جبس وديكور ، مطابخ ، حمامات

[S.T.Y.L.E]

السلام عليكم

محلات ال جبس وديكور ، مطابخ ، حمامات كثيرة
بس ابي من تجربتكم اماكن مميزه بشغلها واسعارها معقوله
لفيت كذا مكان وانا ماعندي خبره كبيره فهالموضوع ، الاسعار متفاوته بشكل كبير جداً ، ابي مشورتكم

[معماري قطري]

من المحلات القديمة للجبس موبيل للديكور ورافكو وعندهم تصاميم كثيرة والحديثة كثيرة شفت محل تصميم داخلي قريب تقاطع عين خالد سابقاً ( المغفور له بإذن الله خالد بن محمد الغانم حالياً ) على اليمين وانت طالع من طريق العين

زين لو تختار اللي يسمى بتصميم داخلي مبدئي وتواصل عليه .. هذا ما يكون مفصل للأخير وكل قطعة مذكورة فيه ويكون Basic مثل ما نقول في لغة الهندسة أو أساسي بس ضروري يكون مرقم شتبدأ فيه وشتنتهي به .. ولو في الواقع اختلف اختلاف بسيط حسب أُمور كثيرة منها السعر والتفاصيل الدقيقة ما عندك مشكلة تكون سويت النمط العام

التصميم الداخلي المبدئي ممكن تقسمه إلى أعمال خشبية وهي الأعمال الثابتة كالأبواب والأقواس والخزائن الثابتة والنعلات - وأعمال خشبية أو معدنية تأثيث أو معدنية ثابتة كالدرابزين وممكن كبتات معدنية أو مطابخ والتأثيث يعني مكان القطع ونوعهم واختيارهم ولونهم وموادهم يرجع لك وممكن بعد المصمم يعطيك الإطار العام - أعمال الكهرباء والإنارة وتجي متماشية مع عمل الأسقف - أعمال الأرضيات - تشطيب الحوائط ورسومات مبدئية لشكل الحوائط الداخلية

ميزته إن فيه قابلية التغيير والاختيار حسب ما تحب وحسب المتوفر في السوق وممكن تشتغل على مراحل حسب السيولة عندك

نسيت توزيع وترتيب الحمامامات والمطابخ المبدئي وهذا تطوره بعدين حسب اختيارك للبلاط وحسب دمج الجبس مع كبتات وثلاجات وأسقف وحوائط وتجويفات المطبخ

بالنسبة للأسعار أكيد متفاوتة وهنا يجي دور المالك في الاختيار والتغيير وهذي ميزة التصميم الداخلي المبدئي إنك تقدر تغير حسب واقع التسعير .. واللي يسوي هذا التصميم من الأساس يقدر يتفق على كل شيء مسبقاً وأثناء بدايات البنيان .. أحياناً المطبخ يجي لنا فيه عدة الطبخ مثل الشفاط والفرن بمقاس معين واحتياجات معينة وممكن نسوي تنور أو فرن فخاري نكون شارين نوع معين ونجهز له مكان وندمجه في تصميم المطبخ .. الشواية الكهربائية أو الغازية نكون حاطينها في مكان قريب من الشفاط ويغطي عليها .. ممكن المطبخ عندك كبير تقرر تقسمه بحائط أو إثنين يكون عندك مثل نظام الستور اللي تمشي فيه بأرفف مفتوحة وباب بس ويمكن بمنور صغير فوق وتخلي أغراض الطبخ كلها فيه وباقي المطبخ عبارة عن كبتات سفلية وترتيب خفيف والتخزين كله في الجنبين وطاولة وسطية عليها مغسلة