لجنة العلاج بالخارج

[عاشق العديد]

والله إنك قلبت المواجع يا محمد ....

ويبدو أن مسلسل الفضائح مستمر منذ القدم ...

أذكرك لكم حادثة حصلت معي شخصياً سنة 1997م .. كنا في أميركا رحلة علاج للوالدة الله يرحمها ويغفر لها ..
السفر تم بشكل عاجل جداً، ونظراً لعدم استطاعة الخطوط القطرية آنذاك توفير الرحلة المناسبة لنا وتجهيز اللازم لهذه الرحلة الطويلة ..
خاصة وأن حالة الوالدة كانت تستدعي وجود ممرضة مرافقة لها أثناء الرحلة، وسرير للوالدة طوال رحلتنا حتى نصل إلى أمريكا ..
ولم تكن هناك خطوط مباشرة لأمريكا .. إذ لابد من محطة توقف (ترانزيت) ... أخذنا موافقة من لجنة العلاج بالخارج بالحجز على أي سفريات مناسبة لنا ..
وفعلاً أخذت ورقة حجز التذاكر .. وعن طريق سفريات كيلوباترا .. تم الحجز على طيران klm إلى أمستدرام ثم طيران أمريكا إلى بوسطن ..

قضينا في بوسطن حوالي 20 - 25 يوم تقريباً مابين فحوصات وعلاج .. إلا أن الوالدة انتقلت إلى رحمة الله تعالى .. أسأل الله تعالى أن يرزقها الفردوس الأعلى ..
المهم ... ثاني يوم كلمت المكتب الطبي في السفارة علشان نخلص الإجراءات .. ونرجع الدوحة .. إلا إنني فوجئت بالآتي:
ما تقدر ترجع الآن .. لأنك ما جيت على القطرية .. وجاي على خطوط ثانية غير .. فلازم تلتزم بتاريخ حجز العودة !!

يعني شنو !!
طيب الوالدة توفت .. وهي مواطنة قطرية .. وجاية على حساب الدولة علاج .. توفت .. وأنتوا سفارتنا !!
شنو أقعد في أمريكا لين موعد تاريخ العودة في التذكرة !!
إنت من صجك ؟؟؟

قال لي: ما أقدر أسوي لك شيء .. لو جاي على الخطوط القطرية كان رتبنا لك حجز في أقرب فرصة ..

قلت طيب إنسى إنها جات على حساب الدولة .. جاي سياحة أنا وهي .. وتوفت .. ولجأت لكم انتوا علشان سفارة بلادي تخلص لي الإجراءات وترجعوني للبلد ..
ما راح تساعدوني ؟؟

ما أذكر إن رد علي رد مقنع ... المهم سكرت التلفون في وجهه وكنت في حالة ضيق شديد شديد شديد من صدمة السفارة ..
لابي الوالدة توها متوفية .. ولابي حزن واتصالات من الدوحة ومواساة .. وبكاء الأهل هناك ..
ولابي أنصدم من تصرف السفارة معاي ..

أذكر جلست على الكرسي في المستشفى .. وغطيت راسي بين ركبتي .. وأفكر في الحالة التي وصلنا لها .. والله أن عيوني دمعت من القهر ..
المهم كان المترجم جالساً بجانبي وسمع الحوار بيني وبين السفارة .. قال لي أكيد هناك خطأ .. لازم تروح لواشنطن وتقابل المسؤول هناك ..

كان في المستشفى كذا مريض ومريضة من الخليج يتعالجون هناك .. وتعرفنا على بعض المرافقين للمرضى وصارت لنا علاقات بيننا .. نزور مرضاهم وهم يزورون الوالدة أثناء العلاج ..

المهم شاب كويتي .. جاي يعالج ولده على ما أذكر .. وكان جاري في السكن بمنطقتنا في بوسطن .. شافني بهذا الوضع وسأل المترجم .. وقاله له كل القصة ..
جاء عندي وقال لي: آفا عليك ياخوي .. ولا تشيل هم .. الحين أكلم سفارتنا (سفارة الكويت) ونرتب لك عودة !!

وجاء بعد ذلك واحد من شباب الإمارات .. وسأل الكويتي وعرف القصة .. ويقوم يسوي اتصالاته علشان يساعدنا !!

شفتوا وين وصلنا ؟؟؟

المهم .. فعلاً جاء الرد من السفارة الكويتية أنهم سوف يرتبون لنا عودة في أقرب فرصة !!

سفارة الكويت كانت سترتب لنا العودة .. وسفارة بلادي قالت لي بما معناه ( انثبر مكانك لين موعد حجزك ) !!

المهم هنا المترجم بدأ يخلص لنا باقي الإجراءات .. وكلم السفارة القطرية بالموضوع ..

هنا سفارة بلادنا شكلها اختبصت !!! وحست بقوة الضربة اللي جاتهم ..

فاتصلوا بي يعتذرون .. اتصلت لي وحدة سودانية .. الاول اللي قال ما نقدر نساعدك و .. و .. و .. كان قطري للأسف ..
المهم السودانية اعتذرت لي وقالت لي ستعودون للدوحة على أقرب طيارة .. واحنا سنرتب لكم ذلك ..
انت ارجع السكن .. وخل كل الإجراءات علينا ونحن سنتصل بك ..

وصارت الترتيبات ... ولكن بعد ترتيبات تدل على مدى اهتمامهم بالمواطن القطري ..
لما وصلنا لندن .. غيرنا الطيارة .. وصلنا الدوحة .. وكان الأهل متواجدين في المطار ..
واخوي وخالي كانوا في قسم الشحن علشان يستلمون التابوت .. إلا أنه للأسف لم يكن هناك تابوت الوالدة ..
صار خطأ في الحجر .. في مطار لندن حجزوا لنا على طائرة وجثة الوالدة الله يرحمها على طائرة أخرى في اليوم التالي !!!!
ورحنا اليوم الثاني مطار الدوحة علشان نستلم تابوت الوالدة ..

واستغفر الله العظيم .. ولا حول ولا قوة إلا بالله ..

وهذا اللي حدث معاي أنا شخصياً !!

الله يرحمها ويغفرلها يارب ..

موضوع التذاكر مع اللجنه هاذي قصه ثانيه .. مادري ليش يخافون من القطريه

أتذكر عشان موضوع حجزي رحت للدكتوره غاليه ..

قلت لها انتو موديني علاج ميامي كل سنه اروح ميامي ليش ماقلتي هالسنه انه كالفورنيا .؟ قالت كيفك مالي خص ..
قلت لها أوراق المستشفى ميامي مب كالفورنيا قالت انا مالي خص كيفك دبر امورك ..

هاي رد وحده قاعده فمكان تساعد مرضى او غيره .؟

وانا اقسم بالله لولا الله ثم القنصل الي في كالفورنيا عبدالرحمن النعيمي .. انه يمكن احنا ضايعين ولا مقتولين

[معماري قطري]

الله يرحمها ويغفرلها يارب ..

موضوع التذاكر مع اللجنه هاذي قصه ثانيه .. مادري ليش يخافون من القطريه

أتذكر عشان موضوع حجزي رحت للدكتوره غاليه ..

قلت لها انتو موديني علاج ميامي كل سنه اروح ميامي ليش ماقلتي هالسنه انه كالفورنيا .؟ قالت كيفك مالي خص ..
قلت لها أوراق المستشفى ميامي مب كالفورنيا قالت انا مالي خص كيفك دبر امورك ..

هاي رد وحده قاعده فمكان تساعد مرضى او غيره .؟

وانا اقسم بالله لولا الله ثم القنصل الي في كالفورنيا عبدالرحمن النعيمي .. انه يمكن احنا ضايعين ولا مقتولين

ميامي من تدخلها هواها يداوي القلب العليل

الله يشفيك أو يشفي مريضك إخوي عاشق العديد ويسهل علاجك

[الحياة الخالدة]

الله يعينك ويشفي بنتك أخوي
ويشفي جميع مرضى المسلمين

للأسف مواقف من هاللجنة أقل ما يقال عنها إنها تفشل .. ولا حول ولا قوة إلا بالله

[يمامـة]

من تفتح وطني الحبيب صباح الخير..
تنقهر من لجنة العلاج بالخارج..

الله يعينك يا اخوي ويشفي لك بنتك وتزين امورك يارب في غربتك..

[وحيد-الشوق]

من تفتح وطني الحبيب صباح الخير..
تنقهر من لجنة العلاج بالخارج..

الله يعينك يا اخوي ويشفي لك بنتك وتزين امورك يارب في غربتك..

مساكين القطريين هذا متنفسهم الوحيد للشكوى على لجنة العلاج في الخارج

[الوسيط العقاري]

الله يعينك ويشفي بنتك أخوي
ويشفي جميع مرضى المسلمين

للأسف مواقف من هاللجنة أقل ما يقال عنها إنها تفشل .. ولا حول ولا قوة إلا بالله

الله يجزاك خير ويحفظ لك غاليك

[الوسيط العقاري]

الله يشافيها ويقر عينك بشوفتها وهي بصحتها

الله يجزاك خير ويحفظ لك هلك من كل شر

[الوسيط العقاري]

حبيت اشكر الأخ ناصر السعدي مدير المكتب الطبي القطري - واشنطن على تدخله في الموضوع والتواصل معاي وحل الموضوع .. والشكر موصول للدكتورة سحر المكتب الطبي على تواصلها الدائم

وأشكر الإخوة في وزارة الصحة - قسم الشكاوي اللي تواصلو معاي بخصوص الموضوع .

[الحياة الخالدة]

جزاهم الله خير
والحمد لله إن مشكلتك انحلت

[naklan]

انا حاليا ف بوسطن ف علاج بنتي عمرها سنه و 8 شهور

وقفو علاجها بدون سبب قبل أسبوع مع انه يوجد تقارير جديدة انها لازالت تحت العلاج وعندها اعصاب وتشنجات ومشاكل في الجهاز الهضمي والاكل يتحول ع الرئة بشكل دايم

طرشت أخوي يقابل اللجنه راح للدكتورة غاده فهمها الوضع قالت بكل برود بنشوف اللجنه وكنت وياه ع الخط ف التلفون

قلت عطني اكلمها افهمها حاله بنتي لانها من ضمن اللجنه وتدري أني أتكلم من امريكا قالت بكل برود ما أتكلم ع التلفون .....

اتمنى صوتي عن طريق المنتدى يوصل للمسئول الاول في الصحة لان هذا عبط وعيب عليهم

ورقم جوالي 18572531292+ بوحمد

الله يشفيها ويعافيها ويوفقكم في علاجها
العام الماضي كنت في بوسطن مريتها كم يوم
للسياحة طمنا على البنت اخوي بوحمد
كل ما سنحت لك فرصة

وربي يوفقكم اخوي