زين ليش ما نفكر تفكير اقتصادي بحت
بعض أغطية المنهولات صالحة وتحتاج تعديل بسيط كاضافة روابط تثبيت بلحام بسيط أو براغي وكتركيب حشوات من ربر أو بلاستيك أو غيره من المواد حتى حبال الخيش تنفع مع شوية زيت لجعلها محكمة الاغلاق وثابتة وما تطلع صوت
الهبوطات حول المنهولات حلها سهل .. نشيل الأسفلت حولها بحدود معينة ونحفر ونركب حديد بدريل ولاصق ايبوكسي في جسم المنهول الخرساني ونصب خرسانة حوله تخلي الحديد ينشبك مع الخرسانة الجديدة ومشبوك مع خرسانة المنهول ومكون كتلة صلبة ثابتة ونسوي الأسفلت فوق الخرسانة بحيث نراعي المستويات مع باقي الشارع وكان الله غفور رحيم
لأي مشكلة حلول هندسية سهلة وحلول هندسية مكلفة وصعبة
الشارع اللي جدام بيتنا اخترب منهولات خافق حولها وتعرجات .. مسوينه حق دولة فقيرة مب حق قطر .. لا وشوي انترلوك تعيس من قبل 2006 وقت الأسياد للحين توهم التفتوا له ويشتغلون فيه ألحين آخر الليل والله يعيننا على الضجة
المشكلة جاو يشتغلون حول الساعة 11 والناس موقفين سياراتهم برا لا حطوا تحذير ولا شيء
انا اعرف فيه منهولات هيفي ديوتي وانا مركب منها في البيت ولا واحد يتحرك لو داسته السيارة ولا يسوي ضجيج .. في شوارع العزيزية اللي سووها من فترة بسيطة وايد من المنهولات بدوا يرتفعون والسبب بسيط التربة حولها مخلخلة مهما يدكون ما يقدرون يقربون من جسم المنهول .. تبدأ التربة تتفكك خصوصاً بعد تسرب أي مياه وتستوي تعرجات وهبوطات لأن القار مرن ولا يشيل وزن السيارات فوقه لو ما فيه تحته تربة .. بنفس الوقت جسم المنهول صلب ومثل الشوكة تضغط الجلد حولها حتى تطلع
صب اسمنت حول المنهول يقوي التربة ويخليها تتحمل دوس السيارات وفوق يحطون طبقة القار .. يمكن أبسط عامل يعرف هذا الإجراء
غير الاهتزاز عند مرور السيارة لبروز الأغطيه او إنخفاضها عن مستوى الشارع تسمع الاصوات المزعجة
و توجد حلول كثيرة يا بو عبدالله مثل ما تفضلت
أبسطها تغيير أماكن المنهولات في المشاريع و الطرق الجديده .. و تكون في الارصفه والجزر بدل ماتكون في وسط الشارع
و السؤال : عند استلام المشاريع من المقاولين .. ماتكون لدى هيئة الأشغال مراجعه للمشروع ؟؟
قبل الاستلام تجي المواصفات والتصميم والعقد .. بعدين الإشراف على التنفيذ من قبل مختصين فاهمين .. حتى تقييد المقاول بإجراءات سلامة وحماية صحيحة ضروري .. أمور بسيطة انا اشوفها اضحك على المقاول وعلى المشرف عليه .. تكلمت قبل عن قطعة الحديد اللي يحطونها لتسكير حفر مؤقت حق تمر عليه السيارات وشلون حوافها بارزة تقطع تواير السيارات الرياضية والصغيرة وتهز السيارة هز .. ونقلت ما شفته في ألمانيا يستعملون نفس الحديد بس طريقة التنفيذ يثبتونه بقار مخلوط مع رمل .. كل المواد موجودة بس التنفيذ يتأخرون فيه يمكن نص ساعة زيادة ويكون صح .. القار مع الرمل هذا ينحط حول الحواف المرتفعة بحيث ارتفاعها يكون تدريجي والحديد يكون ثابت الله أعلم لو بمسامير خاصة تغرسه في الشارع أو القار يجي تحته ويعبي الفراغات ويثبته .. اندهشت يوم شفت الطريقة منفذها مقاول في معيذر ستي .. مكان ثاني المقاول حاط الحديد وقايل له اقعد ولا تتحرك ومن تمر عليه تسمع قرقعة ويتحرك ممكن لو حد يضرب بريك عليه يسحبه واللي وراه يطيح في الحفرة
في العزيزية بعد ما خلصوا الشوارع ارتفعت المنهولات شوي وجابوا المقاول دكها وقص منها شوي بعد بطريقة بدائية وترقيعية وهذا هي رجعت ترتفع لأن الشغل غلط ولا كمل 3 سنين يمكن
بالنسبة لعمل المنهولات في الرصيف ممكن بس صعب لأن هناك خدمات ثانية مثل الكهرباء والتلفون وامداد المياه .. ممكن تنعمل من البداية وتصمم أنفاق خدمات خاصة تنحط فيها كل هذي التمديدات وتكون محمية لو حصل تسريب ينكشف بسرعة ويتصلح وهذي عملوها في الوسيل وبعد في الوسيل مشاكل تنفيذ شكثر سمعت عنها وكل شوي وشوي نشوف حفريات في المشروع والمشروع توه بقراطيسه
خلصوا الشارع اللي جدام بيتنا وكان وصلة قصيرة شالوا الانترلوك ودكوا سريع وحطوا قار في الليل .. شغل زين بس تمنيت يكملون الشارع كله لأن المنهولات شكثر وكلها خفقات حولها وهذا بعد ما صلحوا تصليح ترقيعي بسيط .. المفروض الشوارع تستوي كاملة مب رقعة رقعة .. مب لنا كقطريين عادي إحنا نتحمل بس لسمعة البلد وحق الزوار ( يا حبنا للفشخرة )
السؤال من يعوضه لو ماعنده تأمين شامل على السياره
اشغال ولا البلديه
اتوقع ردهم بيكون قضاء وقدر
الله يعوضه خير صاحب السياره
طبعا بيفتحون تحقيق وبيحسبون سرعة السياره
عشان يطلعون صاحب السياره غلطان
المفروض حل اصل المشكله وعدم القاء اللوم على احد
طالما الخلل من تركيبة المنهول الخاطئة
سبحان الله وبحمده