ببساطة لا تحتاجون جهاز ليزر يدقق استواء الأرضية ولا شركة مساحة تيلة صغيرة حطوها وشوفوا شلون تتحرك جهة السلوب
ببساطة لا تحتاجون جهاز ليزر يدقق استواء الأرضية ولا شركة مساحة تيلة صغيرة حطوها وشوفوا شلون تتحرك جهة السلوب
بيض الله وجيهكم جميع ..
السلام عليكم ... حاب أبدل بلاط الحوش .. تعبت من الموجود كله يتكسر و يرقل.. شفت نوع شبيه من الشعبي صناعة عمانية و إيرانية .. حجم 40x40 و في منه 30x30 .. السماكة من 1.8 و في منه بسماكة 3.0 انش.. موجود في أنصار سيتي و بيت الحجاز على طريق سلوى ..
تنصحوني اركبة للحوش ؟ و اذا بركبة اَي حجم و سماكة افضل .. و بعدين التركيب يكون على ارضية ترابية او إسمنتية ؟ شاكر لكم
عليكم السلام ورحمة الله وبركاته
أكيد قصدك السمك 3 سم .. كله مناسب اللي يعجبك شكله ركبه وبالنسبة لي أي بلاط منتج من بلاد فيها مواد خام نظيفة زين .. يلاط قطر فاشل للغاية وكله يستخدمون بودرة وبقايا هدم يخلطون الخشب والحجر الجيري في الكسارة ويسوون منه بلاط لا حسيب ولا رقيب .. نصحت ولد عمي بالضبط العام أو أول العام كان بيركب لليوان المجلس وركب بعد كم يوم مبقع وغير عن العتبات والدرج عريض حول 30 متر تكسرت غالبيتها والسبب سمكها ضعيف ومقواة بحديد مصدي وزيادة عن تشرب البلاط بسرعة بالماء يزيد الصدأ ويزيد التكسر
وهذي صورة لجزء من الدرج
التركيب خله على خرسانة بسمك 10 سم أو 15 سم .. لو 10 لازم تسوي فواصل كل 10 متر للتمدد ولو 15 كل 15 متر .. لو البعد عندك 12 متر في طول 20 متر مثلاً .. تسوي الصبية 12 سم وتخلي الفواصل في الأطراف وتقسم ال 20 متر من النص بفاصل تمدد وسطي وركب البلاط بمونة جيدة مثل الأمريكية تنباع بعبوات 5 كيلو اعتقد
ولو تفضل تسويها بدون حديد أحسن لك بس اطلبها مقواة بالفايبر من قطر ردي مكس تحتاج أرضية مدكوكة وابعد عن البودرة وفوقها نايلون سميك ولازم تعمل حساب السلوب نص الى 1% يمشي
لا تنسى تركب نعلات متناسبة على الحوائط عن الرطوبة لتخرب الصبغ عندك وتركيب النعلات لازم يكون زين ولو حطيت خط سيليكون أسفل النعلة في زاوية التقائها مع الأرضية بتضمن عدم دخول الرطوبة للجدران
النعلات لو حاب شكل غير ما تكلفك وايد تقدر تسويها قرانيت لو حبيت وتقدر تركبها قطع كاملة مثل 30 في 60 بتكون شوي مرتفعة بتطلع أحلى
هلا الله يمسيك بالخير بوعبدالله اخبارك عساك بخير ...والله كلامك كله عين العقل وصحيح للأسف حتى الان المنتج القطري من ناحية بلاط الحوش غير جيد مخلوط بشوائب ... الواحد تلوع جبده وهو يشوف ويدور العينات تتفتفت خاصة الجزء السفلي ... ما ابي اذكر اسماء مصانع بس الين الحين ما لقيت شئ كفو للأسف قبل الحصار أغلبنا معتمدين على بلاط الحوش الإماراتي والسعودي ... الحين البديل غالي إسباني 60/60 يتراوح في حدود 130 للمتر أو تركي نفس المقاس 100 للمتر أو هندي 85 المتر ... طبعا أتكلم بسمك 2 سم أما مصانع الدوحة مقاس واحد 40/40 والكواليتي أي كلام ... أما الطبعة في حدود 120 للمتر ...عطيتك تحديث للمعلومات والأسعار هههههه... دمت بود
صباح الأنوار اخوي الملياردير واخواني القراء
غالي ومب جودة مشكلة .. ليش ما فكرت في الخرسانة الملونة اللي صبغتها تجي مع الخلطة .. نفس مواد الانترلوك بس تجي مع الردي مكس .. كلم قطر ردي مكس اتوقع عندهم .. ومؤكد عندهم خلطة الفيبر .. لو بتسوي خرسانة بدون لون بخلطة الفيبر تمشي بعد ولا تحتاج حديد .. صحيح بتعلم عليها التواير ممكن بس بيوت أمريكا غالبيتها يستخدمونها بدون لون وكذلك أرصفة المدن الحكومية
شفت بيت مركب كسر رخام وقطع مب متساوية .. ناتج فائض شغل رخام ومركبة بروبة بيضاء وطالع وايد حلو .. بس مؤكد تحته خرسانة
تقدر كذلك تشتري المواد الأساسية كسر قابرو الصغيرة ورمل مغسول واسمنت مقاوم للأملاح وصبغة رمادية أفضل صبغة الانترلوك وتجيب عمال وخلاط .. كذلك تشتري خلطة الفيبر أو خيوط فيبر وتخلط في الموقع وتصب .. سو شبكة للأرضية بمقاس 10 في 10 كل عشر أمتار سو فاصل تمدد وتحتاج بحدود 10 سم سمك للصبية .. فيه اعتقد لون قريب للأسود ولون عنابي أو أحمر قاتم واللون البرتقالي لون الانترلوك
بس لو اعتمدت خلطة معينة واصل بنفس المقادير حتى يكون عندك تجانس