أسعار العقارات ونصب الدلالين

[القلب المؤمن]

السلام عليكم ورحمة الله وبركاته

طبعا مثل ما أنتوا شايفين من العنوان فهو عن العقارات والفوضى في أسعارها ونصب الدلالين اللي الواحد الصراحة احتار متى الدولة بتحط القوانين وبتحد من استغلال الجنسيات المعهودة اللي تتلاعب فينا
الله يسلمكم انا مالي خبرة في مجال العقارات كلللششش بس جمعت مبلغ وخاطري أشتري لي عقار وأجره استرزق من وراه
جيت من كم يوم أشوف الفلل المعروضة وانصدمت طبعا بالاسعار الخيالية في بعض المناطق المفضلة عندي ..
وأنقل لكم الحوار اللي دار بيني وبين الدلال من المكتب العقاري:

أنا : لو سمحت أنا عاجبتني هالفيلا بس للأسف غالية بالنسبى لميزانيتي معروضة ب10مليون هل ممكن صاحبها ينزل سعرها ؟
الدلال:والله صعب الفيلا سوبر ديلوكس وسعر الارض بروحها...والفيلا جديدة والمنطقة اصلا غالية وعليها طلب ....الخ
أنا : اوكي خلاص اشوف غيرها
الدلال: بس أنا بسأل لك صاحبي هو يعرف صاحب البيت
بعد ربع ساعة***
الدلال: والله أنا كلمت الدلال اللي يعرف صاحب البيت وقال انه ممكن ينزل ل9 وهذا اخر كلام
أنا : تمام أنا توني ماشفتها عالطبيعة بس من مواصفاتها بعد ماتستاهل هالمبلغ
الدلال: والله انا ممكن احاول لك شخصيا مع صاحب العقار
أنا : اوكي اذا تقدر تنزل بعد يا ريت
بعد ربع ساعة***
الدلال: هو وافق على 8.5 شرايج ؟
أنا : لا للأسف خلاص بشوف غيرها
الدلال : انتي كم ميزانيتج قلتي لي ؟
أنا : ماكس 7
الدلال: والله هو صعب بس انا بحاول معاه اكثر وبرد عليج بكره
أنا : )
بكره***
الدلال: صاحب البيت وافق على 7 بس بصعوووبة
أنا : (بموت من الضحك نصب ب3 ملايين عاد!)

وللعلم مب هذي الفيلا الوحيدة اللي شفتها ونزلوها 3 ملايين ؟! وبالنهاية بعد ماتستاهل يعني اللي ماعنده خبرة بالعقارات بيشتري وبيقصون عليه ومافي قانون يحمي حقوقه وفلوسه اللي له سنين يجمع فيها
شنو برايكم الحل وشلون ممكن تنحط قوانين تمنع هذا النصب الفظيع اللي يصير لنا احنا أهل قطر الطيبين اللي نعامل الناس بحسن النية ...

[مخطط قطري]

اتفق معاج بس ماتوصل عاد لهالدرجه من 10 لين 7 والدلال هو الي يثمن الحين الاغلب صارت عنده ثقافه ولو بسيطه عن اسعار العقارات الشي المبالغ فيه لاتاخذه والشي الي سعره حلو لاتردد شله

[جيلان]

أولا طالما بتدخل في السوق لازم تسأل وتقعد فترة تتعرف عليه
مب الواحد يوصله مبلغ معين يقطة في أي مشروع بدون سؤال

ثانيا هذه طبيعة عمل العقار
الدلال له نسبته فهو يحاول يوفق بين الطرفين

ثالثا الأسعار تشهد تراجع حاليا فقبل فترة كان بيثبت السعر على ال10 لكن حاليا يضطر يتراجع..

رابعا الحذر واجب طبعا
يوجد في السوق الغث والسمين..

والله يوفقك في عقار مناسب ويربحك فيه

[ابو عبدالله.]

شراء عقار مثل شراء السياره لازم في الي يرفع والي يضارل والي ببيع بسرعه الخ

الافضل قياس العقار بموقعه وعمره و وضعه المستقبلي و قيمه العقار مقابل الايجار

اول فيلا شريتها 2005 كانت ب 850 الف ولولا ان الوسيط صديق ما كنت شريتها لانها اخر فلل في منطقتي و بعدها بر بمد النظر

السبب في الشراء انه قال لي ان وراها بيكون شارع رئيسي لكن بعد سنين وقال كلمه. وهو صادق. فكر بالعقار ايش بيصير مستقبلا

اليوم في سارع ورى الفيلا 63 متر عرضه فهذا الوضع صار لان الوسيط امين ولولاه ما شريتها

نفس الوضع بمنطقه الوكير. قالوا ما تسوى الفلل و ايجارها بسيط وتحمل تستثمر حلال عيالك

بس بحثت بجوجل طلع لي عن مشاريع اشغال و خط سريع ومدارس و منطقه اراضي حكوميه اكثر من 5 الاف ارض

فلل البندري كانت ب مليونين و 150 الف قبل انتهاء المشروع و الي قال لي ضيعت فلوسك وكلام ما يشجع

بس خلصت الفلل وصلت مليونين و 900 وتآجرت على شركه بسعر اعلى من ايجار فلل بالدوحه

الخلاصه ان البحث يجتهد فيه الشاري و يعرف قيمه العقار الايجاريه و المستقبليه و المشاريع الي ستتم بنفس المنطقه

ودائما من الافضل تحويش مقدم زين عشان يكون القسط اقل من نصف الراتب اذا ممكن و خلال خمس الى ست سنوات تقسيط

لان التقسيط على مدد اطول يرفع ارباح البنك على المستلف فتكون قيمه العقار اعلى مع الارباح مقابل الايجار

هذا للاستثمار طبعا اما الي يبي يسكن وما عنده ارض حكوميه فلا مانع من مدد اطول عشان القسط يكون مقبول نسبيا

اخر نقطه. مش كل عقار ينشرى. مهم جدا معرفه من بنى العقار لان في فلل جديده ما اشتريها حتى لو بسعر الارض فقط. لا تصميم ولا جوده ويبي لها شيل بلاط و عوازل بالكامل. حرقه قلب على الفاضي

[كرواتيا]

ابوعبداللع تعال بسرعه انصحني ابي اخذ عقار للاستثمار ويكون لؤطة *_*

[نمر بن عدوان]

مثل مامرت فتره كان المالك هو الامر الناهي والشاري يدفع وهو يضحك صار اليوم العكس العروض كثيره والاسعار في تراجع مستمر والصبر زين لان اتوقع مع قرب انتهاء مشاريع كاس العالم راح نشوف تراجع محترم اكثر من الحالي.

[doha_vip]

والمشكلة الكبيرة دخول بعض الجنسيات العربيه في سوق العقار .. سواء البيع او الايجار

الله يكون في العون

[Riku3]

كنت ادور عقار نص الدائري الثالث وعجزت بسبب الاسعار الجنونية .. مع ان الشارع اكثر من نصه معروض للايجار ولا في حد يأجر .. بس محد راضي يبيع الا باسعار ما قبل الازمة والعائد ما يسوى @_@ .

[SouthK]

اكثر من 10 سنوات و انا ادور بيت يسوى سعره .. لقيت اللي يمشي الحال على رجاء ان اللي قال "خل الناس تكسب" يحس بأن سوق العقار في قطر ما عاد سوق!

[SouthK]

مثل مامرت فتره كان المالك هو الامر الناهي والشاري يدفع وهو يضحك صار اليوم العكس العروض كثيره والاسعار في تراجع مستمر والصبر زين لان اتوقع مع قرب انتهاء مشاريع كاس العالم راح نشوف تراجع محترم اكثر من الحالي.

سمعت عن انخفاض في الاسعار لكن في حل بسيط يقضي على مشكلة الاسعار الخيالية في سنتين لكن اتحدى احد ياخذ القرار بفرض ضرائب على العقار الفاضي او الارض غير المستغلة!