خبراء لندن ... أرجو المشورة ..

[asulaiti]

الإخوة الكرام ...

اقترب موعد السفر للعلاج في بريطانيا .. ولدي بعض الاستفسارات أتمنى من الإخوة أصحاب الخبرة أن يفيدونا فيها ..

لا أعرف شيئاً عن شركات الاتصالات في لندن .. فأي شركة تنصحون بأخذ كروت الجوال منهم ؟
أهم شيء أن تكون تغطيتهم ممتازة وسرعة الانترنت عندهم ممتازة .. ما أحب الشركات الرخيصة نظراً لرداءة الخدمة مقابل السعر الزهيد ..
لذا أفضل الابتعاد عنها ...

أيضاً .. هل جرب أحدكم تأجير سيارة في لندن ؟؟
خصوصاً وأن مقود السائق على اليمين .. بل الاتجاهات في الشوارع عكس السير .. ما أدري .. أخاف أخربط وأدعم !!
وما أدري هل (دواسة البنزين) بعد عكس المعتاد عندنا !!
ههههههه

عموماً .. ما أعرف بس يمكن أطول هناك وقلت يمكن أحتاج أجر سيارة .. ولا تنصحوني بالتعامل مع السائقين ؟؟

والشكر مقدماً لكل من يدلي بدلوه .....

[شموخ دائم]

,

,


مرحبا


اخوي الكريم

انا مو خبير بلندن زرتها الزيارات العاديه جدا على ما يدخلون الخبراء بقولك تجربتي

جربت التلفون اكثر من شركه ولقيت ان ( فودافون ) الأفضل في الاتصالات والمكالمات الهاتفيه
الارسال عندهم ممتاز يغطي كامل لندن تأخذ خط لشهر مع انترنت 35 جنيه

اما اذا تبي الانترنت واستخدامك كثير على النت تحتاج شركه ( 3 ) ثري
تعطيك انترنت ( مفتوح ) لشهر واكثر الي يستخدمون برامج التواصل سناب وتويتر وانستجرام يفضلون 3
لكن الشبكه للاتصالات لك عليها شوي

بالنسبه للسواقه ما انصحك صعبه وبنفس الوقت مشكله كبيره ( المواقف ) راح تدفع مخالفات اكثر من تذكره الطياره كنت مع واحد من الشباب يسوق هناك شفت المخالفات عنده شي مو طبيعي مع انه عاقل بالسواقه
المواقف مشكله كبيره هناك بتتعب من هذا الموضوع


المواصلات متوفره عندهم من باصات الى تكاسي الى ( اوبر ) متواجدين على طول بكل شارع وامام كل فندق
بصراحه افضل شبكه مواصلات بكل اوربا
اذا عندك مواعيد بالمستشفى روحها بتاكسي افضل لك
وتكاسيهم مجهزه حتى للكرسي للمرضى بعيد الشر



خذ هذي البطاقه اسبوعيه للقطارات والباصات شي عجيب كل دقيقه في باص يوديك كل مكان
اركب الباص وطقها على الجهاز وروح دربك خضر


ترى لندن لا تغتر فيها 3 كيلو × 3 كيلو الأماكن الي الناس تتمشى فيها
شارع أكسفورد والهايد بارك وشارع ريجنت والباكدلي والهارودز وشارع العرب ادجوار رود
مربع تدور فيه

تقدر تلفها مشي كلها والله اذا لياقتك زينه




وتقدر تأخذ سياره وسايق حق المشاوير المهمه او الطويله او البعيده او اذا عندك حد كبير بالسن
تأخذ رقم تلفونه ويجيك على الاتصال او على الطلب

ما تحتاجها كل يوم

,

,

[monatee]

ماقصر شموخ دائم

بالنسبه للانترنت اذا شفت زحمه عند شركات الاتصال وهذا المتوقع اساسا

ممكن تروح محلات التلفونات في شارع العرب ( ادجوار رود ) عند محلات العراقيين
قولهم تبي انترنت ولا مكالمات فور جي .. الخ ، وراح يعطونك الكرت الي يناسبك

ونفس صفه المحلات عندهم تاجير سياير ،، لكن مادري احس اسعارهم اغلى من الشركات الي برى
انت شوف السعر اللي يناسبك

[aloosh]

نصيحه عند عمل عقد ايجار اقراء الشروط لان العرب هناك يتلعبون كثير ممكن تسكن وبعد ما تدفع يسوي لك مشكله علشان تطلع
اقراء العقد لان مجرد ما تمضي على العقد يلزمك بكل بنوده وهذي لعبه العرب اللي في العقارات هناك

[ذكي جدااا]

بالنسبة لكروت التلفون عندك شركة ثري 3 ممتازه للإنترنت تعطيك تقريبا 15 جيجا ب 10 باوند هذا طبعا اذا اشتريتها كتعبئة نفس نظام هلا. اذا اشتريتها كنظام فاتوره واتوقع صعب بيكون ارخص بكثير بس عيب هذه الشبكة انها فقط للإنترنت ماتقدر تتصل تلفون الا عن طريق الوتس اب. الشبكة الثانيه اللي دايما استخدمها وتوني جاي من بريطانيا اسمها ليبارا ولونها ازرق lebara. في بكجات كثيره تعبي 30 باوند يعطونك 10 باوند بالاضافة للاتصال الدولي لقطر الدقيقه تقريبا 25 بينس يعني الباوند يكفي حق اربع دقايق بالنسبة لي كنت استخدم مكالمات الوتس انصحك فيها الكرت بتلاقيه يتوزع بالسوبرماركات وبكل مكان بباوند واحد بعدها ممكن تدخل اي سوبرماركت وتقول له ابقى كريدت لشحن بطاقة ليبارا وبيعطيك وممكن تدخل على موقعهم للنت.

[ذكي جدااا]

بالنسبة للسواقة ببريطانيا انا عشت هناك فترة ولافكرت اني أسوق لاني خايف من موضوع السواقة العكس لانه شكلي بجيب العيد. كنت استخدم الباصات. على حسب كل مدينه تختلف التسعيرة طبعا لندن بتكون اغلى شي. بشمال بريطانيا سجلت بمحطة الباصات يعطونك كرت بخمسين باوند تستخدم اي باص 24ساعة لمدة شهر كامل فقط بخمسين باوند مفتوح يعني. فافضل شي انك تروح محطة القطار وتسجل بطاقة لكل شخص اذا عجبكم التنقل بالباص وممكن تسألهم عن الرسوم بس مادري رسوم المقيمين كالطلاب وغيرهم نفس السياح اللي يجون شهر او شهرين الله اعلم. التكاسي غاليه طبعا اي مشوار ممكن يكلفك 15 باوند وانت طالع.

[asulaiti]

أشكر الجميع على الإفادة ..

أنا بالنسبة لي أخطط أخذ كرتين ... واحد للاتصالات .. وكرت للانترنت احطه في جهاز MiFi .. علشان يبث الانترنت للآيفون وللآيباد ..
وفي الشقة لو أن الانترنت مال المبنى ضعيف ... وفي الآماكن العامة ..

إلا إذا لقيت الشركة اللي باخذ منها كرت مكالمات .. عندهم عروض زينة لباقة البيانات .. يمكن آخذ من عندهم ..

لكن ما يهمني هو .. سرعة الانترنت وكمية البيانات مقابل الاشتراك .. حسب ما فهمت من المشاركات أن شركة 3 تعطيني 15 جي بي .. مقابل 10 باوند ..
- لكن كيف السرعة والتغطية ؟؟
- يعني فرضاً رحت كم يوم شمال بريطانيا زيارة .. هل تغطيتها ممتازة هناك ؟ أم فعالة أفضل في لندن ومحيطها ؟

حسب الآراء ومداخلات الكرام حتى الآن .. ترجحت كفة فودافون للمكالمات وكفة ثري 3 للانترنت ..

بانتظار آراء أخرى وشكراً لكم مرة أخرى على مداخلاتكم ...

[ذكي جدااا]

نعم كرت ثري للإنترنت وطبعا تختلف العروض حسب المواسم وحسب نوع الكرت فاتوره او تعبئة. بالنسبة للمكالمات شوف كرت ليبارا وهو تابع اصلا لفودافون والدقيقة ب 25بينس تقريبا لقطر. اما كرت فودافون غالي جدا حسب ماكنت هناك قالوا لي الدقيقة بباوند ونص تقريبا لذلك انصحك بكرت ليبارا طبعا انا اتكلم عن المكالمات الدولية لقطر اما المكالمات الداخلية ببريطانيا معظم الشبكات رخيصة. و بالنسبة للتغطية معظم الشبكات هذه مغطية كل بريطانيا وبينهم منافسات

[المحقق كونان]

استخدم كرت شركة 3 pay as you go بسعر 25 باوند النت مفتوح على كيفك ويعطونك 500 دقيقه و3000 مسج بس داخل بريطانيا ولكن تعبئه كل شهر ب 25 باوند وتتصل وتفعل الخدمة في دقيقه

فودافون إرسالهم أقوى ولكن سعرهم أغلى وأكثر المجمعات وهارودز وبعض الممطاعم فيها وأي فأي ببلاش

بالنسبة للسواقه في لندن مانصحك زحمه وصعب تحصل مواقف بسرعة اما خارج لندن ماعندك مشكله

استخدم اوبر وفيه خيارات وأيد سيارة عاديه سيارة كبيره سيارة كشخه

استخدم الباص بالبطاقة Oyster card

فيه برنامج حلو يحدد مكانك وتحط المكان الي تبي تروح له ويحط لك الطريق وأي وسيلة مواصلات تبي مثلا لو اخترت باص يحط لك ارقام الباصات الي توديك ووقت ومسافة الطريق

City mapper