خفوا علينا يالاعصاب

[JN000N]

السلام عليكم ورحمة الله وبركاته

،


،



في أمور تصير في الشارع تخلي الواحد وده يحرق اللي قدامه بتيزاب (مب أي واحد.. هولك هوقن وواريور والاندرتيكر)
كلش صايرين مالهم بارظ وكلن نفسيته في خشمه وكل واحد متنرفز وكل واحد يبي يوصل بسرعه وعدال ياللي تواقيتكم انجليزيه يالملتزمين ياللي تحسبون طلعتكم ف الشارع بالثانيه

ندري البلد زحمه ندري الشوارع ضيقه ندري ونجوف وواقع نعيشه كل يوم وندري ان وفود دخلت قطر من اشكال وانواع الثقافات

بس عاد مب على أي شي الواحد يستوي فيها ابو البطوله ويقفل ويعصب ويزاعق وهو ماعنده الا الضعوي

من كم يوم في محطة بترول عند الصراف الالي كان في سيارتين قدامنا واحنا الثالثة
خلص الاول وكان واقف جنبه واحد نازل من سيارته ياي يسحب فلوس (طبعا رايح يشيك بترول وعلى حسن الظن انه ماكان عنده كاش يدفع فنزل يسحب من الصراف فطم يعبي سيارته بترول)
يوم يا الواقف يسحب المفروض عقبه السياره الي قبلنا ايي دوره
واحنا نسولف مب منتبهين الا نسمع صراخ وسب وهواش على وشو!
(هوغن) ف سيارته يوم شاف الريال واقف على ريله ياي يسحب من الصراف ما خلى فيه ولا بقى بس عشان ياي يسحب واقف
وان هو (هوغن) صاف سيارته وينطر الدور ليش هذي ياي قدامه
زين ترى كان واقف ينطر هو بعد السياره الي قبلك تخلص
وبعدين؟
لا صج وبعدين!
بتخلص فلوس المكينه مثلا والا شنو؟
بسرعه ماخذ له الموضوع دقيقه طول ما هذي يسحب هوغن قاعد يزاعق خاطره شوي ويزوع جبده من الزعيق والي يسحب يتعذر منه ويقول له بس ثواني وبخلص ماعندي كاش حق البترول
خلص المسكين وعلى فكره كان عربي
راح سيارته الي كانت عند البترول ودفع ومشى وهو رايح من الخرعه بطل الدريشه وبعد قام يتعذر من هوغن وهوغن كانت لحين اعصابه فالته الادرينالين طايش
يا دورنا واحنا نسحب انا قاعده اطالع هوغن وين بيروح على هالسالفه اللي سواها
الاخ عقب ما سحب بدل ما يلف قانونيا ويرد يصف ورا السيارات اللي بتشيك بترول
يا من قدامهم وريوس ووقف ويلا تعالو عبولي بترول
لا ياشيخ!
احلف عاد

توك مستويلي فيها كاتب قانون الأدب في الشارع والحين انت مخالف مخالفه صريحه ياي واقف قدام الطابور اللي وراك ضاربهم بعرض الحيط

شنو ذي؟ لا وهالاشكال نفسها هي اللي تستقوي ويسوون نفسهم فيهم اعصاب ويتنافض ويتراعد جنه غساله ثياب تنشف ومن ينزل له اللي فالسياره الثانيه ويجوف شضخمه قدامه يقلب قطو كاسرين ريله ويتعذر وهو يطالع الارض ويشل عليه


ندري انكم اقوياء وابطال وقانونيين وتمشون بالقلم والمسطره ما تخطئون حشى عليكم سيييده ماعندكم كيري ميري
بس معليه خفو عالمخالفين الفقارى صيرو طيبين شوي سامحوا
مب على كل شي الواحد يطامر فالشارع
بالله طمرت ونط لك عرج ف راسك وانبط شبينفعك صراخك فيه؟


مادري شصايد العرب يبيلكم هلكبتر حزه الزحمه يرش عليكم مهدئ اعصاب والا مكونات تخليكم سعيدين ف الشارع ومبتسمين

[بوحارب]

يبيلهم ضرب مب رشه السعاده


والله جنون من حقه يتنرفز راعي الموتر بس مب بالطريقة هذي ويعني الصراف خلاص حق الناس اللي في سياراتهم كيف يجي ويدخل بين السيد !!

بس قهرني يوم خالف في المحطلة صج انسان فاشل هههههه

[Riku3]

وايد نشوف من هالاشكال للاسف .. المشكلة لو تسافر برع وتشوف الناس شلون رايقة وما تعصب تتعجب وتتمنى اخلاق العرب تكون كذا مب الاجانب !! ..

المشكلة هالاشكال تربوا على ان كل شي حق مشروع لهم من طفولتهم اعوذ بالله .. "يزيدون صوب شيكاغو" .

مره حصلت زحمة غريبة على لفة فريج ونطرت 5 دقايق وزادت الزحمة لين الشارع الرئيسي .. عقب ركبت الرصيف ودخلت الا احصل نيسان واقف عند بقالة طالب شي ومعاند الي وراه ومايبي يتحرك !! .. وانا فوق الرصيف شفت الي في السيارة حصلته شاب حتى خط الشنب ما طلع عدل ههههههه .. طالعته واشرت عليه وضحكت وهزيت راسي الحمد لله والشكر .. الا احصله مسك الهرن معصب علي ههههههه .. زين ان كان صاف غلط وما قدر يلحقني والا ما ادري شكنت بسوي فيه عقب .

ومن 6 شهور شاب دعمني من ورى والاشارة حمره .. نزلت اسلم عليه ما رد .. قلتله الحمد لله على السلامة ما رد .. قتله ما تشوفني واقف والاشارة حمرة هني رد يقول من بريكاتك !! .. هني سويتله محاضرة وخليته غصب يقولي الله يسلمك لاني قلتله الحمد لله على السلامة @_@ .. بس مع ان تم ساكت تقدر تشوف في عيونه ان خاطره يذبحني من كثر ما هو معصب مع ان هو الغلطان انا رابع سيارة على اشارة حمرة شيبيني اسوي مثلا .

ريلاكس يا ناس @_@ .

[JN000N]

يبيلهم ضرب مب رشه السعاده


والله جنون من حقه يتنرفز راعي الموتر بس مب بالطريقة هذي ويعني الصراف خلاص حق الناس اللي في سياراتهم كيف يجي ويدخل بين السيد !!

بس قهرني يوم خالف في المحطلة صج انسان فاشل هههههه

اي بس الريال مثلا ماكفته الفلوس الي ف خباه وهو رايح يجيك بترول وصاده ظرف يعني سيارته اصلا عند البترول
خلاص يموت؟
اكو الصراف حذاه وواقف ينطر حاله حال اللي ينطرون والا بس عشان ما كان صاف بسيارته صار غلطانه
الصراف موجود ف الشارع للي واقف وللي بسيارته الا اذا مكتوب عليه (لسائقي السيارات فقط؟)
هو ما يا فجاه ووقف سيارته حذانا ونزل يسحب ولا جنه موجودين هو كان يشيك بترول

[شيخ الديرة]

صارت معي نفس القصة، ترخصت من الاخ اللي بالدور، وقال أبشر يالطيب.

اعتقد ولو الناس عندهم احترام وطول بال، لكن تنقصها مهارات التواصل وتسهيل الدخول بدون مشاكل

لو قال من رخصتك يا أخ، لا شك عندي ان الأخ مستعد يعطي من مخباه لانه احترمه وترخص منه

[بانغ بانغ]

التحويلات والزحمة لها دور

احيانا الاسيويين اينزفزون الواحد

صحيح التحلي بالاخلاق العامة بالشارع شي ضروري لكن احيانا الواحد وده ايكون مايك تايسون

نتمنى بس ان في شرطة متخفين لرصد هالتصرفات مثلا في الاسواق والمحطات واماكن التجمعات العامة

اختي جنووون بعض الناس صدقيني اصراخهم اكبر منهم .... مثل البالون اشكبره وداخل كله هواء

[الحياة الخالدة]

عليكم السلام ورحمة الله وبركاته
والله يا أختي جنون .. بصي حضرتك
مثل ما احنا نلقى العذر حق نفسنا .. المفروض نلقاه حق الآخرين
أنا ما أبرر تصرف هالشخص أو غيره
لكن احنا ما نعرف ظروف الناس
ممكن أي حد فينا يكون مكان هالشخص في يوم من الأيام
طولة البال .. والصبر و التحمل أمور مطلوبة من الجميع
لكن كلن له عذره
الحالة المزاجية ( متهاوش مع مرته مثلاً ) .. المادية ( نص الشهر وطالع ) .. حالة الطقس ( الحر الشديد ) وغيرهم وغيرهم
والله المستعان

[السكين]

ايه والله بكل مكان ورمضان على الأبواب والأخلاق تكون في الخشم من هالنوعيات !

الأخلاق والأدب والذوق تعتمد على الشخص وتربيته !

أنا قبل فترة كنت بستار لنك وواقف على الكاونتر أنتظر الفلبيني يطلع من الورشة ، جا واحد ووقف قدامي .. ولما طلع الفلبيني قعد يكلمه وأنا واقف ، فجأة انتبه الرجال انه سوى شي غلط وقعد يعتذر مني ورفض قطعياً إلا أنا أخلص أول ولما قلت له عادي بكل رضا رفض وحلف ما يخلص قبلي ، هذا انسان خلوق بس يمكن ما كان منتبه أو شي ..

المواقف كثيرة ومضحكة ومبكية لكن نتمنى الجميع يتحلوا بالصبر ولو على حق !

[Rider]

الموضوع حلو وفيه تشويق لكن الواحد في زمنا هذا ماعاد يتحمل لانه فعلا فيه ناس ينرفزون وهذا كل بسبب الزحمة في كل مكان والله المستعان

[khalid Qtr]

هذي ممكن نسميها محاكمات الشوارع!
كل واحد يبي ياخذ حقه بيده ولسانه، الهدوء الهدوء، ولا تنسى دعاء الخروج من المنزل.
وتسامح، ولكن لا تسمح لأحد بالتجاوز عليك، ورده في حدود الاحترام.