‏هناك تساؤل حق وواضح لدى الكثيرون! وهو هل المحامين ثقه؟ أم..

[معماري قطري]

كل مهنه في الحياة فيها الثقه والمخلص ... وفيها النصاب والطماع السارق
إن كان محامي وإلا حتى قاضي.. بالأول والأخير حسب شخصيته والتزامه بدينه أو حتى التزامه بمبادئه ومهنته

وأيضا قوانين البلد نفسها إلي تنصف المظلوم من تأخير المحامي والقاضي وضبط المحاكم فيها

كل مهنة تحكمها قوانين صارمة ويحكمها كذلك أخلاقيات مهنية وكذلك تحكمها جهات رقابية تتابع وتحاسب وتطبق القوانين .. الثلاثة للأسف عندنا مفقودين مع كل المهن فلازم تكون البيئة مناسبة للعب

ممكن أتكلم أكثر وأكثر واكتب كتب عن اللعب اللي يصير في مهنة الهندسة عندنا .. وخصوصاً من البشمهندزين وذكرت قبل كيف كل مهندس يطلع أضعاف راتبه ويحوله بلاده عينك عينك بدون سؤال من أين لك هذا .. ما يطلع الكاش الا بطرق غير قانونية وكومشنات غير قانونية وبمبالغ خيالية بسبب التمرير لإجراءات خاطئة للمقاول أو ممثل المقاول حتى .. إذا مواصفات الخرسانة عالية ممكن تطلع ب 400 ريال كمثال للمتر المكعب واذا كميات الصب 1000 والبشمهندز قلل في كميات الصب ل 800 واتحدى أي مالك تكون عنده حاسة سابعة يكشفها .. زين مع السماح بخرسانة عادية سعرها يوصل 300 ريال فيكون الفرق في تكلفة هذا البند فقط .. 160000 ريال .. نزيد عليها كميات وقطر الحديد اللي يبالغون فيه أثناء التصميم مبالغة كبيرة جداً ووقت التنفيذ يلعبون في الكميات ويقللونها تقليل كبير جداً

وهذا الشيطان البشري وز الكثيرين من الشياطين واستوت هذي عادة في كل مهنة .. رأيي المتواضع هو متابعة حثيثة لهؤلاء وتدقيق مالي دائم على تحويلاتهم ومسائلة وحتى رقابة مالية لصرفهم في البلاد صدقوني بنشوف العجب

مساكين يطلعون عندهم المحامين

[معماري قطري]

ربعنا في التخطيط مسهلين لهم ومخلين المخططات الانشائية بدون تدقيق ويقولون المكتب مسؤول عنها لو طاح المبنى قبل 10 سنين .. وقبل كانوا يدققون على النقص أما الزيادة خير وبركة .. بس محد يدقق في الموقع شاللي تم تركيبه

ما تشوفون السيسي قال فلوسهم زي الرز .. عارف شيطلع من عندنا وغالبيته المسكين المواطن دافع قيمته

[ضليع التبريد]

صدق من قال: "كمن يستجيرُ من الرمضاءِ بالنار "

[qatarman8008]

دور المحامي الاساسي هو ان يفهم منك المشكلة ويشوف جميع الادلة ثم يبدا يشرح لك قانون المحاكم وانواع القضايا وكم المدة المطلوبة وكيف القاضي ياخذ القرار..
بيرسم لك طريق يفهمك فيه الجدوى من رفع القضية من عدمها لان كثير من القضايا تكون خاسرة منذ البداية لعدم كفاية الادلة او لاسباب اخرى..
ثم يحدد نوع القضية اللي بيرفعها ويرتب جميع الاوراق والمستندات والادلة المطلوبة وتتفاهم معاه على المبالغ المطلوبة عند كل جلسة وعند دراسة كل مذكرة وعند كتابة رد على كل مذكرة..
..
هذي كانت اول خطوة ولازم الكل يفهمها قبل ان يفكر حتى في الذهاب للمحكمة..
..
الخطوة الثانية هي تعتمد على نزاهه وامانة المحامي ولا اقول شطارة لان الموضوع مافيه شطارة..
هل هو فعلا يصيغ كلمات المذكرة بشكل واضح وقوي ام انه يستخدم عبارات لكيكة مليئة بالثغرات..
وكما ذكر العضو قبلي المحامي لايتكلم كثيرا مع القاضي في الجلسة ولهذا تعتبر المذكرات المكتوبة هي محور الموضوع..
..
طبعا اسوأ محامي هو اللذي يتعامل معاك ويتعامل مع خصمك بنفس الوقت..
وقد لاحظت هذا في كثير من القضايا للاسف..

[سهم عتيج]

مرة قال لي محامي هذه العبارة (( احنا المحامين مثل الدلالوه,, كل واحد يبغي ياخذ زبون المحامي الثاني ))

[qatarman8008]

هذي بسيطة..
المشكلة لو ان المحامي يحاول يرضي الخصم..