نتمنى نشوف هالأشياء في مدارسنا

[معماري قطري]

ما شاء الله الحكومة ما قصرت في الصرف الكبير على المدارس وتصميمها لكن فيه بعض النواقص وبعضها تم تعديلها بصورة غير صحيحة مثل مخارج الحريق والطواريء .. هذي شفتها كيف تم تركيب درج حديد مزعج وباب خروج عادي مقفول ومفتاحه عند أحد المشرفين في الدرج

انا حسب معرفتي لهذي الأبواب بأنها تكون والواحد يركض يضربها وتنفتح للخارج وليس للداخل .. لأن وقت الطاريء الخروج يكون سريع وبعدين حسب العدد الموجود يتم توزيع هذي المخارج وبحيث تكون مضمونة الوصول للمجموعة المتواجدة في مكان أو جهة معينة من المبنى بما يعني إن باب واحد ما يفي بالغرض .. ثاني شيء الباب لازم يكون مربوط بجرس إنذار يصيح من ينفتح وينذر الباقيين ولو حد فتحه ينعرف ويتحاسب لو مب وقت حريق أو مشكلة طارئة .. وشيء مهم آخر في الغالب أبواب الطواريء للمستشفيات والمدارس والمولات تكون صفاقتين بعرض بحدود 2 متر وأكثر ولو كانت زجاج تكون غير قابل للكسر أو ينكسر ويتناثر بدون ما يجرح .. ويكون فيها قاعدة عريضة لو ضربها الهارب برجله ما يصيب الزجاج وكذلك عارضة وسطية للدفع باليد .. العرض ضروري لخروج أكبر عدد من الطلاب

كذلك الدرج للنزول لازم يكون محمي ومغطى وسعته مناسبة وخصوصاً للتجمع في بدايته تكون فيه مساحة كافية

هذا شيء والشيء الآخر قلة دخول النور الطبيعي للمدارس واستوت شبه مغلقة ونعرف نقص فيتامين دال وكثرته وهذا أحد أهم أسبابه وأكيد هناك أُمور كثيرة بعضكم لاحظها وعرفها وممكن يشارك بها

هذي صور لبعض المدارس حول العالم حتى نعرف شكثر فيه فن في البناء والاستعمال والترفيه للطلاب

[معماري قطري]

الأخير صندوق فيه أكياس اللي بفقاعات حتى الواحد لو متوتر يضغط عليها وتهدأ أعصابه

[بوخالد911]

اللي يبط الجبد
لما يكون المفتاح عند موظف وهو مسافر
!!!

[معماري قطري]

اللي يبط الجبد
لما يكون المفتاح عند موظف وهو مسافر
!!!

لو تكرم رايح الحمام الحريق ما ينطر

[معماري قطري]

الزحلاقيات هذي ترفيهية أكثر وتحتاج الطلبة ينتظمون وحد يشرف عليهم وقت النزول ربعنا بيتداعمون وينحشرون فيها

[سالم الزهران]

والله يا ابو عبدالله هذي اشياء اساسية و لكن المقاول ما يعرف يسوي الا النموذج الف وباء وجيم اللي وارثينه من الثمانينيات

اما بالنسبة للمدارس والتعليم عموماً (وعذرني لوخرجت عن الموضوع) فالهم كبير وقبل المباني نبغي ننشدهم عن النظام التعليمي اللي اشغلوا به خلق الله و تحصل المعلم يكتب مسكين على حاسوب وعلى سبورة وعلى دفتر تحضير ويسوي تقارير ويتابع الطالب فلان و يسوي انشطة خارج الفصل ويمسك جماعة المسابقات و يرتب معهم للحفلات اللي في المدرسة و بعد كل هذا يبونه يعلّم ( بل مركب مكينة جمس )؟

انا ما اشجع و لا اوافق على وقت المدرسة الموجود حالياً ولا طريقة التعليم و وضع المعلمين المزري و الخمسطعش مادة اللي يدرسونها ويطلعون بلاش حتى قرآن ما يعرفون له. كلام اقوله واعرف وش اقول اني لا حظت ان عيالي استفادوا من ( ناشيونال جيوقرافيك ) اكثر من مدرستهم و خاصه في العلوم.

يبه احنه متخلفين و ما راح نتطور ....

[معماري قطري]

حياك الله إخوي بو زيد

عندي صور ثانية باحطها إن شاء الله دامجين الوسائل التعليمية في المبنى وإحنا عندنا ملامح من هذي بس نحتاج ابتكار أكثر

عن التحضير والنسخ للمعلم هذي طريقة فاشلة وكنت اشوف مدرسينا في أمريكا يعيدون حتى أسئلتهم سنين طويلة وممكن يضيفون شيء بسيط .. هو ملف واحد يضيف عليه حسب المستجدات لكن ما ينسخه كل سنة

المفروض المدرس يعطى مهام محددة وهو يسويها ويطور نفسه وكذلك لو فرضنا للمدرس ساعات تدريس + ساعات مشاركة إدارية + ساعات مكتبية وممكن حتى نضيف عليها برامج تدريبية في المدرسة حتى يتطور .. ووقت فراغه هو حر يسوي اللي يبغي انت تطلب منه أداء ما تطلب منه تواجد دائم وساعات محددة

[بانغ بانغ]

حجي بوعبدالله

مفهوم السيفتي معدوم عندنا بمدارسنا

ما تعلموا من فيلاجيو

[معماري قطري]

هذي مجموعة ثانية نشوف فيها كيف الإبتكار حق مساحات اللعب للأطفال خصوصاً للروضة ومن أول لثالث إبتدائي أو الإبتدائية بالكامل



حتى المطر يجمعونه فوق السطح وينزلونه في الساحة الداخلية للعب الأطفال والنور الطبيعي يدخل ساحة المدرسة مع ممراتها

[معماري قطري]

عندنا بعض الروض ما تحصل فيها حوش كلها مغطاة ببنيان رخيص بدون مراعاة للخطر والحريق