-
استفسار عن اسعار بناء الفلل؟
السلام عليكم ورحمة الله
اخواني الاعزاء ... انا بصدد بناء بيت العمر وقبل لا اسوي الخرائط والتصاميم حبيت اعرف متوسط اسعار بناء الفلل (تشطيب دلوكس)
ارضي صغيره ومحتار بين اسوي (1) فيلا دورين وبينتهاوس .... او (2) فيلا دورين وبينت هاوس + بيسمنت بمساحة الفيلا
طبعا كله يعتمد على الاسعار الحاليه لاني مابي اسوي شي اكثر من المبلغ اللي اقدر عليه
وايضا اقتراحاتكم لا غنى عنها يا اخوتي 
-
تميم المجد
عليكم السلام ورحمة الله وبركاته
البنيان يا اخوي قد ما تتطلب وتحط فيه قد ما يكلف .. محد يقدر يعطيك تكلفة معينة وكلها تقديرات .. فيه مقاولين قلة يسوون لك تصميم وبناء بنفس الوقت وهذيلا أكيد بيوفرون عليك وقت كبير ويمكن سعر
لو بتبني وبتشطب بعقود منفصلة العقود بروحها تاخذ وقت وحتى تحصل شخص يكون مناسب ويوقع العقد ويلتزم بتتعب وفوق هذا بتتعرض للإستغلال لأن اللي بيسوي لك شغلة وحدة بيحط ربح قوي فيها .. قد ما تقدر خل عقدك واحد ومع مقاول مقتدر واحد بس خل حل عقدك مفصل .. وأكيد بتشيل بعض الحاجات الاختصاصية مثل الألمنيوم بس ضروري تحدد شغل المقاول فيما يتعلق بترتيب الفتحات وملء الجوانب بالخرسانة ولو بتسوي حلق حجر أو رخام هذا لازم محدد ومحدد من بيسويه
الخشب وهي الأبواب والنعلات والكبتات الثابتة أفضل تخليها عقد بروحه وتتابع مع منجرة أو مورد يورد ويركب وبعدد لازم يتحدد دور المقاول الرئيسي في الحماية والتحضير ومتى ينتهي دوره .. مثلاً تكون مخطط لأماكن الكبتات الثابتة وطالب يوصل لها انارة وينتهي دور المقاول هنا ويجي النجار يفصل الكبت ويركبه ويوصل الكهرباء للانارة ويركب الية التشغيل والاطفاء
الأبواب ممكن تطلب المقاول يملأ جوانب الطابوق خرسانة ويعمل اطار خشبي سب فريم من مارين بلايوود حتى يوزن البلاستر ولا تتكسر الأطراف ويكون جاهز لتركيب الباب بفريمه قبل السكن .. بهالطريقة نسقت الشغل ووضحته وكنت واضح وتعمل حسابك أثناء الجبس اللي بعد عقده يكون منفصل تشوف نجار أو مورد أبواب يورد ويركب .. لو بتشوف مورد شوف المقاسات الستاندرد وحددها للمقاول يسوي الفتحات على أساسها
موضوعين انصحك تقراهم العقود المثبت فوق وعندك موضوع مراجعة التصاميم المعمارية تقدر تاخذ منه نموذج يناسبك ويناسب أرضك وانا اشوف النموذج الطولي الضيق اللي فيه أقل ممرات والصالة جانبية والغرف مفصولة في جهة أفضل نموذج اقتصادي وشرح في نفس الوقت وبناسب الأراضي الصغيرة
تبغي دراسة أولية وتعديل على أي مخطط بعد حاضر
لو مستعجل وتبغي نموذج معين فيه عندك شركة خالد المسند تسوي بركاست وشغلهم نظيف ما ادري اذا مستمرين والا وقفوا وفيه عندك شركة العلي للمشاريع واحدى شركات ناصر بن خالد .. تبغي تصميم وبناء تودي التصميم المبدئي وتتفق على أساسه وهو يخلص الخرائط المفصلة والموافقات بعد فيه مقاولين مستعدين وأعرف واحد لو تبي بس لازم تحدد مواصفاتك أول بأول معاه وكل شيء أكيد بسعره
-
جزاك الله خير اخوي معماري قطري على الجواب والتفصيل في امور البناء
طبعا مش مستعجل على البناء لاني حاط في بالي اركز اكثر شي على التخطيط وتصميم المساحات بحيث تستوفي كل احتياجاتي وتفادي اي نقص واخذ استشاراتكم ايضا
بس ايضا حبيت اعرف هل فيه متوسط اسعار للمتر الواحد مع التشطيب علشان اقدر احسب سعر تقديري للبناء؟؟
حسب علمي انه الان سعر المتر تشطيب دلوكس يكلف مابين 1400 الى 1600 حسب المقاول ..... يعني مثلا لو البيسمنت 270 متر والارضي 270 متر والاول 270 متر والبينتهاوس 60 يطلع كامل البيت 870 متر وهي حسب متوسط الاسعار (اللي يمكن اكون غلطان فيها) بيطلع علي البيت قريب مليون و 250 الف
-
تميم المجد
البيسمنت موضوعه ثاني ويعادل ضعفين الدور العادي إن لم يكن أكثر
المتر المربع تكلفته مشطب وكامل حسب اختياراتك من 2000 الى 3000 .. بيتي كلفني قريب 3000 في 2004 وألحين الأسعار ما فرقت كثير وبتعرف كم بالضبط لو بديت تحسب كل شيء وتحتفظ بالفواتير .. لا تنسى فيه رخام غالي بروحه ممكن يكلفك فوق سعر المتر المذكور وفيه تصاميم جبس غالية .. والحجر بروحه لو تبي مبلغ غير وشغل ووجع راس ثاني .. التكييف لمساحتك اللي ذكرتها بيكلف 300 ألف وطالع لو تبي دكت سبلت وللعادي ينزل لحدود ال 80000
الاحتياطات للبيسمنت ذكرتها عدة مرات وموجودة حتى صوت وصورة في يوتيوبيات البناء مع الشرح
في النهاية اللي يحدد السعر اختياراتك
لكن لو تختار الطريق الصعب وإنك تدور أرخص مقاول ومقاولين الكلام مؤكد بتتعب وبتخسر صيانة ووجع راس وشغل كله أخطاء
صدقني ناقشت مقاولين ما يعرفون الحديد المغلف من المصدي وواحد قال لي الحديد اللي نستعمله غير أسود .. قلت أسود وهو طالع من المصنع من يتركب يتحول أحمر ومن يوصله ماي الخرسانة يصدي ويزيد الصدأ ومع الوقت تبين مشاكله بعد 10 سنين وفوق
-
,
,
مرحبا
اخوي الكريم
ما قصر اخوي معماري بو عبدالله
كلمه ( ديلوكس ) هي الخدعه
1400 المتر
تلاقي المواصفات مواصفات بيوت ( الايجار )
زين وين الديلوكس الي قلتوا عنه
يعني سيراميك الارضيات أبو 30 ريال
وسيراميك المطابخ والحمامات أبو 20 ريال
والابواب العاديه بدون موديل
والسور طابوق بدون خراسانات والالمنيوم الشبابيك ارخص نوع وسماكه اللمنيوم تعبانه
السيناريو
راح تزيد انت أنواع افضل للسيراميك بتاخذ بحدود 60 ريال الى 100 ريال
وبتزيد في أنواع الأبواب
وبتعدل مواصفات الشبابيك وبيبات الماء وقطع ال wc
وبتعدل بلاط الحوش
والكهرباء والسوكتات والليتات وعازل الماي بتجيب شركه محترمه
( وبتدفع فروق الأسعار ) اذا ما صارت مشاكل بينكم
أخيرا
بتلاقي نفسك حسبت التكلفه صارت عليم المتر 2000 ريال اقل شي
وللأسف ( العماله الي اشتغلت بالبيت سيئه جدا والتشطيب تعبان )
وبتقول ياريت دفعت 2000 للمتر واخذت ( تشطيب راقي ونظيف )
عاده هذا السيناريو الي بيحصل مع الجميع
اخوي الكريم
انت الي يقرر فيلا او 2 فيلا متلاصق
اذا تعمل 2 فيلا متلاصق فهذا لحسب حاجتك يسكن فيها احد الأولاد مستقبلا
او تبيها استثمار للايجار
هذا يعتمد عليك انت ( ونظرتك المستقبليه للمشروع )
حاول تعرف مستقبلك كيف بيكون
وخطط له اليوم
وشوف غيرك الي بنفس وضعك شنو صار معاه
بتشوف قصص حلوه مع الأصدقاء والقرايب
تستفيد من تجاربهم
بالتوفيق لك
,
,
,
,
-
تميم المجد
صادق والله إخوي شموخ كلمة ديلوكس يلعبون بها وفي النهاية كل شيء أرخص شيء
المقاول المحترم يجيب لك عينات وحتى تحصل عينات موجودة عنده ويقول لك بيجيب لك كذا وكذا ويحدد لك حتى الإسم والموديل والمقاول العادي مكتبه سيارته وكلمة ديلوكس هي المواصفات اللي يعطيك اياها
ضوابط المشاركة
- لا تستطيع إضافة مواضيع جديدة
- لا تستطيع الرد على المواضيع
- لا تستطيع إرفاق ملفات
- لا تستطيع تعديل مشاركاتك
-
قوانين المنتدى
رد مع اقتباس