أشكر إدارة مستشفى حمد وبالخصوص قسم الغدد والسُكري .. وخالص إمتناني للدكتورة ليلى الهيل حيث تمت بحمد الله السيطرة على السكر الغير منتظم عندي .. وأكيد شكري موصول لأصحاب الأيادي البيضاء سيدي سمو الأمير المفدى وسيدي سمو الأمير الوالد ولكل من يعمل معهم لرفعة قطر

بداية العلاج كانت باقناعي بتركيب جهاز القراءة المتواصلة للسكر في الدم وهو شوي مزعج تتركب ابرة تكون مغروسة خلف أسفل الكتف لمدة 14 يوم وهالمرة مرت الأُمور بسهالة ما تحسست من مكانها للحين وباقي 5 أيام وينتهي مفعولها وان شاء الله باستبدلها بجديدة لضرورة متابعة القراءات

كنت مستمر على الأنسولين المخلوط نوفو مكس بن 54 وأوقات اخليها 56 الصبح و 36 الظهر و 60 في الليل .. بعد ما ركبت الجهاز اكتشفت إن السكر دوم عالي الا وقت الصبح يكون معقول وهذي صور للقراءات اليومية من يوم 22 مارس

الرسم البياني يبدأ من نص الليل وينتهي ثاني يوم قبل نص الليل



هنا ثاني يوم من ركبت الجهاز حاولت قد ما اقدر اخفف أكلي واضبط السكر لكن ما انضبط ونلاحظ كيف يطير بعد الفطور في ارتفاع رأسي



وثالث يوم نفس الشيء والعشاء رفع السكر عدل لين حدود 350 .. الخط الأزرق العريض هو بين 140 و 80 وهو اللي معتبره هدفي لكن مستحيل كان يبقى ضمن هالحدود



يوم 25 - 3 زدت كمية الأنسولين وتعشيت خفيف ونزل السكر لين اخترق الخط ووصل لين 50 وبعدها لين ال 46 على ما اذكر وتغير الخط للأحمر وكان نزول قوي رجع بعد الريوق للاقلاع وبعد العشاء تشوفون شلون طار وكأني ما سويت شيء .. كانت نسبة البقاء في الأزرق 22% وتحت 3% و75% فوق وهذا شيء يعقد ويخلي الواحد يتعب نفسياً .. لكن الدكتورة واعدتني كل شيء بيتضبط وهذا اللي مصبرني



يوم 26 نفس الوضع وكان موعدي يوم 27 الساعة 2 الظهر .. وأحلى شيء قدرت ادخله في الأزرق مرتين وكنت معتبره انجاز




يوم 27 كنت متمني السكر شوي ينضبط بس فشلني حتى انخشيت ورا الكمبيوتر وقالت الدكتورة تعال منيه حتى اشوفك قلت خايف السكر ملخبط وباكون في مرمى النيران .. المهم عطوني ابرة رابعة آخر الليل اخذها اسمها فكتوزا .. حتى اسمها حلو وهذي شغلتها تحسس الانسان بالشبع .. وعطتني حبوب جوناميت وهذي بعد تسبب شوية نقص شهية وتفتح الخلايا لحرق السكر .. وعطتني حبة قبل الفطور هذي صج خطيرة اسمها نسيته بس شغلتها تطلع السكر عن طريق سوائل الجسم .. وقالت لي قلل الأنسولين لو شفت السكر ينزل



من بديت استخدم العلاج ليلة 28 وأول اليوم والسكر راجع لقواعده سالم .. ولا خذت ابرة الفكتوزا للحين وهي اللي تسبب عدم شهية للأكل والحمد لله مع هالكولكشن أحس بعدم شهية وبانضباط السكر .. ألحين اقيسه بعد الأكل بساعتين 111 حتى الرقم حلو



وهذا اليوم أكثر شيء وصل 160 بعد الفطور والحين نزل لين 111 وقبل الفطور كان حول هالقيمة من فجر والحمد لله .. يعني بعد العشاء ما طار طيران خيالي ولا نزل كثير أول الصبح .. وشتسوى نومة هنيئة والحمد لله الذي بحمده تدوم النعم



ولي مواصلة تثقيفية بإذن الله والله لا يبلي مسلم بهذا المرض خصوصاً صغار السن