أتوقع اغلب الشركات لمقاولات الي ممكن غير معروفة او صغيرة او متوسطة نوعا ما وبعد ممكن غير معروفة
تكون مشتركة مع مناقصات لكن ترفع سعر المناقصة من 5% 20% -+ ع حسب المناقصة
بحيث الكل مستفيد شركة الي اهي مناقصات وهي ماخذة حقها الي اهي المقاولات.
هذا بعتقادي عن الشركة هذي للعلم اذا وقعت معاهم انت ملزم انك لو كنسلت لاي سبب سواء اشتغلوا لك او ما اشتغلو راح تدفع مبلغ معين لمناقصات من ضمن القوانين.
فالافضل انك تروح بنفسك وتسوي شغلك صح فيها عبالة لكن الزيادة انت اولى بها عن غيرك لانها راح يدفعونك اياها من غير ماتحس ع المبلغ وهذا الله أعلم.
وممكن انت تسأل عنها زيادة.
ممكن الحسنة الموجودة الي لاحضتها ان لو صار مشكلة مع المقاول وقف مشروعك يتحول لشركة اخرى تروح لمناقصة ثانية وتكمل هذا حسب فهمي البسيط ولها اتوقع شروط كذلك.
القرار لك ولو وقعت ما تقدر تطلع الا لازم تدفع لو ما وقعت أي استشاري يسوي لك خدماتهم ومناقصة كجزء من شغله .. مناقصة الاستشاري تختلف بأنه يدفع شركات المقاولات قيمة طباعة الورق أو السيديات وهي تافهة عند الكثيرين
عمري ما بنيت الا وتابعت وحللت المناقصة مع استشاري واخترت المناسب مب شرط الأقل .. بنيت وايد لي ولهلي ولأقاربي تجاري وشخصي وأفضل هذي الطريقة وشارح كل شيء في موضوع العقود ولا ودي استرسل أكثر
لا تغترون باستشاريين الشنطة ولا مقاولين الشنطة .. شوفوا دوم اللي له مقر وموظفين وكيان موجود وترخيص ساري والأهم تقييم من ناس جربوا الشغل ونشوف له مشاريع تستوي .. الاستشاري اللي يقول لك ما اسوي تقارير اسبوعية ولا اصور وارسل لك شصاير بالتلفون هذا نصاب ولا منه فايدة وكل شغله يوقع ويتابع من المكتب .. المقاول اللي ما عنده مقر وادارة ومكان تجتمع فيه وتقرر وتناقش بعد نفس الشيء ولازم كل شيء مكتوب وموقع ومختوم
ما ابي اقطع رزق حد ولا جربت الشركة ذي بس من اللي عرفته شغل العمولات والنسب ورطة ومن اللي عرفته من البعض إنهم تعبوا مع الشركة أثناء التصميم
بعض المطورين مثل بروة عندهم نماذج تقدرون تشوفونها على الطبيعة بس عيبهم ما يبنون للخاص ويبنون لهم
موضوع النسب هذا موجود مع جميع الشركات الا الشركات اللي تملك شغل السباكة والكهرباء ويورد سيراميك و بورسلين ومواد
انا يوم جيت ابني قلت للمقاول شطب لي البيت تسليم مفتاح قال لي مانصحك لان التكلفة راح تزيد عليك راح اخذ منك عمولة 30% بس انت هذا الشركات اللي تنعامل معها واتفق معاهم افضل لك
ويوم سألت المهندس اللي كان يشرف على بيتي ليش تاخذون فايده قال مش احنا اللي راح نشرف على شغله ونتابع ونتواصل مع الشركات لازم ناخذ نسبة
اشوف نسبة 30% مبالغ فيها قال كل الشركات تاخذ نسبة
على سبيل المثال اذا التشطيب يكلف مليون المقاول ماخذ 300 الف ريال
يعني ممكن يطلع للمقاول شغل تشطيب البيت اغلى من قيمة العظم
عااااد كلامه صاج ان كل الشركات تاخذ هذي النسبة او يبي يشردني
على كلامه هو ياخذ تسليم مفتاح مجمعات سكنية وعمارات
والهدف ان المجمع السكني والعمارة مايتلعوز مع البنيان حجم مقاس الشبابيك مع الابواب واحد المواد المستخدمة لجميع الفلل نفس الشي الصبغ التشطيب بشكل عام بالنسبة له أسهل واسرع
عكس البيت الخاص هذا غير وتعال اختار وكسر وعدل والا هذا بنغيره شوي الا المالك مسافر انتظر لين يرجع عشان يروح يختار تعال كسر وعدل
كلامه صحيح ان المجمع والعمارة طقه وحده ومايتاخر في تسليم المشروع وربح اكثر
المهندس يقول في مشروع فيلا خاصه بعد ماصبو السقف البيت جات راعيت البيت وتبي تغير تركب مكيفات سنترال وطلبت ان نهد السقف بالكامل ونرفع السقف طيب يقول هد السقف وشيل المخلفات على من
مشكلة الفلل الخاصه ان المالك مايحسب قيمة التكسير والتعديل
لان لما تكسر تحتاج عامل وتحتاج شيل المخلفات وإعادة بناء وكل هذا المقاول يحطها على ظهرك
حتى المواد المستخدمة من مسمامير وقفازات وشبك حديد ومعظم المواد المستخدمة محسوبه عليك
انا يوم بناء عندي خله مواد وايد في البيت من قفازات مسامير مطارق وكيس نايلون وايد مواد خلها ورحت جمعته واشتكيت على العمال وجبت المقاول وصاحب الشركة قلت له شوف حجم الاهمال بعدين شرح لي قال هذي كلها كانت محسوبه عليك من جذي احنا نحطها على المالك ومانضيع وقتنا بعد مانخلص نجمعها
عاد انا ماعندي سالفه رجعت الاغراض عليهم قال شغل الشركات الكبار جذي في حاجة اسمها هدر مانفكر ونعور راسنا فيها
قدام بيتي جاري يبني واشوف في الوحة مكتوب مناقصات وشركة منفلوطي للمقاولات وشغلهم اشوفه ممتاز من قبل رمضان بشهر بداء العمل والحين بيصبون سقف الدور الارضي وصف الطابوق وعتبات الشبابيك والابواب معموله صب خرسانة اشوف شغلهم ممتاز
التعديل الأخير تم بواسطة Azizuk ; 10-06-2020 الساعة 07:49 AM
ذكرت أشياء مهمة يمر بها كل شخص بيبني .. النسبة هذي ممكن يصيدك أي مقاول فيها ويمكن أكثر لو كانت تعديل على العقد أو اضافة غير محددة أساساً ومحددة كمياتها في العقد .. أو يكون المقاول أثناء التفاوض صايد المالك صايده أوقات يطلع له أُمور ويزينها له وكأنها الحل الوحيد والأفضل .. مقاول وهو يحفر قال لي الأرض مايلة للخلف وأفضل تسوي بيسمنت .. بيني وبينه اتفاق محدد ولا احتاج بيسمنت .. غيري بيقول احسب لي كم يكلف بيقول ممكن 200000 وبتجي للتفاصيل فيها زيادة مدة وممكن تكلفة اعادة تصميم وبعد التفاصيل عادي يرفع سعره ل 400000 ويكون دخل الفكرة في راسك وسوى لك شغلة ترتب عليها تكاليف ووقت
انا وضعي غير وكان عقدي بحساب كميات وأي تعديل ممكن نحسب الكميات المضافة وعملية سهلة بس انتبهت له وقلت لا ما احتاج بيسمنت .. راح مرسل للاستشاري كتاب يطالب باضافة كميات الحفر والدفان وإنها أكثر من حساب الكميات .. بين إنه يبي فلوس فوق العقد بأي طريقة وإنه تورط في شغله بتكلفه ربح قليل ما يفيده ووقت .. الإستشاري رد بأن حساب الكميات استرشادي ومب شرط يكون دقيق 100% وهذا واضح في العقد وبأن حساب الكميات مبني على إن الحفر بس مكان القواعد مب الأرض كلها
عادي المقاول يقط ييمه للمالك لو بلعها وراها ما وراها من تغييرات وتفسيرات ثانية وتشكيك في الاستشاري وتفسيرات غير للعقد لو العقد ضعيف .. لذلك لازم تلتزم بتصميم واضح مقتنع به ومواصفات واضحة وتشيل بعض الأُمور الاختيارية عليك بس توضح حدود شغل المقاول الرئيسي فيها من الأساس
ليش انا اعطي المقاول بند النوافذ والأبواب والجبس؟ إذا ممكن اتفاوض مع مقاولين مختصين .. حتى الصبغ .. بس للأبواب اوضح كيف لازم يسوي الفتحة وبالمقاس المعتمد ما اجي وقت الشغل وسع لي والا ارفع الباب للسقف وبعض الحركات المجنونة اللي استوى فيها المالك فجأة مهندس ومصمم وصاحب قرار ارتجالي سريع
فيه مقاولين متفهمين ويساعدون لكن غيرهم يبون حقهم ومتسببين .. بنفس الوقت فيه ملاك غريبين الأطوار ويحسبون الشغل كله مفاصل وتغييرات بدون تكلفة يدفعونها وأكثر اللي يوصلون للمحاكم من هذي الفئة ويطلع المقاول له حق
ليش المخططات والتفاصيل الهندسية والمواصفات الخاصة هي الأهم وهي أساس العقد الهندسي؟ حتى يمشي الجميع على خطة هندسية واضحة والكل يعرف شبيحصل نظير فلوسه أو نظير شغله
تعال للشغلات الثانية اللي بتتفق عليها مع مقاول ثاني .. مثلاً العزل المائي والحراري في يدك تحدد التفاصيل وتضيفه على شغل المقاول الأساسي وتاخذ ضمان من الإثنين موقع منهم حسب ما تحب من سنين بس بالمعقول .. وفي يدك تتفق مع مقاول عزل ثاني بس تحدد شغل المقاول الأساسي في عمل السكريد المايل الناعم من البداية لو ناوي تسوي طبقتين سكريد والباقي على مقاول العزل اللي بتتفق معاه .. لازم تضيف في الاتفاق تعاون المقاول الأساسي بامداد مقاول العزل بالماء مثلاً وبالحماية للموقع والمعدات وأشوف الاشتراك في الضمان شيء مهم لأن غالبية قضايا التسريب والعزل يتفرطون منها الإثنين لو اتفقت مع مقاول عزل خارجي ونفس الشيء ينطبق على مشاكل الكهرباء والتكييف
لو باسترسل كتاب كامل ما يكفي
بعدين بو سعود تحديد نسبة للتنسيق لو المقاول يبي يفوز بالعقد في مناقصة بينزل نسبته بمكن ل 2% حتى ما يرفع السعر ويفوز بالمناقصة غيره .. ولو المناقصة مفصلة وفيها بند مثلاً العزل أو الأبواب مفصل بوضوح وبدقة وأثناء دراسة العقد والتفاوض حبيت تلغي هذا البند وتكلفته محددة ممكن الاتفاق بشكل مسبق على التعديل
المناقصة مثل انت بتطلب مثلاً ثياب لشركة عندك فيها عدد كبير وبتطلب قماش نوع معين بتجيك عروض ومعاها حتى عينات ومواصفات مكتوبة عن القماش وممكن حتى إختبارات معمولة وموثقة .. مثل الحاصل للزجاج والفريمات وطبقات الأبواب .. الكل بيتنافس يعطيك سعر تقبل به وينزل سعره لك .. لكن لو استويت انت ضحية بسعيك بروحك للمحل الفلاني وغيره ممكن تطلع وتشوف أشياء أفضل لكن لو عارف شتبغي بتلاحظ تفاوت في السعر وبعضهم يقدر يخدعك في أُمور كثيرة منها النقل لو البضاعة كبيرة ويقول لك التسليم في المخزن وتكتشف هالشيء بعد الدفع