بخصوص القرميد

[التاجرالصغير]

السلام عليكم

هل هناك الوان للقرميد ؟ وماهو احسن نوع ؟

ياليت تفيدونا.. شاكر لكم

[معماري قطري]

انا ركبت أصفر فاقع وطلع حلو هو بين البرتقالي والأصفر .. ايطالي مطلي سيراميك لامع .. عيبه يحتاج غسيل حتى يبين لونه ويغبر سرعة

فيه منه الأزرق البحري عجيب وتركيبه صعب يحتاج ناس خبرة وقص بزاوية لو عندك ميلان ولازم يتركب ببراغي على فريم خشب أو حديد أو ألمنيوم .. انا ركبته على خشب والحمد لله للحين محترم نفسه وقاعد مؤدب مكانه

الرخيص الفخاري العادي وفيه منه ماليزي يجي بتدرج ألوان رمادية وبنية ويكون شكله حلو وما يغبر مثل اللامع .. الايطالي كلفني 110 للمتر المربع من العمودي وفيه قطع خاصة سعرها غير والكلام سنة 2005 .. فيه كذلك معدني وهذا تركيبه أسهل وأرخص كثير .. وفيه نوعيات من مواد غير حتى البلاستيك بعد أرخص وتركيبها سهل واحد مركب على بيت على شارع الوعب مقابل فيلاجيو له فوق ال 10 سنين ولونه بني ويجي ألواح كبيرة تنقص وتنركب بسهولة غير عن اللي قطعة قطعة

في بعض الدول يركبون لحاء الشجر وتعمر بعد بس عندنا ما اظن تستوي

[معماري قطري]

الحديدي أو المعدني فيه منه تدرج ألوان عديدة تختار اللي تبي

[التاجرالصغير]

وين القاهم اخوي معماري .. لو بغيت اختار

[معماري قطري]

وين القاهم اخوي معماري .. لو بغيت اختار

الله يعينك عاد شوف المسند والعبيدلي والعمودي ونابينا .. كبار الموردين ومختصي مواد البناء وحتى بعض الصغار كل واحد عنده نوع معين وبيمدح لك بضاعته

[معماري قطري]

تقدر تخلص شغلك بالتلفون ويرسلون لك الصور والاسعار وتس أب .. العمودي أكيد عنده كم نوع وانا شايف عنده

[شموخ دائم]

,

,


مرحبا


ما بعد كلام اخوي معماري كلام

ولكن احب اضيف الجديد بالسوق



هذا الان صاير موضه بقطر

هو عباره عن 3 اللوان مع بعض
3 حبات قرميد كل حبه لها لون متدرج يكملون بعض
يعني نركب 3 وجنبهم 3 وفي الأخير يطلع الشكل نفس الصوره
شكل اوربي جميل جدا معتق شوي غير منتظم
سعره بحدود 120 ريال اسباني ويوجد صناعه إيطالي
موجود بشارع سلوى

وتركيبه مثل ما تفضل اخوي معماري


,

,

[معماري قطري]

ما قصرت بالصورة اخوي شموخ هذا عجيب وذكرته قبل المتموج بس الصورة غير عن الشرح وهذا مناسب

اليوم شفت بيت وهو صراحة قصر عليه قرميد بلون أزرق غامق قريب من لون كتابتي .. هذا موقعه بعد المسيلة قبل تقاطع الشمال صراحة اهني صاحبه على هذا الاختيار الموفق

[@north_star@]

الافضل بالسوق الاسباني ماركة Tejas Borja كان وكيله الدرويش والايطالي موجود عند العمودي بعد ممتاز الالوان الفخاري أرخص شي وعندك اللماعي سعره فوق 200 ريال للمتر وكذلك الفخاري اللي فيه أكثر من لون وفي منه موديلات روعه أجملها بالتركيب برأيي الشخصي موديل اسمه سنتينيريا ساند



وأهم شي مثل ما تفضل أخوي معماري اللي يركب يكون بروفيشينال لانه اذا ماكان يعرف بيخسرك عدد أمتار مهول خاصة بالزوايا وفي اكسسوارات حلوة تعطيك الشكل النهائي بدون .

ادخل على الرابط وشوف الموديلات والاكسسوارات .

https://tejasborja.com/en/roof-tiles/

[معماري قطري]

الصور حلوة ومغرية وأتمنى أي عامل يتم فحصه من جهة مختصة ويعطى ترخيص خاص لهذي الشغلات اللي يجيدها .. والمفروض عندنا مدارس مهنية يتأهل فيها الفنيين حسب تخصصاتهم وينعطون هذي الرخص

والله يا اخوان طلبت بايب فيتر يشوف مشكلة توقف الماي عندي والتانكي فوق فاضي .. يوم جاء تم يحوس فوق وتحت ويشيك الكهرباء قال فيه كهرباء فوق ولا فيه كهرباء تحت وأكيد فيه مشكلة كبيرة في الكهرباء .. انا قلت له العوامة الكترونية تحت وفوق وهي تقطع الكهرباء بدلها وبيشتغل الماي .. بعد لفة طويلة قال لي بدل السيستم كله هذا النظام معقد .. بعدين قمت ما اطلب الا واحد فاهم من الشركة اللي ركبت النظام .. يجي في دقائق يسوي كل شيء ويسويه صح