السلام عليكم وصبحكم بالخير.
بغيت اسال عن الشركات اللي عن طريق الحكومة. السلبيات والايجابيات.
يعني هل اسعارهم مدعومه.
هل الحكومة بتراقب شغلهم وبتشرف عليهم مثلاً.
ايش الفرق بين انني اتفق مع مقاول او انني اروح لجنة المناقصات واختار من عندهم.
يا ريت تفيدوني فالموضوع لاني توني سمعت عنه امس.
واخيرا. وين مقرهم وتبع اي ادارة.
والسلام عليكم.
اللي عن طريق الحكومة مسجلين ومصنفين ورخصتهم سارية المفعول
العادة يكون تسجيلهم في لجان المناقصات العديدة حسب الجهة اللي تطرح المشروع
بنك التنمية اتوقع عندهم لستة
بس دوم الأهم هو إنت وشتختار .. ولازم تزور عدة شركات في مقرهم وتشوف اسلوب شغلهم وتزور المواقع والسمعة للشركة مهمة
للبنيان العادي شركات درجة رابعة كفاية وتحصلهم جيدين .. بس أوقات تحصل سعر محترم عند شركة محترمة ودرجة أولى .. مثل هذي الشركات تقدر تقول مولودة قوية وتحترم عقودها ولا عندها وقت تضيعه مع قضية وشوشرة
إتفقنا مرة مع شركة جي ال سي وهي تابعة حق شركة هندسة العمارة القطرية ( المقاول الرئيسي لبناء الستي سنتر ).. وعرفني عليها استشاري وكانت هي اختياره .. الشركة كانت جديدة في أواخر التسعينات لكن مولودة قوية لأن مدير شركة هندسة العمارة القطرية واعتقد يعتبر شريك اخوه توه متخرج وأسس له الشركة .. صج منفصلة بس متأسسه قوية وعندها دعم من الشركة الأُم .. حتى توقيع شيك الضمان جانا من الشركة الأُم وكنت مصر على ضمانات أقوى أو شيك بنكي مضمون القيمة حسب العقد .. بس هذا معناه يجمدون فلوسهم لمدة فترة العقد وصراحة كانوا قد الثقة وشغلهم ما واجهنا فيه أي مشكلة
مدير الشركة علاقتي معاه متواصلة ويسعر لكثير من الربع .. تسعيره مرة طلع 2.2 مليون لبيت كبير يعتبر قصر وتسعير مقاول بالاسم بس بدون شركة ومقر كان 2 مليون والمالك اختار المغامرة و3 سنين للحين ما خلص العظم واضطر لتعيين مقاول ثاني وغيره والله يعينه
دوم تاجر الشنطة أو المقاول اللي راسماله سيارة وكتلوج يغريك بسعر أقل بس انت تدخل مغامرة حتى غير قانونية .. ألا المقاول سافر امه تتوحم فيه في بلاد بعيدة وبيروح لها وعليك تنطر ست شهور .. أو المقاول ناصب على 10 غيرك وبشوية عمال ينقلهم من مشروع لمشروع
نرجع حق رفيجنا هذا .. بعد زيادة الشغل في البلاد تضامن مع شركة أمريكية وزاد تصنيفهم من 4 الى 1 ووصل عدد طاقم الشركة 1700 .. طبيعي بيأجر جزء منهم لمقاول ثاني وبياخذ مشاريع أصغر لو ما حصل مشروع كبير .. وغيره كثيرين هذا مجرد مثال
في تسعير بينه وبين هندي توه بادي الهندي عطاني سعر 5.5 مليون حق بيتين ومجلس مع التكييف .. وهو عطاني سعر 2.4 مليون على ما اذكر أو حولها لكن المالك رفض الشركات كلها وراح اتفق مع واحد من بياعين الوهم .. جرب معاه بنيان المجلس قبل وكان مكلف وخذ وقت لين خلص .. بعدين كلمني يبي شركات خرسانة جاهزة لأنه جرب بنيان المجلس وهو ساكن في نفس البيت وتعب من شغلهم ويبي شغل سريع وبدون طقطقة وبسعر مناسب .. بس كان مخطيء ما فاوض الأقل وهو شركة كبيرة وما كمل معاه الشغل كامل
هلا اخوي معماري. جزاك الله خير.
ماقصرت.
واذا في احد من الاخوان جرب عن طريقهم يا ريت يخبرننا.
اكلمهم اليوم ومحد يرد.
يمكن أُسيء الظن بي لترويجي لبعض الأشخاص أو بعض الشركات وصراحة أذكرهم كمثال وامتنع عن اعطاء أي شخص اسم شركة أو مقاول والإسم فوق تغير حسب الشركة الجديدة وما ذكرته كان مثال
واجهت مشاكل مع البعض يعتقد إني كفيل الشركة ويكلمني حتى لو ما ردوا عليه ولا حبوا يشتغلون معاه لهذا الملاك أعرف ويعرفون الفرق بين الوهم والحقيقة
الوهم يجيك واحد بسيارة مكسرة حتى مب مرخصة وكلها أوراق وكتلوجات وصيغة عقده ورقة وحدة كلها بنود مالية .. والحقيقة تجيك شركة فيها بشر من مهندسين وحاسبين كميات وقانونيين وعقودهم كتيب كامل .. وبعضهم عندهم ردي مكس ومصنع طابوق وهم يديرون الشركة بعد مثال مثل آل سريع فهؤلاء أضمن وأفضل ومهما غلوا 200 ألف أو نص مليون زيادة تضمن مشروع واقعي وبنيان جيد وراحة بال
يعطيك العافيه استاذذ معماري قطري على الشرح الوافي
محتاج مقاول تشطيب يمسك لي شغل التشطيب كامل من الالف لين الياء ويكون عنده عمال ويخلص الشغل بفتره قياسيه. ياليت احد ينصحنا بشركه محترفه ومجربه من قبل.
شكرا
Apple's User
الله يعافيك ويوفقكالمشاركة الأصلية كتبت بواسطة blueZircon
لو متفق من البداية بناء وتشطيب أفضل لك لأن بهالطريقة تكون عرضة للابتزاز وبعدين كل شوي مقاول التشطيب قاط عيوبه على اللي قبله
أفضل نتفق على الشغل كامل ونحمل مقاول واحد مسؤولية كل شيء ومسؤولية الموقع وحراسته .. حتى لو بنشتري شيء وهو يركبه نحمله مسؤولية الفحص والاستلام والتجهيز للتركيب حسب المقاس قبل ليستلم وينقل ويحافظ على هالغرض ويخزنه صح
البلاط يحسب كميته مهندس مشرف ونتابع معاه لو بنشتريه إحنا .. والبعض يريح راسه ويذكر السعر في المواصفات ويروح يشوف بلاط في حدود السعر والمقاول يركب وهنا ما تهمه الكمية لو كسر المقاول هو اللي بيخسر .. لكن لو قلنا البلاط توريده علينا وعلى المقاول معاينته ونقله والمحافظة عليه لازم نحدد نسبة الهالك ونتفق على الكمية مسبقاً وبحضور الاستشاري .. بعض المقاولين يسرقون كميات من البلاط أو تنسرق منهم أو تتكسر أو يستلمها مكسرة ويقول لك انت اللي مورد لذلك تكتب واضحة في العقد
كل هذا مشروح في موضوع العقود ونقدر نستخدمها حتى لو غلطنا وسوينا مشروعنا على دفعتين عظم وتشطيب
متى نلجأ للعظم والتشطيب؟
في الغالب نلجأ لهذي الطريقة لو عندنا وقت ونبي نبني براحتنا ولا عندنا مبلغ كاش كفاية .. نسوي البنيان عظم والمفروض نضمن حمايته أقلها ببلاستر ودهان برايمر حتى ما يخترب البلاستر ونسوي عازل السقف حتى ما تخترب الخرسانة
ثم نتفق اتفاق ثاني أو عدة اتفاقات على التشطيب .. لو عدة اتفاقات لازم نحط في اعتبارنا التنسيق بين اللي يشتغلون ومن يبدأ قبل لذلك نخلي شغل الكهرباء والميكانيك على مقاول يشتغل تحت مقاول تشطيب البناء والصبغ والعناية بالموقع .. مع الأرضيات إن أمكن وكانت مب تخصصية مثل الرخام واللي ممكن نطلبه من مقاول مختص .. النوافذ والأبواب نخليها اتفاق منفصل بس نحدد مسؤولية مقاول تشطيب البناء حتى يحضر الفتحات ويسوي لها برايمر والبعض يخليها مغلفة بالخشب أو بالحجر أو الرخام خارجياً ومن داخل خشب .. subframe وهذا ينطبق على الأبواب والنوافذ
على المالك طبعاً أخذ وصول استلام المقاول لكل المواد من الموردين لو قررنا إحنا نشتري المواد .. خصوصاً الصحية والكهربية لو شريناها بجودة عالية واستلمها المقاول وبيركبها حسب مواصفات التركيب وصل الاستلام يعتبر وثيقة وأي شيء يصير فيها المقاول مسؤول عنها .. حتى لو تنسرق من الموقع هو المفروض حاط ناطور ثقة ومسوي حماية للموقع وعنده تأمين ومسؤول عن شراء نفس المادة أو أجود منها وتركيبها لو انسرقت
نصيحة لحد يدور الرخص عند بعض اللي ما عليهم مسؤولية ومهدودين في الشوارع ولا بقد المسؤولية .. ذيلا يضرون أوقات ولا ينفعون ولو شافوا نفسهم خسرانين يبيعون الجيد من المواد ويركبون غش خصوصاً لو ما فيه اشراف قوي
ضوابط المشاركة
رد مع اقتباس