لاحظت بمجتمعنا وعند الاباء خصوصا موضوع التفضيل بين الابناء بمعنى انه يكون هناك عند الأب تفضيل لأحد الأبناء على الآخرين بحسب مميزات ذلك الولد أو تلك البنت . فهذه أحاسيس ومشاعر لا يستطيع الإنسان التحكم فيها وإظهارها كما يحب ويشتهي.. بس هذا مب معناته انه الواحد يظهر هالشي، مثال شفته من كم يوم وهو اللي خلااني اذكر الموضوع: شفت اب بالمدرسه وانا رايحه اجيب عيالي دايما ماسك ولده وفي وراهم بنت من نفس عمر الولد تمشي وراهم بروحها والاب يضحك مع الولد ويساله عن يومه ولا هو مفتكر بهالبنت اللي وراه وصرت اشوفهم كل مااروح اجيب عيالي ونفس المنظر يتكرر ولا مره الاب مسك هالبنت من يدها حالها حال الولد صادني فضول سالت وعرفت انه البنت بنته بس من زوجته الثانيه! هل هذا سبب انك تكسر خاطر البنت وماتمسك يدها وتخليها تمشي وراك وخصوصا ان البنت والولد من نفس العمر وبنفس المرحله الدراسيه عشان محد يجي يقول يمكن الولد صغير مايقدر يمشي بروحه!
هذا مثال من الامثله انه ممكن يكون الزوج يفضل عياله من زوجته الفلانيه عن عياله من زوجه اخرى ويصرف عليهم ويشتريلهم ويسفرهم والعيال الثانيين مايشوفونه اساسا ! هل هذا عدل؟ مافكر انه رب العالمين بيحاسبه على ظلمه لعياله
مثال اخر انه ممكن يكون الاب يفضل الاولاد عن البنات وهالشي طبعا معروف ونلاحظه وايد، نلاقي الاب يشتري احسن الملابس واحدث الالعاب للولد اما البنت مايفكر اذا هي محتاجه شي اصلا دامها مع امها هي شايفتها! انزين هل هذا عدل؟ بنتك لمجرد انها بنت تنحرم من حنان ابوها ليش؟
من رايي ان الآب المفروض لا يُظهر تعاطفه أو تفضيله مع ذلك الابن أو البنت أمام البقية من الأبناء، حتى لا تحدث حساسيات تولد مشاكل فيما بينهم.
فرأيكم هل هذي ظاهره منتشره ام مجرد حالات فرديه ؟
|
رد مع اقتباس
المشاركة الأصلية كتبت بواسطة Charisma
