ماذا بعد شراء الارض ؟

[boaabid]

السلام عليكم ورحمة الله وبركاته

مبارك عليكم الشهر وتقبل الله اعمالكم

الحمد لله تم شراء قطعة أرض سكنية لغرض السكن

السؤال: ماذا بعد شراء الارض؟

الي اعرفه وضع المخطط والاحتياجات الحالية والمستقبلية

يرجى من الإخوة/الأخوات الكرام المشاركة

وما لنا غنى عن خبراتكم وتجاربكم والخطوات اللازم اتباعها

احتياجاتي: الطابق الأرضي عدد صالتين كبيرة وصغيرة مفتوحين على بعض
+ غرفة ماستر + غرفة طعام + مجلس نساء مغاسل حمامات (الله يعزكم)

الطابق الاول: 5 غرف نوم ماستر

الطابق الثاني: استغلال المساحة المسموحة لبناء عدد غرفتين ماستر

ملاحق خارجية : مطبخ + غرفة خدم ماستر + مخزن + غرفة كوي/غسيل

مجلس خارجي للرجال + مغاسل حمامات (الله يعزكم)

وهنا أضع صورة من مخطط الارض

وشكراً على مشاركاتكم مقدماً وبارك الله فيكم

وبالتوفيق

[معماري قطري]

الله يوفقك ويعينك ويبارك لك في الأرض والبنيان

شوف موضوع دراسة المخططات المعمارية واختار مخطط ترتاح لتوزيعه وبانقله لك على الأرض ولو حبيت باغير فيه بحدود معقولة

أشوف اللي عملته انا صالته على زاوية بيكون مناسب حق أرضك واستغلاله للمساحات زين وتوزيعه زين .. هو مستطيل بعض المخططات زعلوا أصحابها يعتبرونها براءة اختراع وبعضها مرحبين ويعينون ويعاونون .. لو حاب اللي على زاوية هذا اشتغلت فيه وايد ومنه كم نموذج حول 4 بعد يمكن يناسب

[م. عبدالعزيز]

الله يوفقك اخوي ومبروك عليك شراء الارض
انا تقريبا قعدت اخطط تصميم بيتي حوالي سنة ، اعطيك اياها من الآخر ، هذا هو الملخص:

اول نصيحة: صراحه انا ما استفدت عدل في تصميم وتخطيط المنزل إلا بعد ماشاركت في دورة اسمها كيف تبني بيت العمر في النادي العلمي

هذا رابط خبر قديم ، ولكن الدورة سووها هالسنة في النادي العلمي ، حاول تتواصل معاهم تشوف اذا عندهم دورة قريبة

الدورة وايد مفيدة وتشرح لك شنهي اساسيات المنزل القطري ، وشنهي الكماليات، والابعاد الادنى للغرف ، وتوزيعة المساحات..الخ

http://alarab.qa/story/301071/%D8%A7...B9%D9%85%D8%B1

واذا ماعندهم ،،، تواصل مع بنك التنمية عندهم دورات مثلها يسوونها كل شهر.

ثاني نصيحة : صمم بيتك على احتياجك وعلى ميزانيتك ، لا تسمع كلام فلان وعلان ، محد يدري عن وضعك المالي وعن احتياجك غيرك.

ثالث نصيحة: روح أكثر من مكتب وخل كل مكتب يسوي لك سكش (لانهم أدرى بقوانين البلدية). عطه احتياجاتك وبتلاقي افكار جديده ماتجي على بالك. ولا تستشير حد من الشباب مب خبره في البنيان.

وانا حاب اشكر اخوي معماري قطري على نصايحة اللي قدمها لي وعلى مواضيعه المتميزه ، اقراها لاني استفدت منها. وايضا الى باقي الاعضاء في هذا المنتدى اللي استفدت من خبراتهم.

واحنا بخدمتك اخوي boaabid

[معماري قطري]

صادق مهندس عبدالعزيز

بس كبداية واستطلاع الواحد يتجه للمنتدى أفضل وبعدين توجد طرق كثيرة للتحكم في الميزانية وفي جودة البناء

بعدين ما ننسى إن اللي بيبني 500 متر أو بيبني 1000 متر بيبذل مجهود مقارب ومهما يكون بيدفع ممكن مليونين حق 500 متر و 3 مليون حق ال 1000 .. ودوم النصيحة إن الواحد يزيد شوي ولا يقتر على نفسه ويحسب حساب المستقبل ولو يقدر يخلي قسم خاص بغرفتين وصالة فوق وبانتري وممكن مخزن حق أحد العيال في المستقبل ويستغلها أي استغلال في الوقت الحالي بعد أفضل

أدوات إننا نتحكم في السعر لو السعر مهم جداً كثيرة وصحيح أهمها ما نبالغ في المساحة لكن كذلك نسوي تصميم مدروس انشائياً واقتصادي .. ممكن ندفع 10000 حق مهندس انشائي شاطر يصمم بحسابات وأرقام ونوفر 100000 من الخرسانات والحديد .. وممكن ندفع 1000 ريال لمهندز زاد الله من زاد ونوفر في سعر التصميم لكن نخسر في قيمة الخرسانات زيادة 100000

ممكن نسوي جبس حق مجلس بس بقيمة جبس حق كامل البيت .. وممكن نسوي حجر ب 400000 وصادفت واحد محصل تسعير ب 900000 وانا ناصحه بما إن بيته كبير ومكلف ما يسوي حجر وكانت خطته يسوي ديكور مغربي أو أندلسي والبيت فيه كسرات لكن انصدم بالأسعار اللي قلت له عنها قبل وقرر يغير التصميم لحديث .. المشكلة تأسيس البيت غير وهو في وسط المسافة قرر يغير وما ندري وشي تكون النتيجة

بيت أحد كبار الأغنياء ما شاء الله قصر كبير وعلى مساحة كبيرة بس معمول كله بصبغ أبيض عادي بدون بهرجة زايدة .. هذا طلع ( وقور ) وثابت ما يتغير يستوي رمز جمالي ومنها وفر وجع قلب وتعب تركيب وشغل الحجر وقيمته المرتفعة

صحيح فيه أساسيات لازم نسويها صح مثل الكهرباء والتصميم المدروس وإختيار مواد عالية الجودة للمياه وللأرضيات .. مب شرط عالية الجودة تكون خيالية السعر أهم شيء نبتعد قد ما نقدر عن المنتجات المصنعة في بلدان بدائية ولا عليها ضبط جودة .. طقم حمام ألماني مع الخلاطات دوم يسون عليه عرض في تدمر ب 1500 كارماخ على سبيل المثال .. وفيه سعودي أو اماراتي أو صيني بجودة ثانوية وسعر أعلى أو مقارب .. وهنا نتبادل الخبرات والأسعار ونذكر المشاكل اللي تواجهنا وتجاربنا والنقاش دوم غير ملزم والقرار في يد المالك

بخصوص الدورات في النادي العلمي كلمني صاحب شركة حتى القي محاضرة ووعدته بالموافقة لكن لاحظت إنه يبيني أكون مقتنع بأن التقصير من الملاك وعدم فهمهم قلت لا اختلف معاك والملاك فاهمين ويسعون للمعلومة لكن التقصير من القوانين الركيكة ومن الاستشاريين ومن المقاولين المتربصين اللي يقرون العقد الناقص ويستغلون الثغرات فيه لرفع السعر .. تصدق قال بيننا اتصال ومن ذاك الوقت ولا سمعت صوته .. هذي الدورات للأسف البعض يسويها لعرض شغله وعقده وانا ما اذكر جهة محددة .. دورات بنك التنمية أكيد أفضل بس المطلوب منهم تحكم أكبر وتوثيق للعقود واشراف عام على الاستشاريين وطريقة عملهم ولو فيه تجاوزات يرفعون تقرير للجهة المسؤولة وتحاسب الاستشاري والمقاول

بعض الاستشاريين مستهزئين بكل قوانين الممارسة الهندسية لدرجة استشاري قال انا ما اروح الموقع والمقاول يجيب التقرير لي وانا اوقعه بس .. هذا لو في دولة فيها محاسبة ما يقدر يقول هالكلام ويخاف على نفسه .. وبياخذ 8000 ريال وزين نبهت المالك وفهمها وابتعد عنه .. كنا نطالبه بتقارير مصورة وتس أب عن كل زيارة وتعليق كلامي وفيديو سريع للزيارات هنا انكشف سحره .. شمتنه من قعدة المكتب حتى كرسيه تكسر لا يرحم الكرسي ولا يرحم نفسه

[بوخالد911]

الله يسهل عليك.