عليكم السلام ورحمة الله وبركاته
الله يسلمك ويحفظك اخوي بو جاسم
اللي في الحوش مع البرشر يكفي ما دامك خايف من الصيانة خله مكشوف في الحوش .. حتى تحت البيت لو بتسويه ذكرت تسوي مدخل ومكان واسع للصيانة ولو تبي تقدر تحطه ورا البيت حتى في ارتداد مترين يكفي بس لازم تمدد بيب 4 انش يوصل له من الشارع للدنكر لو دعت الحاجة ووصلة الماء بتكون طويلة ممكن ما توافق عليها كهرماء
تحت البيت في بيسمنت جزئي خدمي ذكرت المحاسن كلها ومنها كل بيباتك تكون مخفية تحت البيت في ممرات خدمية تقدر تشوفها وتعرف أي تسريب وين وتبدلها بسهولة لو مسوي دكتات للحمامات .. كذلك تتجنب قرب الحائط الخارجي سواء للصرف الصحي أو لتوصيل المياه بحيث تقدر تسوي دريشة عريضة لو حبيت أو تسوي جزء بارز من الحمام .. بعبارة أُخرى تكون عندك حرية معمارية أكثر
بعدين انت ما تكون سويت بيسمنت بالمعنى المتعارف عليه ارتفاع متر و70 يكفي وفيه خزانات مناسبة لهذا الارتفاع وبدون تشطيب اسمنت وخرسانات
بيوت الأُوروبيين والأمريكان غالبيتها معمولة بهذي الطريقة وفيها ما يسمى ب crawl space تحت البيت وهذي مساحة نازلة يدخل فيها الواحد يحبي على ركبته لتشييك الخدمات وصيانتها
عندنا نحفر غزير للأساسات ونرجع ندفن ليش ما نستغل جزء من اللي حفرناه لهذي الخدمات