انواع خشب الابواب

[Azizuk]

سؤال لأهل الخبرة في انواع أخشاب الابواب

طبعا زرت اكثر من منجرة للاستفسار عن انواع الابواب وأنواع الأخشاب وايش الأفضل والأحسن من ناحية الجودة

الكل مدح خشب التيك المعروف

وحتى خشب التيك في منه انواع اللي هو البورمي والهندي والافريقي وعلى حسب الجوده ونظافة الخشب

وفِي نوع اللي هو خشب البلوط

وخشب الزان

وخشب الاش

وخشب المرنتي اللي هو معظم البيوت اتركبه بسبب رخص سعره وان عملي

وبعد عندك انواع الابواب في سولد وسمي سولد

وفِي الكبس اللي هو فريم ويتركب عليه خشب كبس وينضرب بمسمار

وفِي بيبان تنحط لها حشوه من الداخل على ماضن انها تكون حشوه خشب أم دي اف

ومن ناحية صبغ الباب هل ممكن صبغ خشب التيك اَي لون وإلا لازم يكون ألون البني المعتاد ودرجاته

لأني حاب اصبغ بيبان البيت بلون فاتح

المناجر اللي تم زيارتها من اكبر المناجر الدرويش والمفتاح وفِي مناجر صغيرة وذات جوده عاليه تمت زيارتها

السؤال ايش تنصحوني في يا أهل الخبرة

سالت عن أسعار خشب التيك يتراوح سعر المتر المربع بين 19 الى 20 الف ريال هل هذا صحيح وإلا اصحاب المناجر يبالغون في الأسعار

[بوخالد911]

اللي أذكره عدل بشارع سلوى محل المفتاح
لقيت خووووووووووووش باب غرفة
سألت عن السعر
قالوا : 10000 رياااال !!!!
عليه حفر مش طبيعي

[Azizuk]

الله يسلمك بوخالد

انا زرت منجرة المفتاح ماعليهم كلام

عندهم خط انتاج على مستوى

وعندهم شغل محترفين حفر على الباب وشغل نظيف

وغرفة صبغ

اللي عرفته من جولتي على المناجر خشب البلوط متوسط السعر ارخص من التيك

بس اهل الخبره هم اللي يعرفون للخشب

[معماري قطري]

إخوي بو سعود خشب الميرنتي من أقوى الأخشاب والله منعم علينا به في منطقة آسيا برخيص

قريت مرة عنه إنه مرغوب في أمريكا وهي بلاد الخشب في كل شيء يتم استعماله

بعدين الأهم من أي خشب مصنعيته وجودة التركيب والطبقات والحماية والصبغ

شوف للقفول بعضها خذ النوع اللي بالبصمة وفيه نوعيات متطورة بصمة ورقم سري ولو فضت البطارية مفتاح .. وحطيت مقطع عن نوع يسجل من يدخل ومتى دخل حسب بصمته وحسب برمجته لو لدخول عدد أكثر من شخصين

المتحدة عندهم تصنيع مصنع مختص وصبغ ورشة زين ويجيك الباب بقراطيسه ويتركب في الأخير حتى بعد التأثيث لو تبي .. الفتحات لو أكبر من اللازم يوازنونها بقطع خشبية تحت الفريم ويسكر معاها البرواز ما تبين

انا المنجرة وقعت معاها أول بأول بس هم أكثر شيء تأخر شغلهم وخذت آش مع قشرة خشب الورد أظن والقشرة غالية وتتعالج معالجة خاصة .. تعاملت مع منجرة النور قبل وألحين سمعت إنهم في الصناعية

بس توقع تأخير تقريباً مع الكل والمتحدة يقولون شهرين يوردون ويركبون في خلال هالفترة واخوي ركب من عندهم .. وعندهم الربلات حاول تطلبها هذي تخلي الباب لو يرقعه أي حد ما تسمع له صوت .. وبعدين يسكر عدل ويعزل الصوت

بالتوفيق لك ولا تتأخر أكثر ولا تركب سولد لكل الأبواب وللحمامات ركب اللي فيه لوفر خشب ثابت ما يهتز حتى يستوي عندك كروس فنتليشن بسهولة ولا تخترب مراوح الشفط