حديد معزول .. حديد غير معزول !!

[معماري قطري]

انتبه لأي تمديدات مستقبلية وسو لها فتحة في الجسر .. شوف يوتيوب حطيته آخر شيء يوضح هالشيء

[بوخالد911]

ومنكم نستفيد.

[معماري قطري]

اللي يبي يوفر في الحديد الفرق بين العادي والمعزول حول 5% ويمكن يوصل ل 10% والله أعلم عن سعره ألحين

اللي يبي يوفر يشوف استشاري يحسب كميات الحديد والخرسانة صح ممكن يحصل توفير فوق ال 50% بعض المكاتب تبالغ وايد .. ويا ليت تبالغ صح تحصل الهيكل الإنشائي قوي في نقاط معينة وضعيف جداً في نقاط معينة .. جزء من الضعف خيار الحديد العادي

[مواقف النجادة]

انا تابعت هالموضوع حزة بنيانى لبيتي و توصلت للآتي :
الحديد المغلف افضل من العادي.. بشرط واحد .. و هو انك في حالة تضرر التغليف اثناء التركيب من شموخ او تقشر و خلافه .. يجب ان تجيب علبة دهان ايبوكسي و تدهن مكان الشمخة او التقشير .. لانه لو وصل الماء الى هذه البقعة غير المعزولة ستركز الصدأ فيها و يكسرها ..

[معماري قطري]

كلامك صحيح إخوي مواقف النجادة وهذي نقطة مهمة

ما دام أقل شمخ يتسبب في صدأ فما بالك بكل الحديد عاري ومعرض للصدأ كله

اللي يصير إن الحديد يتأثر بالكلوريدات وهي تسرع الصدأ وماينا كله كلور .. ثانياً الخرسانة نسيجها اسفنجي ولو تشوفها بالمجهر تعرف كيف الماي يخترقها من جهة لجهة لذلك ضروري عزلها .. ثالثاً أي عوازل لها صلاحية وتنتهي صلاحيتها سرعة .. حتى 20 سنة تعتبر سرعة على بنيان المفروض يبقى صامد 50 سنة وأكثر .. لذلك عزل الحديد بتغليفه أفضل

كذلك ممكن نحمي أساساتنا وهي الأصعب والأهم من الصدأ بعمل تصريف للمياه تحت الأرض .. وهو عبارة عن بايبات مخرمة تجمع المياه حول الأساسات وتنزلها في منهول بمضخة تشتغل بعوامة أو المضخة تكون مدمجة وغاطسة من يرفعها الماي تشتغل وتشفطه تطلعه برا أو للصرف العمومي أو لحفرة امتصاصية بعيدة عن الأساسات

التكلفة ممكن تكون بحدود 5000 الى 10000 وضرورية للبيسمنت لكن احتياط ممكن نعملها حتى للأساسات العادية وعملها أثناء التأسيس سهل جداً

[معماري قطري]

بعدين عندنا عزل الأساسات بصبغ بيتومين هذا ما ينفع كثر العزل بغطاء الرول وبطبقات حماية حتى ما ينشق الرول

لو خذنا كل الاحتياطات خصوصاً الخرسانة طلبناها بماي مقطر خالي من الكلور نقدر نسوي بنيانا بحديد عادي .. ومكونات الخرسانة الباقية خالية من الأملاح واتوقع كل هذي الاحتياطات الغير مضمونة بتكون أغلى من فرقية الحديد المغلف اللي هو مهم للأساسات وللجسور الأرضية خلونا نقول لإرتفاع 60 سم من أرضية الحوش .. الباقي ممكن نخليه عادي وفوق السطح نرجع للمغلف أفضل تحسب لأي تسريب يخرب السقف والحديد كذلك

تفصيل مهم لازم ننتبه له وهو إبعاد مياه المطر عن أطراف البنيان بحيث نعمل سلوبات تاخذ الماء بعيد ولا ينقع قرب حائط البيت .. مع تغطية الجزء المحاذي لدفان الحوش جنب البيت ببلاستيك سميك ونخليه مرتفع ظاهر 20 سم فوق ونركب فوقه نعلة ببراغي ( تركيب ميكانيكل ) تحمي أكثر وحل تجميلي للحوش