هل لا حظتو الي شفته في بعض الادارات والموسسات ؟؟؟

[احمد1]

السلام عليكم .... باختصار مرات تدخل ادارة ... وتاخذ رقم وتنتظر وتلاحظ مافي حد ... والعشره الي على الكونترات بقدرة قادر صارو 3 والثلاثه الي تلعب او يلعب في الجوال على السناب او الانستا جرام والي يتكلم بالتيلفون والاخير يخلص المعاملات من انه الي باقيين يمكن شخصين بس لان يبي يحسسك... انه بزي والمكان لازم تنقع فيه عشان يخلصك .. ولا اذا خلصك بسرعه لان مافي مراجعين كانك انتقصت من قدره.. ..ومرات في موظفين تلقاهم يتفلسف كانه بروفسور ... ياخي مع احترامي انت مدخل بيانات خلص شغلك وانت ساكت ومكانك هذا تخدم فيه المراجعين ... عندك ضغوط .. يقطعونك طنازه في المجلس.... مرتك متسلطه عليك . زوجك مطين عيشتك .. تحط /تحطين حرتك بالناس ليش.... تحس انه /انها معقده ليش... وبعض الاوقات يدخل واحد يعرفه ولا يصير له تلقاه يفز من مكانه ويخلصه ويدق معاه سالفه وعقب ما يخلصه يطلع معاه الكوفي الي بنفس المبنى ويدردش شوي واذا كلمته قال عندي بريك ... الا اكسر صحن كلج على راسك .... البعض وليس الكل ...

[بنت شرق]

هذا دليل على أنهم استلموا الوظيفة دون تدريب ولا دورات ، موظفين تم توظيفهم لسد خانة فعلشان كذا تظهر هالتصرفات الصبيانية والغير محترفة

[qatarman8008]

المشكلة الكبرى لما يقول لك هالمعاملة مو عندنا في هالمبنى..
وتطلع في الاخير عنده..!!

[sweet qatar]

ياخي مع احترامي انت مدخل بيانات خلص شغلك وانت ساكت ومكانك هذا تخدم فيه المراجعين

"مدخل البيانات" هذا يتعامل معاك و مع الف غيرك

اصناف واجناس ولازم يتفاهم معاهم ويخلصهم

"مدخل البيانات" الي يعتمد عليه الشغل و هو واجهة الوزارة راتبه يمكن ما يكون قد مكافأة وظيفة عليا

واذا ما تدري ترى ثلاث ارباع الوظايف الحكومية في حقيقتها ادخال بيانات لكن الرواتب والتقدير يختلف


وظيفة الكاونتر محد يبيها والضغط يكون على المتوفرين الي بعضهم ما يملك المواصفات اللازمة


الحل الوحيد ان المعاملات كلها تصير اونلاين

[راجي الْعفو]

المشكلة الكبرى لما يقول لك هالمعاملة مو عندنا في هالمبنى..
وتطلع في الاخير عنده..!!

هههه هالعبارة خلتني ادور بين اربع مناطق وكل منطقه في صوب

يومها كنت شي ثاني ^_^

الجهل بالعمل مصيبة
و التعالم بعد مصيبته اكبر!

ما تعرف قول مش عارف يا فندم وريحنا ^_^

[qatarman8008]

ذاك اليوم رحت مع محامي مختص بالشؤون القانونية..
عندنا معاملة في احد الوزارات..
الا الموظف المختص غير موجود وتمينا ننطره نص ساعه..
اخر شي يوم جا قلب شكله متضايق كان داشين بيته بدون استاذان يعني ماكانه موظف وشغله يخلص معاملات الناس..!!
طل في الورقة كذا الا يقول هذي في وزارة ال... مو عندنا..
اللي معاي قال له هالمعاملة عندك واذا مش فاهم شغلك روح ناد مديرك الحين..
تغير شكله قام راح ورجع وهو موقعها ومخلصها..!!

[Riku3]

الكثير من الوزارات او الجهات الخدمية فيها هالعقليات .. مع ان لو تقارنهم بالبنوك والشركات وبعض الجهات القوية تحصل موظفين استقبال على اعلى مستوى مع ان رواتبهم اقل من بعض الوظايف الحكومية والاثنين مواطنين وبنفس العمر وبعضهم اصغر ! ..

ذكرتني من شهر بالموقف الي مر علي في كهرماء الهلال على شي تافه .. بس صج حسيت اني اتناقش مع ناس من كوكب ثاني .. وتصرفاتهم وردودهم تنم على ضعف تدريب مع انهم مب صغار .. وضعف شخصيتهم لاني كل ما ناقشت واحد فيهم على المشكلة يقلب الموضوع شخصي ويتم يدافع عن نفسة وربعه ! ..

حتى مديرتهم في الطابق الارضي نفس العقلية الضعيفة .. بس لانها بنت ما قدرت اطول معاها الكلام بس طلعت الي في خاطري ورفعت ضغطها وطلعت ..

التطوير مب بس ديكور .. المفروض يغيرون "الديكور" الي ورى الطاولات بعد !! . << قلت لها هالجملة بس باسلوب احسن ههههه .

ونفس الشي صارلي من اسبوعين في الوسيل وزارة الاقتصاد .. رجعوني مره .. وثاني يوم يبون يرجعوني مره ثانية على شي ثاني ما قالوا عنه اليوم الاول .. وبالرغم ان الشي ثانوي جداً وطلبي متكامل ويلبي المطلوب بس لضعف تدريبهم وصلاحياتهم ..

لا الموظفه تعرف تتصرف ( اشك ان تفهم في اي شي ) ولا مسؤولة الكاونترات سوت شي ( كانت مقتنعه بس مب في يدها شي ) . . ولا المسؤول الي مب هامه الموضوع ( كان همه شلون يحولوني عليه من الاساس ) ولا المسؤول الي موجود في الطابق الثاني الي قلب السالفة شخصية وتم ماسك جملة ( تقدر تقدم شكوى لو تشوف اجرائاتنا خطأ ) ... طبعا ما طلعت بنتيجة وقلت الحمد لله والشكر ورجعت ثاني يوم وخلصت اموري مثل الشاطر خخخخخ .

لا كل شي بصوب ولين جيت ادفع البنت بخياس نفس تقولي كم رقم باسورد الفيزا بدون ما تعطيني الجهاز ادخله بنفسي .. تعوذت من ابليس ومسكت اعصابي وعطيتها الرقم .

[naklan]

لو كنت مسؤول لوضعت سيسي تيفي كيمرا للمراقبة
لكل مكان للخدمات وتراجع التسجيلات في محل اخر وخصم
الف ريال على كل موضف مستهتر لكل قلة ادب يرتكبها
وتدخل في تقييم الترقيات وتصل الى انها
الخدمات اذا لزم الامر

[مضارب دوسري]

انا اذا لقيت موظف فاضي على طووول ارز وجهي عنده/ا واذا قالي بالدور اقوله شفتك فاااضي ف قلت يمكن انه مافي دووور حرك الارقام

في هالحاله يا يخلصني يا يحرك الارقام عنده
واروح ارز وجهي عند الثاني اللي جنبه

[بوخميس]

بعضهم اذا مافي رقابة يلعب على كيفه

مرة رايح القومسيون اشوف الكونترات فاضية
اطل على جنب اشوفهم طالبين من تيك آوي وقاعدين يزطون، واحد شافني مغتّر استحى قالي الشيخ عندنا بريك بس عطني دقيقة

نطرته وخلصني

بس شدعوة كل الموظفين بريك في نفس الوقت؟؟