مكتب استشارات هندسية

[معماري قطري]

يعطيك العافية اخوي معماري قطري ماقصرت عالمشاركة بس احترت وخفت بصراحة ��

الله يعافيج وييسر أُمورج .. شيء يحير أكيد رفيجي وهو أصلاً إخوي كان بيدفع 500 الف ريال زيادة + 100 الف فرق تغيير المقاول في مشروع ب 2.1 مليون .. يعني وفرنا قريب 30% وكان قبل مكتب ثاني مشتغل في المخططات وكان فاشل وتعبنا معاه وخسرنا 35 الف في التصميم وتركناه وغيرنا التصميم بالكامل

نفس المكتب صمم بيت اخوي وانا نصحته بمكتب ثاني وراجعت مخططاته وعدلت كثير لكن هو ما اقتنع .. كانت تكلفة بنيانه وعقده مع المقاول 4 مليون .. طلع دافع فوق ال 5 والسبب نواقص في التصميم وتعديلات .. بالنسبة لي هذا واضح إن فيه تلاعب كبير في هذي المكاتب وشغل تحت الطاولة بينهم وبين المقاول

لازم الواحد يتركد ويتعب وينتبه لهم واعيد واكرر الجهات الحكومية مقصرة تقصير كبير وشرحت أوجه التقصير كم مرة والا العمل الهندسي سهل تنظيمه وسهل عمل تشريعات قانونية له واتباعها باليات تنفيذ سهلة

[بـومحمد]

والله انا صممت فيلتي عند محرم بخوم فعلا مكتب مريح وجميع التخصصات فيه يعني الاقتراحات تجيك من كذا مهندس للوصول الى التصميم الصحيح بس مبالغين في الاشراف عطوني سعرغالي وقاعد ادور حد مثل مستواهم بس بسعر معقول بالنسبه لفيلا والي يعرف حد مناسب وراعي ذمه يبلغني لانه احتمال كبير الاسبوع الجاي اوقع العقد

[استشاري م]

ربنا يوفقك

[معماري قطري]

والله انا صممت فيلتي عند محرم بخوم فعلا مكتب مريح وجميع التخصصات فيه يعني الاقتراحات تجيك من كذا مهندس للوصول الى التصميم الصحيح بس مبالغين في الاشراف عطوني سعرغالي وقاعد ادور حد مثل مستواهم بس بسعر معقول بالنسبه لفيلا والي يعرف حد مناسب وراعي ذمه يبلغني لانه احتمال كبير الاسبوع الجاي اوقع العقد

شوف إذا المصمم مرتاح معاه وأثبت خبرته وسلاسة تعامله حاول قد ما تقدر تخليه يشرف أوقات تواجهك نواقص تصميمية هو يغطيها ويعدلها لأنها مسؤوليته .. مشرف ثاني أوقات يطلع لك إنه مسوي بطولة ويقنعك بتغييرات كثيرة ما تكون حاسبها ولا المصمم حاسبها ويخربط لك .. وأوقات يقول لك انا شغلي اشراف وغير مسؤول عن المكتب اللي سواه قبل

بالنسبة للمبلغ تقدر تتفاوض وتقلل أوقات المرور لمرة اسبوعياً وللحاجة الضرورية

[معماري قطري]

انا تعودت اوقع عقد متكامل من البداية تصميم بمراحله .. سكتش - نهائي معماري - الرخصة المبدئية - ثم خدمات وانشائي - الرخصة النهائية - اعداد الوثائق والمناقصة والاشراف عليها - ثم الاشراف على التنفيذ وكله مفصل والدفعات مفصلة حسب المرحلة ويحق لي انهي العقد مع نهاية أي مرحلة

هذا النوع من العقود يخلي الاستشاري يحترمك ويكسبك ويحدد سعر يريحك ويناسبه

بعدين مب خطأ الاستشاري الممارس يكون عارف السوق وعارف المقاولين لو دعا 10 شركات للمناقصة هو يرتاح لهم وانت دعيت أي عدد تبغي إنت في يدك الاختيار بس اسمع راي الاستشاري وخل الاختيار والتوقيع يتم عن طريقه

[معماري قطري]

دوم المشروع لو درسته عدل ما تعدل فيه وايد وممكن تسويه كما التصميم 100% أو أوقات تغير مادة تشطيب بسيطة حتى توفر مبلغ أو ترفع من مستوى التشطيب اللي كنت مقرره

[المعنى88]

الآستشاري والمقاول ... مابينهم المالك ( كم حجم خبرته في البناء والتشطيبات ) .... المالك يعتمد عليه في القرار في حالة الأختلاف مابين المقاول والأستشاري على مدى خبرته اللي مر عليه البناء
وشاف الأخطاء ومراحل التنفيذ واخذ أحتياطاته لمشروعه الشخصي ....... ولازم يدرس السوق والأسعار ويخصص ميزانية المشروع ويوزع راس المال اللي في أيده على التشطيبات ودفعات المقاول والأستشاري .... ومع مراحل التنفيذ لازم الحسبة يكون فيها التوفير والخسارة على المبلغ المخصص في الميزانية ... نعطيكم مثال :
- خصصنا مبلغ من ميزانية المشروع 150000 ريال للجبس مع البحث والتواصل والتنفيذ النهائي أكتمل الجبس 125000 ريال ( التوفير 25000 ريال )
- خصصنا مبلغ من ميزانية المشروع 200000 ريال للحجر الخارجي للفيلا بالكامل مع التنفيذ والرغبات في التشكيل والأضافة خارج العقد أكتمل بــ 350000ريال ( الخسارة 150000 ريال )
اذا المطلوب أعمل عملية توازن مابين الرغبة والمطلوب في الميزانية أقلل من الخسائر وأسعى الى التوفير لتغطية الخسائر المتوقعة .
- مع العلم أن دفعات المقاول والأستشاري تبقى ثابته في الميزانية ( الا في حالة التغيير والاختلاف والتوقف ).
- أذا نصيحة قبل أختيار الآستشاري والمقاول يجب القناعة والتفكر قبل التنفيذ واتخاذ القرار مع اشخاص خارج البلد .
- أنا عن نفسي ولازلت في مراحل التشطيب - المقاول قطري الجنسية ومشرف على المشروع حتى نهايته وخبرته تعدت الثلاثون سنة - والأستشاري
وثقت به ولا زال محل ثقة دون أختلاف كبير بل بسيط مع الحاجة له فقط الاشراف للعظم مع شهادة أتمام البناء ودفعات بنك التنمية .

[معماري قطري]

المقاول الله يسلمك الفاهم والجيد ما يختلف مع الاستشاري الا تكون المخططات مضللة وناقصة معلومات مهمة أو قابلة للتأويل بكم طريقة .. التصميم المتكامل والدقيق يتبعه المقاول بدون لخبطة .. تبقى بعض الأُمور اللي ما تنشرح والمعروفة بأُصول الصنعة هذي بعض المقاولين يتفيهمون فيها وبعضهم يعلمون الاستشاري بحسب خبرتهم لكن ملاحظتي في قطر الغالبية يدورون مصلحتهم أما شغل أرخص أو أخف عليهم وأسرع

المالك المهتم لازم يسأل ويتابع ووسائل التواصل سهلت كل شيء حتى صوت وصورة

اللي بياخذ استشاري اشراف يطلبه بشرط مكتوب في العقد إنه يصور تقارير مصورة صوت وصورة لكل زيارة ويرسلها على الوتس أب والعملية سهلة ولا تاخذ دقايق من وقته الثمين .. بعد فوق هذا من قديم الزمان كانت أُصول الإشراف توثيق كل شيء في دفتر الإشراف واللي تكون منه نسختين في الموقع ومكتب الإستشاري مع توقيع ممثل الاستشاري وممثل المقاول في الموقع على كل زيارة وكل ارشاد ومناقشة

بعد تدني الوضع الهندسي عندنا ودخول قوم بص حضرتك واللي تحصل الساحة حق واحد فاهم في كل شيء إستووا يمشون المقاول في اللي يبي وحتى زيارات ما يزورون الموقع ويعتمدون التوجيه في المكتب والتوقيع على تقرير صوري يسويه المقاول

[معماري قطري]

واحد من الربع مهتم لبنيانه ومعين استشاري بس يبالغ يقول لي معين استشاري فوق الاستشاري واحد اشراف يومي وواحد متابعة واشراف عام .. يقول لي حصل كراكات بعد البلاستر والصبغ وصلحها والاستشاري يقول له ما فيه بيت في قطر ما فيه كراك .. قلت له تعال وييب استشاريك بيتي واتحداكم بعد 12 وداخل على 13 سنة تطلعون كراك فيه ما يسمى بال Hairy Crack وهذا بصعوبة يبين عارف وين مكانه لكن صعبة ملاحظته حتى انا أوقات اضيعه وصار بعد الحفريات القوية اللي صارت حول بيتنا وخط الريل مر تحت الأرض قريب من بيتنا

[معماري قطري]

فيه مثل أمريكي يقول

Blame it on the rain بما معناه حط اللوم على المطر أو تعذر بأي سبب للتأخير أو عدم الإنجاز وللأسف هذي مبررات العمل الهندسي عندنا