباركيه تسوي مستطيلات بألوان لو حبيت تفرق بينها وتصفها على المخطط .. خل نفترض رسمتك كبيرة ومعقدة وزارة مثلاً وسويت التوزيع وصعب تقعد تعد بعيونك ولازم تغلط .. فيه أمر اسمه count هذا من تختار الرسمة كلها يعد لك القطع قطعة قطعة ولو تكون مسميها ومسويها بلوكات بعد تكون بشكل واضح وفي جدول
دوم تزيد بين 10 أو 5% إحتياط للتكسير أو القص الغلط
انا قايل من زمان واكرر اللي عنده مكان معين عارف مقاسه وعارف مقاس البلاط اللي بيحطه يعطيني المقاسات وباسوي له الحساب والتصميم كيف بيبين في الأرضية أو الحائط .. بس تسلمني نظيف اسلمك نظيف مثل ما قال حبيب السيسي عادل امام
انت دوم ماتقصر يابوعبدالله مع الأعضاء
بس انا كنت مع الفورمن ومعلمته الطريقة على ارض الواقع وأعطيته نموذج مخطط من الكتالوج
هذا التخطيط كان في الدور الارضي
وطلبت منهم ان يشتغلون في الدور الاول والأرضي وآخر شي يشتغلون في البنتاهاوس
عشان لو سمح الله صار عندي نقص اشتري اَي نوع من الدوحه متوفر وأركبه
بس قال لي احنا حسبنا كمية البلاط الموجود وان يكفي
وراح نبدأ في البنتاهوس اول واحنا نازلين عشان مانوصخ لك البيت
المهم هم ابتدو الشغل بس اخطأو ان استخدمو مقاس 30 اكثر من المقاسات الثانية
لو مشو على كلامي وابتدو في الدور الاول والأرضي وخلو البنتاهوس اخر شي افضل
ومثل ماقلت سابقاً ان استخدمو مقاس 15 / 20 / 30 المجموع 65 سنتيميتر
بعدين على طول استخدمو مقاس 20 / 30 / 15 المجموع 65 سنتيميتر
واستخدم بعدها مقاس 15 / 30 / 20
يُبين لنا ان استخدام مقاس 30 اكثر*
وكثرة استخدام مقاس 30 هذا اللي سبب النقص
صحيح ان في الاخر المقاس الكلي يطلع 65 سنتيميتر
الحمدالله على كل حال
نتعلم من الأخطاء
الظاهر اللي باعك غلط في الحسبة وحسب لك الكميات مقسومة على المساحة الكلية .. يعني ثلث المساحة الكلية 15 وثلثها 20 وثلثها 30 .. تماتيك يطلع لك عدد ال 15 ضعف الثلاثين وعدد العشرين 150% عن عدد الثلاثين .. والفيلسوف اللي يركب يقول لك اتبعنا كلامك ونقص وبينقص سرعة
المفروض يكون حق كل خط 30 خطين 15 وخط ونص 20 حتى يوازنها صح
بص حضرتك
وهذا لفائدة الجميع وللأسف مسؤولين المبيعات بعضهم يصلحون لكراج سيارات مب سيراميك وباركيه
يحكمك تصميم التركيب وهو اللي يحكم الكميات قطعة قطعة .. هذا مثال دارج للباركيه القطعة الكبيرة وسط وحولها قطعتين وسط وبعدين قطعتين صغار من كل جنب .. يعطينا لمساحة معينة بنحتاج 4 أضعاف عدد الصغيرة مقارنة مع الكبيرة وانا اتكلم عدد مب مساحة وضعفين عدد الوسط عن الكبيرة يعني بنسبة 1 : 2 : 4 بالتدريج من الكبيرة للصغيرة .. لو المساحة اللي نحتاج نحط فيها باركيه 20 في 20 متر = 400 متر مربع شلون نحسب عدد القطع حسب هذي التركيبة؟
نحسبها حسب مساحة كل قطعة 15 ملم اتوقع للصغيرة في 65 سم .. تعطينا بعد التحويل مساحة 0.00975 متر مربع وفي المتر .. وفي المتر المربع نحتاج 102.56 + الهالك 5% = 108 قطع تقريباً ولكل 7 متر نحتاج 4 متر مربع من الصغيرة
المتوسطة مساحتها 0.013 وللمتر نحتاج 77 قطعة تقريباً + 5% = 81 قطعة ونحتاج مترين لكل 7 متر من الكمية
الكبيرة نحتاج 54 قطعة للمتر المربع ونحتاج 1 متر من كل 7 متر كمية .. نشوف مضاعف ال7 لحد ما نوصل 400 نحتاج 57.14 من الكبيرة يعني نحتاج عدد بالضبط 3086 قطعة وبنضمن ما ينقص ممكن يزيد شيء بسيط
للمتوسطة نحتاج 9257 قطعة .. طبعاً بيعطيك الكمية بالكرتون المقرب لهذا العدد وبزيادة شوي
هذي صورة التوزيعة والعدد يختلف أكيد لو اختلفت المساحة
التوزيع كذلك بعضها تجي مقطوعة أما ثلث أو ثلثين أو كاملة حتى تجي كل حزمة متداخلة في بعض وتقريباً ما يطلع عندك هالك .. اللي بتقص منها الثلث يبقون الثلثين تركبهم في الصفة اللي فوقها وبعدين تركب كاملة
أحد الإخوان أسس شركة لتركيب الغرانيت الله يرحمه توفى السنة .. كان يسوي التصميم كلوحة فنية بألوان ونوعية كل قطعة على الرسم وبعينات موجودة عنده ويرسل التصميم لمصنع مختص في البرتغال .. ويرسل له كونتينر بالقطع مقصوصة قص ليزر ومرقمه تركب قطعة قطعة بكل سهولة وبربح كبير جداً