من المدرسين الطيبين وأصحاب النكتة وأصحاب التدريس الجيد مدرس الرياضيات في الثانوية .. أحمد سلام .. وكان من كم سنة موجود وصادفته وخذت رقم تلفونه تواصلت معاه فترة بس من زمان منقطع عنه
أحمد سلام كان ينزل في السن لعمرنا ويضحك ويتغشمر ويتحمل سخافات الطلاب .. مرة مسوين حفلة وواحد مصور فلم فيديو .. وصراحة عليه انتاج وألحين مشهور ومستوي من خبراء الفلك في قطر .. إخوي سلمان بن جبر الجبر آل ثاني .. هو المصور وهو المنتج ووقت عرض الفلم قاعدين متسمرين الا بدايته بياض ونسمع أصوات بس .. يا سلمان شسويت قال تابعوا بس .. وشوي الا صلعة المدرس تبتعد بالتدريج .. صج كنا همنا الضحك والنكتة
مدرسنا هذا لين عصب يقول بيت شعر وانا احاول اصيد هذا البيت ولا اقدر .. يقوله سرعة ولو قلت له عيد يقول متوديناش في داهية ده شعر سياسي .. شوي شوي انتبهت شيقول ولقطت البيت وكتبته على لوحة قماش خضراء وبالطبشور يعني ما يطير الطبشور .. اللوحة كانت لتعليق الورق بالدبابيس
كان بيت الشعر يقول حِمير بلدنا في النعيم متمرغة .. وأهل المعارف في الشوارع متسرحة .. طبعاً باللهجة المصرية .. من الطلاب معانا واحد نعيمي استوى دكتور أد الدنيا ألحين والله ما يحضرني اسمه .. إحتج على كلمة النعيم وهي تعني نعيم الحياة ما تعني النعيم نسبة للنعيمي
المدرس يجي ولا ينتبه للمكتوب لكن من انتبه قال ايه مين اللي كتب دأ الكلام ويمسح بكل قوته مسكين والطبشور مبين ومعلم على القماش وصعب ينمسح واحنا نضحك
الله يذكرك بالخير يا أحمد سلام وتحية لك وين ما تكون موجود ولجميع زملاء بن تيمية ثاني / 2 علمي سنة 1984 على ما اعتقد