موضوع توثيق العقود قديم صارله سنوات .. والمحاكم ما كانت تستقبل اي شكوى بدون توثيق العقد .. ونفس الشي صار في تشديد على موضوع تأشيرات الاهل للاجانب وضرورة ان يكون عنده عقد ايجار موثق ..
"الضريبة" او "الرسوم" كانت في السابق تبتدي من 1% وتزيد كغرامة لين 2.5% حسب التأخير .. ولكن الان تم تخفيض توثيق العقود الى 0.5% ولكن صارت غرامة تأخير التوثيق 10,000 ريال !! .. يعني انت يا مالك لو ما صدقت العقد وتبي تشتكي على الي نصب عليك لازم تدفع للبلدية 10,000 ريال علشان ختم ..
المشكلة الان صارت ان كهرماء ما تقبل توصيل اي كهرباء لحين توثيق العقد وهذا صار ضد المالك للاسف لاني في السابق ما كنت اسلم المفتاح الا لما يحول الكهربا باسمه علشان اضمن حقي ..
اما الحين هو يسكن وعقب لين اوثق العقد بسبب اجرائات البلدية البطيئة والسيئة .. تتم الكهربا باسمي وتجيني فواتير وازعاج ورسايل انذارات قطع الكهربا عن الشقق .. والموضوع مب ذنبي ولكن من البلدية لان مب فاضي انا كل كم اسبوع اروح اتنقع في بلدية الدوحة علشان 3 او 4 عقود .. والا اطرش مندوب يذلونه وما يعطونه وجه لين يخلص .. وكل ما شخص طلع من الشقق والا عقد جديد لازم اسوي كل هاي من اول !! ..
بلدية الدوحة شغلهم بطيء وبدائي بشكل لا يوصف .. تروح تحصل زحمة والموظفين يتأخرون .. ووايد يقومون من على مكاتبهم والارقام ما تتحرك .. واماكن انتظار الزوار بعيد عن الكاونترات وتضيع وقت .. واجرائاتهم غريبة وروتينية ، واحد يدخل البيانات ويطرشك حق عامل يختم الاوراق وعقب تروح حق واحد يسجل البيانات على الختم .. وعقب تروح حق المدير يوقعلك الاوراق .. عسى ما شر 2018 وعايشين بعقلية 1993 .. بكل سهولة كان كل هذا يتم اونلاين مثل انظمة وزارة الداخلية الممتازة وتنتهي السالفة ..
ونفس العقلية في كهرماء .. موظفين تدريبهم ناقص وهالشي واضح لاي شخص يضطر ان يخلص اي معاملة في الرئيسي عندهم .. بس الفرق ان ديكور كهرماء احلى ..
انا مب ضد دفع رسوم مقابل تنظيم العملية لان في امور كثيرة مترتبة عليه في اكثر من جهة ..
لكن اتمنى اشوف شي على ارض الواقع مقابل هالرسوم من البلدية .. مثل تصفية البيوت المقسمة او مخالفة الي مأجرين ملاحق بشكل غير قانوني .. مب تعاقبوني كمالك بسبب بعض الاجانب الي يحطون كهرباء باسهم علشان يطلعون فيزة .. فوضع الرسوم بهالطريقة ما بتمنعهم لان ممكن يسويها ويدفع هالرسوم وبعد ما يخلص من استخراج الفيزة يتم فسخ العقد .