سفرتنا هذا الصيف لجنيف + زيورخ + ميلانو

[معماري قطري]

باكمل اليوم صور جنيف إن شاء الله

لازم تجذبني المباني القديمة وأفكر في بنيانها ومن بناها وطريقة التفكير المعماري ذاك الوقت



هنا المبنى جزء قديم له فوق ال 100 سنة وجزء أحدث منه بكثير .. نلاحظ القديم واحتمال اكون مخطيء وله عمر طويل حول 400 سنة وفوق .. الحجارة تحت كبيرة وعريضة وعبارة عن حجارة جيرية كان يسهل جلبها لوجودها على سطح الأرض وليس في الجبال .. كما يسهل تشكيلها بطريقة يدوية .. وأنا على يقين بأن هذا الجزء من البنيان بني بدون أساسات بالمعنى المتعارف عليه حالياً .. الحجارة الكبيرة هي القاعدة ثم يصف فوقها الطوب الطيني اللذي يعالج بالحرق بالنار أو بالشمس

نلاحظ كذلك عدم اتزان النوافذ في خط واحد وتآكل المبنى بسبب التقادم









إطلالة غرفتنا كانت خلفية وهذا سكايلايت مطعم الفندق شبه مسطح



تفاصيل الحجر والرخام للمباني رائعة وجميلة ومتقنة













وهذا فيديو للبحيرة

[بوخالد911]

عساك ع القوة.

[معماري قطري]

عساك ع القوة.

الله يقويك إخوي بو خالد

[معماري قطري]

المرحلة الثانية كانت زيورخ ومنها رحنا للوزيرن وهي مدينة صغيرة تعتبر قرية وفيها بحيرة وكثير سياح .. مرتبة ونظيفة وحبيتها وتبعد حول نص ساعة ومدينة انترلاكن وبعد صغيرة ووسط الجبال وجايين حق صورهم

رحلتنا لزيورخ خذت حول 4 ساعات من ضمنها توقف نص ساعة للغداء في برغر كنغ سريع وخفيف وحسب رغبة الجمهور .. وصلنا الفندق المحجوز مسبقاً ومدفوعة قيمته عن طريق السفريات في الدوحة متأخرين ولا عطونا الغرفة المطلوبة قالوا هذي مؤقت لين بكرة بنغير لكم .. هذا فندق الماريوت وأحسن شيء فيه البزنس لاونج فيه خفايف وانا حبيت اتعشى بدري من 7 فيه والعشاء خفيف .. صراحة ما يسوى لأن على كل غرفة 95 فرنك وكل اللي يشربونه هناك قهوة وشاي وهو متوفر في الغرف مجان وبعض السلطات والأكلات اللي تنحط الساعة ست وتنشال 7 ونص وفي الليل يبقى شوية جبن وخبز الواحد يقدر يشتري للغرفة بربع المبلغ اليومي وياكل طول الفترة

إغتريت في الماريوت كإسم ومن اللي سمعته عن هذا الماريوت بالذات لكن ما عجبني نهائياً وانا عضو معاهم من زمان

أول غرفة عطونا الطابق الثالث وفي مبنى ملحق لمدة ليلة بس .. مطلة على سقف مزروع وفيه خلايا نحل والنهر يبين طرفه في الخلف





الغرفة باللون البني الداكن الكئيب





الثلاجة كانت ما تبرد عدل وهذي عادة الماريوت في كم مكان والأنسولين يحتاج برودة كافية والمشكلة يقولون جيبه بنحطه في ثلاجة أبرد وانا احتاج دوم ومع كل وجبة .. شكلي لازم اكتب حق ادارتهم



أكثر شيء حبيته التمشي في الحديقة قرب الفندق والمرور على هذا النهر من خلال جسر للحديقة





أشجار الحديقة كنت اشوفها واصلة الدور الثالث والفندق مرتفع .. صج أشجار ضخمة بعضها جذعها من تحت فوق المتر





هذي جذعها فوق المتر بس في الصورة ما يبين مثل الطبيعة





هذا فندقنا ورا الشجر



سور بسيط غالب الوقت مفتوح والظاهر حاطينه عن لحد ينام في الحديقة خصوصاً إنها فيها جامعة فنون أو عمارة لأني لاحظت مرات الطلاب يرسمون برا ويستغرقون في التفكير والتأمل



في أول مدخل الحديقة من جهة الفندق



الأسماك اللي في النهر





الجسر اللي يقطع النهر يودي للحديقة وراه وفندق الماريوت جدامنا فيه نفق بسيط يطلع مباشرة على باب الفندق



باواصل إن شاء الله مع الصور بكرة

[معماري قطري]

أكيد بارجع لصور الحديقة ومحيط الفندق بس اليوم بانقل مقاطع وصور لأول رحلة خارج زيورخ كانت لشلالات الراين

ما توقعت المنطقة كبيرة هشكل ولياقتي لكم عليها خصوصاً مع المشي في مناطق مرتفعة ونازلة وركوب درج .. كنت متابع للسكر وسوى لي رعب بنزوله السريع وخربت على البقية الاستمتاع لفترة أطول وزين وصلنا لمطاعم وتغدينا وانضبط السكر بصعوبة

هذا فيديو لجزء من الشلالات













وين راجي العفو بالصدفة حصلنا رفيجنا هناك بعد



المكان كبير وفيه مناطق كثيرة حتى الصخرة اللي في الوسط يروحون لها بالقارب



كانت الأجواء حلوة والبرد معقول ونزل شوي مطر

[معماري قطري]

مسافة الرحلة قصيرة ومن الفندق حط لنا العنوان اللي عند الباب في الجي بي اس وأنصح من يروح هناك يتفرغ يوم يروح من بعد الريوق مباشرة

[معماري قطري]

[معماري قطري]

هذا أحسن مقطع ومن تصويري

[معماري قطري]

أتابع مع لقطات من زيورخ وهذي لبركة ونافورة في الحديقة القريبة من الفندق



هذي جهة البنايات يمشي الواحد شوي ويوصل لموقع شركة هرتز لتأجير السيارات ويقدر يحصله في قوقل مابز ويمشي له بسهولة بعد ما يحجز .. لأنه مثل ما ذكرت ما يحتاج سيارة الا للمسافات الطويلة

وايد صورت هذا الجسر الخاص بالمشاة وتحته بايبات كبار مصبوغة هي اللي حاملته وبعدد بسيط .. دوم أفكر ليش ما يسوون مثله للمشاة للجزيرة على الكورنيش لتطوير الجزيرة



مقسوم نص للمشاة ونص للسياكل بس محد يلتزم في ألمانيا غير عندهم التزام قوي





ناس يركبون على حاجز الجسر ويطبون في النهر يسبحون وبعدين يركبون الدرج الموجود هناك





الجسر والأعمدة البسيطة اللي حاملته قبل المغرب الصورة غير واضحة



الجدار الخرساني الحامل لجسر السيارات وتحته نفق للمشاة والسياكل يوصل للجسر اللي يودي للحديقة



فندق الماريوت يسار الصورة وقريب منه جسر السيارات مسار رايح ومسار جاي وممر المشاة قرب النهر يوصل كذلك لمحطة القطار .. قناة النهر غزيرة وأكيد وقت الأمطار يرتفع منسوب المياه ويزيد جريان النهر وشفت هذا آخر الأيام





مبنى في مسافة وسط الحديقة فيه دورات مياه عمومية مغطى بلحاء الأشجار اليابس وسهل ازالته باليد لكن الكل يحافظ على منشأءات بلاده





الأرضيات بعضها بحص صغير بحدود سمك أقل من السنتيمتر وبعضها عشب وبعضها حجر مقصوص مثل هذي الصورة



الحديقة يفصلها من جهة مجرى النهر عن الشارع والبنايات



إتقان في تركيب أرضيات الحجر



العجيب ولا قطعة مشابهة للثانية



ممر البحص وبعده العشب والناس يلعبون



ميزة هذي الحديقة إنها تقريباً 0 صيانة أو فري مينتنانس على عكس حديقة اسباير واحد قال لي رقم ميزانية سنوية مهول لها ( 800 مليون ) والله أعلم





بعد جسر المشاة بمسافة قصيرة ينزل مستوى النهر ومسوين شلال صناعي وهذا مقطع فيديو له

[معماري قطري]