المشاركة الأصلية كتبت بواسطة يمامـة
صباح الخير..
اعتقد ان هناك إشكالية في فهم اختلاف وجهات النظر و تقبل حرية الرأي عند البعض..
الكلام اهنيه لا يعنيك انت بالذات.. ولكن موجه لكل شخص يقف مع او ضد الاهتمام في مثل هالتطبيقات..
لذلك قد ترى تشنج او نرفزة من أي رأي يخالف توجه الآراء الثانية وقد يفقد الحوار ادبه بسبب هذا التشنج..
بينما كل ما في الموضوع ان كل منا في مثل هالاماكن يعبر عن رايه بالطريقة اللي يحس انه أدى اللي عليه..
ومن ثم أوجه لك كلامي بشكل خاص وأقول لك..
لابد ان نستوعب ان التطبيقات بحد ذاتها مب غلط.. ولا الاشتراك فيها والاستفادة منها غلط..
بدليل في ناس فاتحة بيوت وتكد عليها من خلال الاشتراك في هالتطبيقات.. وفي ناس تنشر الخير من خلال هالتطبيقات..
ولكن لما هالتطبيقات مفسدتها وسرقتها لاوقاتنا تكون اكبر من الفايدة منها.. اهنيه نقول الابتعاد عنها افضل..
وهذا رأي من يقف ضد الاشتراك في مثل هالتطبيقات..
فالسناب كتطبيق ما بيسوي لك شي .. حاله حال السيارة لو استخدمتها في مشاويرك.. لكن لما تعسس فيها من غير فايدة
اهنيه ما بنتهم السيارة قد ما نتهمك انت في تضييع وقتك وترك التعسس في السيارة..( طبعا هذا مثال لا يعنيك..)
اما موضوع ان اغلب اللي انتقدوا الرنامج مب عارفين يستخدمونه
اعتقد خانك التعبير في السطر السابق
..
فالسناب حاله حال أي تطبيق يطرح له محاسن وله مساوئ سواء اعرفوا يستخدمونه
او يفتحونه من غير ما يعرفون يستخدمونه.. فهو حاله حال تويتر حال جوجل بلاس حاله حال الوتس اب او اللاين او أي تطبيق
اخر يوصلك بالعالم من حولك.. في ناس مضيعة وقتها في الوتس اب وكل اشوي منزلين لك فيديو في التحديث اليديد له..
وهذا غير المسجات اللي تتحاذف عليك منهم صبح وليل ونهار.. ولكل فترة موده الخاص من المسجات!!
فلو ردينا للسناب
وبما ان الواحد متعلق فيه ( فشي طبيعي راح يقضي وقت كبير فيه.. قد يكون هالوقت مفيد بالنسبة له.. وقد يكون مب مفيد
بس يدعي انه يستفيد.. لأنه بيشوف الصالح والطالح.. وان ضاف الصالحين راح يطلعون الطالحين من اهنيه ومن هناك..
وقد يضغط عليهم ويشوفهم من باب الفضول.. او يشوف شنهي سالفتهم.. والبعض للأسف يسجل يومياته و يصوركل نملة تمر من صوبه
ويقول لك السناب مفيد..).....................> أتكلم عن واقع مشاهدة للي حولي وأتمنى لحد يتشنج من المنتدى ويعتبرني أتكلم عنه..
أتمنى لك من كل قلبي لك ولغيرك كامل الاستفادة من السناب وغير السناب.. لكن لو بتكلم عن رايي
ما أتمنى تواجد مثل هالتطبيقات في جواويل عيالي.. وأتمنى هالشي يكون نابع منهم ومن اعماقهم..
واعذرني خذت من وقتك..