السلام عليكم ..
وين اقدر احصل البلاط الشعبي اللي يركبونه داخل البيوت؟ وكم سعر المتر ؟
جزاكم الله خير
السلام عليكم ..
وين اقدر احصل البلاط الشعبي اللي يركبونه داخل البيوت؟ وكم سعر المتر ؟
جزاكم الله خير
السلام عليكم ورحمة الله وبركاته ..
أفضل بلاط شعبي تشتريه من مصنع سمسمة فالصناعية، اعتقد سعره للمتر المربع يبتدي من 19 ريال ..
تقدر تطلع رقمهم من (180) ..
او بيت الاحسا ء طريق سلوى عقب بترول عزيز ..
مشكورين ..الله يعطيكم العافية
إذا بتركب سجاد سو خرسانة ناعمة أفضل لك وأرخص بشوي
الخرسانة الناعمة تجي رمل مع كمية اسمنت قليلة بدون كنكري وتقدر تقويها بخلطة فايبر أو مواد مقوية سائلة عن التشقق .. وغالبية الردي مكس عندهم مواصفاتها ومواصفات اللايت ويت سكريد أو الصبية خفيفة الوزن
هذي الله يسلمك تجي مايعة وبروحها تستوي مستقيمة كسطح الماء بسبب كثرة المياه فيها .. انا سويتها عندي في البيت داخله لكل الأرضيات فوق الخرسانة الانشائية وبعد التمديدات كبديل عن الرمل اللي يعتبر مخبأ للنمل وتنتشر فيه المياه في حال التسرب .. بعد ما تجف تستوي سطح أملس ناعم في يدك تخشنها شوي حتى تمسك المونة لو بتستخدم مونة تحتاج تخشين أو تخليها ناعمة لو بتستخدم غراء قوي يلصق على أي سطح
ورخيصة عن الخرسانة العادية ولا تستخدم حديد لها لترابطها بالفيبر حتى اني سويتها للحوش تحت البلاط وللحين حول 12 سنة بلا مشاكل ولا هبوطات
شوف موضوع العقود فيه اسم المادة اعتقد فيبروس ورقم معين .. تقريباً في أول ورقة حساب كميات وشارحها في الموضوع .. وفيه مواد كثيرة طلعت والردي مكس عندهم كل الخلطات والمهم تشوف شركة زينة مثل قطر ردي مكس أو ما يعادلها ولا تحتاج لتبليط لو بتحط باركيه أو سجاد .. التبليط اذا تبغيه مكشوف غير وأي نوعية من التبليط
للحوش لو تبي تشطبه بصبغ ايبوكسي بيطلع زين ويمكن قريب من البلاط في السعر
محل الباركيه بينصحك نصيحة بائع يبغي سطح مستقيم يركب عليه .. البلاط عمره ما يكون مستقيم وعمره ما يكون ثابت لازم بتحصل بلاطة متخلخلة حتى بعد ما تركب الباركيه بتحس بها وقت الدوس لبعض نوعيات الباركيه الرقيقة
اللي بيركب على بلاط انصحه يشوف البلاط بلاطة بلاطة ويتأكد إن ما فيه وحدة متخلخلة ( ترقل مثل ما نقول بالعامي ) ولو حصل يعالجها أما بعمل فتحات بالدريل في الأطراف وصب مونة سائلة قوية تسد الفراغات أو بازالتها لو بسهولة تنزال واعادة تركيبها بمونة جديدة وقوية
أتذكر سالفة حصلت لقريب لي دعاني لمعاينة تركيب البلاط والمبلط كان عربي ما اذكر سوري أو مصري .. أول ملاحظاتي إن التبليط كان مقوس واضح .. يعني الوسط مرتفع والأطراف نازلة .. يوم سئلته لماذا يا هذا قال ما يضر ولا بيبين لأنه بيركب باركيه .. تخيلوا التقوس مع الباركيه شلون بيكون وضعه ومهما يكون خفيف يكون مزعج .. ال 0 slope area شيء صعب عند غالبية المبلطين ولين طلبت منهم سلوب معين للحمام أو المطبخ ما عرفوا يسوونه
فوق هذا بعض البلاطات من الدوس تبين متخلخلة وقلت له في وجه المبلط التبليط مب حل والتركيب غلط والمبلط يبرر وشكل رفيجي مقتنع بكلام المبلط والله يعينه .. بعدها بفترة من السكن شفته يسب ويلعن في هؤلاء المبلطين والسبب اضطر يزيل مناطق كاملة بسبب الهبوط والانتفاخ ومشاكل التبليط المعروفة