الشبكة الداخلية للصرف الصحي في الحمامات ...اعزكم الله

[$الملياردير$]

السلام عليكم ورحمة الله وبركاتة .... الله يمسيكم بالخير جميعا الأعضاء الكرام .... حبيت استفسر عن نصائحكم وتجاربكم بخصوص تنفيذ الشبكة الداخلية لشبكة الصرف الصحي للحمامات ... علما انه تم تنفيذ العزل وعمل طبقة من البلاستر كحماية ... هل يتم تركيب البيات على البلاستر مباشره وما هو افضل دفان يستخدم وهل يتم تركيب البلاط بالمادة اللصقة في الحمامات .... حبينا نسمع نصائحكم ونشط مواضيع المنتدى 😉... دمتم بود

[معماري قطري]

عليكم السلام ورحمة الله وبركاته

عادي لو تركبت على البلاستر .. إنت أصلاً بتكمل تركيب البايبات بوصلات صحيحة وبغراء يلصق الوصلات ولا ينفك طول العمر .. وهنا لازم تنتبه للجودة في المواد والشغل ولا تخليهم يدفنون الا بعد فحص بايبات الصرف عن التسريب بجهاز الضغط .. وكلما كان خط الصرف خالص بالكامل كان الفحص شوي أصعب وأشمل .. لأنه يوضح لك لو فيه تسريب داخل أو خارج والبايب متجه للصرف .. نسيت شكثر يكون الضغط بس اتوقع 2 بار كفاية لأن التصريف ما بيكون مضغوط وبيعتمد على الجاذبية

الشيء المهم الثاني سو اختبار مرور الماء شوف شلون يصرف كلك ماي مثلاً من جهة لجهة بدون ما يوقف أو يعلق يعني السلوبات مضبوطة .. وهذي عملية سهلة .. يحط كلك تحت ويصب كلك متروس ماي فوق وتشوف شكثر ماي ينزل وهل ينزل بسرعة

بالنسبة للسدادات عن الروائح أو ما يسمى الرداد هذا بينفعك عن الروائح والحشرات وحطيت طريقته في يوتيوبيات البناء

بعدين يجي الدفان برمل مغسول وخالي من الأرضة والشوائب ولو متشكك شوية دواء للأرضة ترشها عليه بيكون ضمان أكثر .. وفوق ينعمل بلاستر ثاني بسلوب بسيط جهة الصرف .. ولفحصه جيب تيلة ( عاد دبر نفسك التيل هالوقت وين تحصلها ) أو كورة صغيرة حطها في أي طرف أو زاوية وشوف وين تتجه بدون ما تدفعها .. لو وقفت معناها الماي بيوقف ولو تحركت لازم توقف عند فتحة الصرف

بعدين يجيك التبليط وانتبه للمواد وطريقة تركيبها .. بعض الروبات تنخلط بسائل خاص وبعضها بالماي وبمقادير معينة ويستحسن بخفاق كهربائي .. وبعضها ضروري الخفاق الكهربائي .. ولو يتركب البلاط بالقطع البلاستيكية اللي توازنه وتخلي كل بلاطة 100% في مستوى الثانية أفضل لك وهذي لها فيديو بعد في موضوع يوتيوبيات البناء .. القراوت منه أنواع ومنها ما تسرب كلش ولا يتغير اللون وأغلاها الايبوكسي وهو أقواها بس يحتاج عناية شديدة في التركيب والمسح بسرعة لو لصق على السطح ما يطير بسهولة .. الوسط فيه أنواع فيها ألوان وحبيبات القراوت رفيعة جداً يجي مثل البودرة وينخلط بماء ويستوي مثل العجين .. هذا تقدر تغامر بألوان غير تكسر لون البلاط ويوجد منه عند المتحدة مجربه ووايد زين .. أرخص شيء الاسمنت الأبيض وكثير عمال يحبونه ويقنعون الملاك به بس بعد فترة يتقشع ويتغير لونه يسود ويعفن

[$الملياردير$]

جعل والديك في الجنة ومشكور ع ردك ... احلى شي في الموضوع التيل ... ��

[معماري قطري]

جعل والديك في الجنة ومشكور ع ردك ... احلى شي في الموضوع التيل ... ï؟½ï؟½

حل رخيص وسهل ويوضح لك السلوب بدون أخطاء وهذا تسويه قبل التبليط حتى لو فيه خطأ يصححه اللي يسوي البلاستر والعملية سهلة أصلاً المفروض يسوونه صح من البداية لكن بعضهم شغلهم لك عليه أو يتعمدون يضرون

شيء مهم لما قبل هذي المرحلة اللي هو العازل المائي يستحسن نركبه بعد تبليط الحايط ونترك الصف السفلي من البلاط لما بعد العازل .. نمدد العازل لمستوى نص البلاطة الأخيرة حتى يغطي أي تسريب جانبي يبقع على الجدران سواء من الخارج أو الداخل .. بعدها نحط على الطرف الظاهر شوية مونة ونركب البلاطة الأخيرة .. بتبقى شوي ضعيفة لكن لين جات بلاطة الأرضية بتصك عليها وبتستوي ثابتة أكثر

كلها تحتاج وزن وقياسات دقيقة .. لو حابين نترك تحت بلاطة كاملة والحواف تكون مستقيمة نسوي خط مبدئي حق مستوى البلاط وين بيكون وهذا لازم يكون متساوي أو تحت بشوي عن باقي أرضيات البيت .. فوق هذا الخط بحدود 10 سم يطلع العازل تحت البلاستر ونخلي فراغ كافي حق آخر بلاطة كاملة ونبدأ وزن البلاط بحيث نخلي الجزء العلوي فيه القص ومن تحت تكون عندنا بلاطة كاملة وتصك على حافتها بلاطة الأرضية

البعض يسوي تصميم خاص بحيث يخلي البلاط قليل وفي أماكن الرطوبة والباقي صبغ أو ورق جدران مثل صور كثيرة تم شرحها في موضوع المطابخ والحمامات وهذا لازم يتم تحديد مكان البلاط ومستواه قبل التنفيذ وحسب المخططات المعمولة

[@north_star@]

نصيحة اخوي بالنسبة لبايبات صرف الشاورات والمغاسل والمطبخ خلها 2" مب 1-1/2" او 1-1/4" عشان الانسدادات بالمستقبل خاصة المطبخ والشاور لانه أكثر شي التسكير يصير منهم وبالنسبة للمواد اللاصقة للبلاط والسيراميك بتحصل مادة اسمها فوسروك وكيلها شركة تدمر وتعتبر من أفضل المواد اللاصقة اللي فالسوق

[معماري قطري]

نصيحة اخوي بالنسبة لبايبات صرف الشاورات والمغاسل والمطبخ خلها 2" مب 1-1/2" او 1-1/4" عشان الانسدادات بالمستقبل خاصة المطبخ والشاور لانه أكثر شي التسكير يصير منهم وبالنسبة للمواد اللاصقة للبلاط والسيراميك بتحصل مادة اسمها فوسروك وكيلها شركة تدمر وتعتبر من أفضل المواد اللاصقة اللي فالسوق

العادة هذي البايبات تجي 2 انش وانا مرة قلت لو نسويها أكبر أفضل ما ادري 3 موجودة أو لا

[@north_star@]

العادة هذي البايبات تجي 2 انش وانا مرة قلت لو نسويها أكبر أفضل ما ادري 3 موجودة أو لا

اشوفلك الغالبية 1-1/2" و3" اظن متوفر بالسوق وأكيد انه افضل من 2"

[معماري قطري]

اشوفلك الغالبية 1-1/2" و3" اظن متوفر بالسوق وأكيد انه افضل من 2"

اللي يبي بايبات انجليزية بيحصلها في محطة بترول عزيز .. هيبوورث لهم مخزن كبير ومكاتب هذي جودتها عالية

[@north_star@]

اللي يبي بايبات انجليزية بيحصلها في محطة بترول عزيز .. هيبوورث لهم مخزن كبير ومكاتب هذي جودتها عالية

نعم صدقت اخوي معماري هيبورث من افضل الشركات وهالشركة تابعة لشركة الطيب

[معماري قطري]

الحمد لله كل شيء موجود في قطر لكن المشكلة في الدعاية لهذي المواد وهذي الطرق وغالبية الاستشاريين والمختصين ما يدرون إذا المادة أو طريقة التركيب موجودة .. قناعاتهم قديمة وبدون بحث وتطوير

مشكلتنا في بعض المواد المنتجة محلياً واقليمياً وصينياً ما فيها ضبط جودة وفيها عيوب تصنيع كثيرة ولا تلاحظها .. تركب بايب سميك وجيد لكن يجيك فيه جزء بسيط ضعيف أو فيه عدم تجانس وشقوق مجهرية تكبر مع العمر .. أو فيه طلاء ناقص في مكان معين .. أو مثل ما عرفت عن تصنيع جبل علي لبايبات النحاس بأنهم يخلطون النحاس بمواد ثانية وغالبيتها معاد تصنيعها مثل الحديد والرصاص وغيره .. بعضها ضارة وبعضها تسبب صدأ وتآكل

بايبات البي بي ار التركية والصينية نفس المشكلة ما تخلى من رداءة المادة ومشاكل التصنيع وهي تقليد للألمانية والسويسرية اللي هم أوائل المصنعين لها وبضمان على جودة التصنيع لمدة 50 عام وتتحمل الحرارة حتى في الخارج ومكشوفة