خطورة أغطية منهولات شوارعنا

[Dana’1]

يا الله
الله يعين هالعمال بالمقطع حق الهند مافيه اي سيفتي لهم لا لبس ولا المكان ولا غيره

بالنسبه للموضوع
صحيح كم مره نمر عليها والسياره تهتز كأنها مطبه .. يعني الا ما تهتز السياره ماعدا من قليل تسلك عادي

المناهولات بالجبيل الصناعيه جدا ممتازه ... هذي صوره لاحد اقدم احياء الجبيل الصناعيه هذا حي الطفوله ... من تصوير أختي بعد رحله استرجاع ذكريات الطفوله
بالصدفه بعد الموضوع كنت اتفرج عالصور فقلت اشارك فيها
ولو تلاحظ وانت بكرامه درام المهملات معدني .. هم زين للنظافه وعدم التسريب بالذات وقت المطر وغيرها ويتم صيانته وتعقيمه بشكل دوري
مرات تفاصيل صغيره بس تفرق كبييير من نواحي كثيييره

[معماري قطري]

صباح الخير اختي ديور عليج وعلى الجميع

هذا معناه إن التكنولوجيا ذي سهلة ومتوفرة بس يبغي لها شخص مفتح

كذلك موضوع الصيانة والترقية شيء مفروغ منه لكن قليل نشوفه يتم

بالنسبة لي عارف هالأشياء من زمان وملاحظها وحسب الفرصة أذكرها لكن هناك من يبررون ويكابرون ومنهم مهندسين كبار ومختصين طرق .. ما ادري هل الشغل الصحيح مستحيل والا إحنا نحب نشوه جمال مدننا

[معماري قطري]

مرة ما انساها مريت على مشروع بسيط وهو ري للزراعة في طريق مهم .. بالضبط طريق المرخية المؤدي من دوار التلفزيون للجامعة .. وانا واقف في الزحمة دققت في الشغل وشفتهم مركبين بايبات بي بي ار ومحابس الحمراء الرخيصة اللي تجي الواحد بحدود 20 ريال وكله تخترب .. توقعت الشغل رديء وبيحتدون يصلحونه

بعد الدفان والزراعة والشغل المكلف تفاجأت بهم شايلين كل شيء وحافرين حتى يصلحون خطوط الري .. يعني فشلت في فترة قياسية والسبب رداءة الشغل وكان الوقت بعد انتهاء الشغل بحول شهر الى شهرين .. ما ادري ليش أوقات في مشاريع كبرى تحتاج شغل ومواصفات عالية يستعملون شيء رخيص جداً ما نستعمله في بيوتنا والمقاول اللي يركب يكون مقاول عادي ورخيص يعينه مقاول قوي هو اللي ماسك المشروع تحت نظر وموافقة مدراء المشروع وهذا قمة الشغل الرديء واتحفظ اقول الفساد

[ثابت]

نطالب من الجهه المختصة ان تجد حل بديل الي هذا الامر الخطير الذي قد يكون الضحية التالية انا او انت

[ya3coub]

و السيارات الي تتكسرت من تحت و تضررت كم مره صادتني و للأسف مافي اي تعويض ولا حتى تعديل.

و مره بالسعوديه كنت مسرع و الي جدامي داس شي بالشارع و كسرلي الجامه الأماميه بالكامل لولا حمايه رب العالمين و الي عالسياره و العازل جان انا رايح فيها لأن القزاز تكسر بالكامل.





في طرق وايد احسن و المفروض اتكون عالرصيف بجانب الطريق بس ربعنا لا وسط الشارع مادري ليش

[معماري قطري]

نطالب من الجهه المختصة ان تجد حل بديل الي هذا الامر الخطير الذي قد يكون الضحية التالية انا او انت

في طريق قصير قرب بيتي جزء منه انترلوك مركب من 2006 ومن تركب تموج وتحفر ولا تصلح الا من كم يوم .. والعجيب صلحوا جزء وخلوا جزء كبير وواضح .. ما ادري شلون يفتحون والا يشوفون

على الجهة الثانية منهول مستوية حفر حوله والسبب واضح من رداءة الدفان .. حل هذي المشكلة بسيط جداً بدال ما تدفن وتدك اشرف عدل واطلب صب خرسانة لإغلاق الجزء المتبقي من الحفرة .. ولو المقاول يدري انه بينسحب بعد 20 سنة لو استوت مشكلة من هذا القبيل كان بيصب خرسانة بنفسه وبيفتك

بعض الحفر حول المنهولات وجسمها يكفيها متر مكعب أو مترين مكعبين خرسانة وسعرها يتراوح بين 300 - 400 ولا فيه داعي لحديد والا خرسانة قوية حتى الخرسانة المرفوضة في المشاريع تنفع

[معماري قطري]

و السيارات الي تتكسرت من تحت و تضررت كم مره صادتني و للأسف مافي اي تعويض ولا حتى تعديل.

و مره بالسعوديه كنت مسرع و الي جدامي داس شي بالشارع و كسرلي الجامه الأماميه بالكامل لولا حمايه رب العالمين و الي عالسياره و العازل جان انا رايح فيها لأن القزاز تكسر بالكامل.





في طرق وايد احسن و المفروض اتكون عالرصيف بجانب الطريق بس ربعنا لا وسط الشارع مادري ليش

الحمد لله على سلامتك

كثير من الحوادث وقعت وتقع بسبب عوائق الطريق

أذكر إبنة أحد رفاق العمل القدماء كانت عائدة من عملها كممرضة وقت الفجر وبسبب عدم وجود حمايات كفاية وارشادات ضوئية وقعت سيارتها في حفرة وتوفت بعد الحادث بساعتين .. رحمة الله عليها .. وقد كانت مساعدة لوالدها واخوانها في الحياة وهم من المقيمين العرب

[معماري قطري]

في طرق وايد احسن و المفروض اتكون عالرصيف بجانب الطريق بس ربعنا لا وسط الشارع مادري ليش

انت مهندس تفكر غيرك ما يفكرون .. تخيل الأرصفة عندنا كبيرة وتكفي لأي حفر لكن شيسوون عباقرة التخطيط .. يقولون الشارع كله خدمات والرصيف كذلك لذلك نحتد نحفر وسط الشارع .. زين بالعقل خدمات مثل الكهرباء والاتصالات ممكن تمدد وسط الشارع في بايبات خاصة أو في طرف الشارع والمنهولات تكون جانبية وخدمات الصرف والمياه ممكن تكون على الرصيف

[هيليوم]

غريب جدا الحادث ، شلون طار الغطا بالسهولة هذي فوق المترين في الهوا

[معماري قطري]

غريب جدا الحادث ، شلون طار الغطا بالسهولة هذي فوق المترين في الهوا

اتوقع اهتز وانفتح وجات الدوسة على طرف منه وطار خصوصاً لو السيارة على سرعة عالية .. نفس الحصاة لو تمر عليها السيارة أوقات تطير تضرب اللي وراها